no
အပိုင်း (၂.၁) - ကွမ်းချိုင်ပန်
ပြေးလမ်းရှိ သန့်စင်ခန်းထဲလျှောက်ဝင်လာချိန်မှာ ယဲ့စစ်၏မျက်နှာက ဖြူဖျော့နေ၏။
သူ့ကျောရိုးတစ်လျှောက် ချွေးအေးများစီးကျနေပြီး ခါးနေရာမှာချွေးများရွှဲကာ အေးစက်နေသောအဝတ်စက သူ့တင်ပဆုံရိုးအထက်မှာ လာကပ်နေသည်။
လွန်ခဲ့သောအခိုက်အတန့်က ရုန့်ရင်းကြမ်းတမ်းစွာ ဆဲဆိုခံလိုက်ရချိန်က သူ၏ရောဂါတုံ့ပြန်မှုကို နှိုးဆွလိုက်သလိုပင်။
-မင်းမေငါ*...
-ကောင်စုတ်လေး...
ကြမ်းတမ်းသည့်လေသံကတောင် အလွန်တူနေ၏။
မြောက်ပိုင်းမှာ နွေဦးနှောင်းပိုင်းရောက်နေတာတောင် ရေပိုက်မှကျလာသောရေများက အရိုးခိုက်အောင် အေးနေဆဲပင်။
ယဲ့စစ်ကမူ သိပ်မအေးသောကြောင့် ရေကို လက်ခုပ်ဖြင့်ခံ၍ သူ၏မျက်နှာကို ထပ်တလဲလဲဆေးကြောလိုက်သည်။ သူ့မျက်နှာပေါ်မှ အရေပြားတို့က ထုံထိုင်းကာ ယားယံလာပြီး နွေဦးမက်မွန်ပွင့်တို့၏ ပန်းရောင်သဖွယ်သန်းလာခဲ့သဖြင့် သူ့ကိုယ်သူ ဖိအားပေးပြီးရပ်တန့်လိုက်ရသည်။
"အော့-" မျက်နှာသစ်ပြီးနောက် ယဲ့စစ် ကြွေထည်ဘေစင်အစွန်းပေါ် လက်ထောက်ကာ အကြိမ်အနည်းငယ်လောက် ပျို့တက်လာခဲ့လေ၏။
သူ ဘာမှမစားထားရသောကြောင့် ဘာကိုမှအန်မထွက်ခဲ့သော်လည်း ရှင်းပြလို့မရစွာဖြင့် ပို၍သက်သာလာခဲ့သည်။ ပါးစပ်ကိုဆေးကာ သူနှုတ်ခမ်းထောင့်မှရေများကို သုတ်လိုက်ပြီး ဘေစင်အနောက်ကမှန်ကို မော့ကြည့်လိုက်၏။
သန့်စင်ခန်းထဲမှာ အခြားမည်သူမှမရှိပေ။ မှန်ထဲကနေတစ်ဆင့် အိမ်သာတံခါးများစွာက ဗလာကျင်းလျက်ရှိကြောင်း မြင်တွေ့နေရသည်။
ယဲ့စစ် အခိုက်အတန့်တစ်ခုလောက် တိတ်ဆိတ်နေခဲ့ပြီး လွန်ခဲ့သောဆယ်မိနစ်ခန့်ကစကားကို ရုတ်တရက် ရေရွတ်လိုက်၏။
"အဲ့ဒီသုံးထောင်က..."
"... ဆေးစရိတ်အတွက်။"
"အဲ့ဒီသုံးထောင်က... ဆေး... ဆေးစရိတ်အတွက်..."
စကားထစ်ခြင်း။ သူက စကားထစ်၏။
ချူးဝမ်လင်က သူ့ကို ရှက်စရာကောင်းသည်ဟုတွေးကာ စကားထစ်တာကို တည့်မတ်ပေးသည့်စင်တာသို့ တစ်လလောက်ပို့ခဲ့သော်လည်း သူသည် စကားသုံးလုံးထက်ပိုပြီး တစ်စုတစ်စည်းတည်း မပြောနိုင်ဆဲပင်။ သူစကားထစ်ရသည်မှာ နက်နဲသောပြဿနာများကြောင့် ဖြစ်ကောင်းဖြစ်နိုင်ပြီး ထိုသင်ခန်းစာများက သူ့အတွက် အရာမရောက်ခဲ့ပေ။ ကံကောင်းစွာဖြင့် သူ ထိုပြဿနာကို ကလေးဘဝကတည်းက ကျင့်သားရလာခဲ့ပြီး စနောက်လှောင်ပြောင်မှုများကို ရှောင်ရှားရန်အလို့ငှာ သူ့ကိုယ်သူ အေးစက်ပြီး သီးသန့်ဆန်သူလိုမျိုး စကားကို တိုတိုတုတ်တုတ်သာပြောခဲ့သည်။
စောစောက သူ ထိုလူမိုက်ရှေ့မှာ ကိုယ့်ကိုယ်ကိုယ်အရှက်ခွဲမိတော့မလိုဖြစ်ခဲ့သော်လည်း ကံကောင်းထောက်မစွာဖြင့် အရေးကြီးသောအခိုက်အတန့်မှာ အသက်ရှူသံကိုထိန်းကာ ဖုံးကွယ်လိုက်နိုင်၏။
စကားခုနစ်လုံးတည်းသာ။
သူ ထိုစကားခုနစ်လုံးလေးကိုတောင် မပြောနိုင်ခဲ့ပေ။
[TN/အင်္ဂလိပ်လို ခုနစ်လုံးပါ။]
ယဲ့စစ် မကျေနပ်နိုင်သေးဘဲ ထိုစကားလုံးများကို ကြိမ်ဖန်များစွာရေရွတ်ရန် ကြိုးစားခဲ့သည်။ ရလဒ်အနေဖြင့် သူ ပို၍စိုးရိမ်စိတ်များလာလေ၊ သူ့မျက်နှာက ပို၍နီမြန်းလာလေဖြစ်လာပြီး သူ၏မျက်လုံးထောင့်များက စိုစွတ်လာခဲ့လေ၏။
ထိုစဥ် သန့်စင်ခန်းအပြင်ဘက်ကနေ ခြေသံများကြားလိုက်ရသည်။
ယဲ့စစ် သူ့နှတ်ခမ်းကို စေ့ပိတ်လိုက်သည်။ ထို့နောက် အင်္ကျီမှာပါသောဦးထုပ်ကို ဆောင်းလိုက်၏။
ဝင်လာသူက အယ်ဖာဆိုင်ကယ်မောင်းသမားဖြစ်သည်။ သူ တံခါးကနေဝင်လာသောအချိန်မှာ ယဲ့စစ်ကို အမှတ်တမဲ့တစ်ချက်ကြည့်လာပြီး စောစောတုန်းက တစ်စုံတစ်ယောက်ကိုရိုက်နှက်ခဲ့သည့်ကလေးမှန်း အမှတ်ရသွား၏။
စောစောလေးကမှ စိုစွတ်ကာ နီစွေးနေခဲ့သော ယဲ့စစ်၏မျက်နှာက ယခု ကွမ်းချိုင်ပန်*ကဲ့သို့ ပြောင်းလဲသွားပြီး မျက်လုံးများကလည်း ဘာမထီဟန်ဖြင့် အကြည့်လွှဲသွားလေသည်။
[TN/ ကွမ်းချိုင်ပန်ဆိုတာ ထိုင်ဝမ်သရေစာတစ်မျိုးပါ။ သူက လေးထောင့်ပေါင်မုန့်ထဲကို ကြက်သား၊ ပဲ၊ အာလူး၊ ပုစွန် စတာတွေနဲ့ ခရင်မ်အစာသွတ်ထားပြီး အပေါ်ယံပေါင်မုန့်သားကို ကြွပ်ကြွပ်ရွရွလေးဖြစ်အောင် လုပ်ထားပါတယ်။ တရုတ်ကနေ တိုက်ရိုက်ဘာသာပြန်မယ်ဆို ခေါင်းတလားပျဥ်ပြားလို့အဓိပ္ပါယ်ရပါတယ်၊ ယဲ့စစ်ကိုကျ အပြင်ပန်းမှာ မာကျောတဲ့သူလို့ထင်ရပေမဲ့ အတွင်းစိတ်ကနူးညံ့တယ်လို့ဆိုလိုတာပါ။ အင်္ဂလိပ်ကနေပြန်ရရင်ကျ ပတ်ဝန်းကျင်ကအရာတွေကြောင့် သူ့ကိုသက်ရောက်မှုမရှိဘဲ မူလအခြေအနေမှာပဲရှိနေတဲ့သူလို့ ခေါ်ပါတယ်။]
ထိုအယ်ဖာက ပြဿနာရှာဖို့မရည်ရွယ်ဘဲ အကြည့်ပြန်ရုပ်သွားခဲ့သည်။
ပြေးလမ်းကနေ ပြန်ထွက်လာပြီးနောက် ယဲ့စစ် လမ်းမဘေးမှာ အချိန်တစ်ခုကြာအောင် မှင်တက်နေခဲ့သည်။
ပုံမှန်အတိုင်း သူ့ကိုယ်သူ ပြန်လည်ထိန်းချုပ်၍ အားနည်းသော သူ၏စိတ်ခံစားချက်များကို ရှင်းလင်းပစ်လိုက်၏။ ထို့နောက် သူ အနိုင်ရခဲ့သောပိုက်ဆံများဖြင့် နေ့စဥ်အသုံးအဆောင်တချို့နှင့် သစ်သီးတချို့ကိုဝယ်ကာ ယဲ့ဟုန်ကျွင်းရှိနေသော နာတာရှည်ဆေးရုံသို့ အပြေးသွားခဲ့သည်။
နွေဦးအစောပိုင်းမှာ မှောင်ရီဝင်ချိန်က ခါတိုင်းထက်ပိုစောသည်။ ယခုမှ ငါးနာရီသာရှိသေးသော်လည်း ခြံဝင်းကြီးထဲမှ လမ်းမီးတိုင်များက ဖြည်းဖြည်းချင်းမီးများလင်းလာ၏။ ကောင်းကင်တစ်ဝက်လောက်က ခရမ်းရောင်သန်းနေဆဲဖြစ်ပြီး ကန်ရေပြင်ထက်မှာ အလင်းရောင်များနှင့် အမှောင်ရိပ်တို့ကရေရာယှက်ကာ ငန်းလေးများက ရေပြင်ပေါ်မှာ ကြော့ရှင်းစွာကူးခတ်နေကြသည်။ ရှုမျှော်ခင်းက အလွန်သာယာလှပေ၏။
ယဲ့ဟုန်ကျွင်း၏ အဆင့်မြင့်လူနာဆောင်က တတိယထပ်မှာရှိသည်။
ယဲ့စစ် တံခါးကနေဝင်သွားလိုက်ချိန်၌ သူ(မ)က အိပ်ပျော်နေဆဲဖြစ်ပြီး အေးစက်ကာ ဖြူဖပ်ဖြူရော်ဖြစ်နေသော သူ(မ)၏အသားအရေက ဖြူဖျော့ဖျော့အရိုးစုနှင့်တောင်တူနေသည်။ ကုသလို့မရသောနာတာရှည်ရောဂါက သူ(မ)ကို နှိပ်စက်နေခဲ့ပြီး သူ(မ)၏အရိုးများကတောင် နွမ်းလျပါးလွှာကာ ချောင်ကျနေသောမျက်နှာလေးက ခေါင်းအုံးထဲမှာ သနားချင့်စဖွယ် နစ်မြုပ်နေလေ၏။
သူ(မ)ကိုယ်သူ(မ) ဂရုစိုက်ဖို့မတတ်နိုင်သော်လည်း ချူးဝမ်လင် စျေးကြီးပေး၍ငှားရမ်းထားသော သူနာပြုများက သူ(မ)အတွက် ၎င်းတို့အတတ်နိုင်ဆုံး ဆောင်ရွက်ပေးခဲ့ကြသည်။ ယဲ့ဟုန်ကျွင်းက သန့်ရှင်းသပ်ရပ်နေဆဲဖြစ်ပြီး သူ(မ)၏ဆေးရုံဝတ်စုံက သံပုရာရနံ့သင်းနေ၏။ လက်ဝကျယ်သော ဆေးရုံဝတ်စုံအောက်မှ အားနည်းသောသူ(မ)၏လက်ဖျံထက်မှာ ပြွတ်သိပ်နေသော အပ်ပေါက်ရာများစွာကို မြင်တွေ့နိုင်ပေသည်။
ယဲ့စစ် ယဲ့ဟုန်ချွင်း၏လက်ဖျံကို သူ့လက်ချောင်းများဖြင့် ခပ်ဖွဖွထိတွေ့နေရင်း သူ့နှာခေါင်းဝက ချဥ်းစူးလာ၏။
သူ(မ)က အကြောဆေးသွင်းနေရပြီး အကြောဆေးတစ်လုံးကို ယွမ် ၂၀၀၀၀ ကျော်ကုန်ကျသည်။ ရောဂါကို အရှင်းကုသဖို့က ခက်ခဲသော်လည်း အသက်ကိုဆွဲဆန့်နိုင်ပေ၏။
သို့သော်လည်း ကျွမ်းကျင်သူနာပြုများ၊ ဆေးကုသတောင်စရိတ်နှင့် အသက်ကိုဆွဲဆန့်ပေးနေသော ဆေးများ...
အားလုံးမှာ ငွေကိုသုံးရသည်။
ယဲ့စစ်မှာ မှတ်စုစာအုပ်တစ်အုပ်ရှိပြီး ယဲ့ဟုန်ကျွင်း၏ဆေးကုသစရိတ်များအတွက် ချူးဝမ်လင်သုံးခဲ့သော ငွေများအားလုံးကို ရေးမှတ်ထားသည်။ သူ အနာဂတ်မှာ ၎င်းတို့ကို ဖြည်းဖြည်းချင်းပြန်ဆပ်ဖို့ စီစဥ်ထား၏။
အလျင်အမြန်တိုးပွားလာသော ကိန်းဂဏန်းများက ယဲ့စစ်ကို ထိတ်လန့်မှုမှသည် ထုံထိုင်းသွားစေတဲ့အထိ ပြုလုပ်နိုင်ခဲ့သည်။
ချူးဝမ်နင်သာ အသိစိတ်ရှိဆဲဆိုပါက သားအမိနှစ်ယောက်ကို အကြွင်းမဲ့ကူညီပေးသင့်၏။
သို့သော် သူက မျှော်လင့်ချက်များကို ကျရှုံးစေခဲ့သည်။
ချူးဝမ်လင်က ယဲ့စစ်၏ဖခင်အရင်းဖြစ်ပြီး ချူးမိသားစုတတိယမျိုးဆက်၏ အကြီးဆုံးသားဖြစ်သည်။
သူငယ်ရွယ်စဥ် ပရောပရည်လုပ်ခဲ့စဥ်က နိမ့်ကျသောမိသားစုမှဆင်းသက်လာသည့် ယဲ့ဟုန်ကျွင်းနှင့် ဘဝကို အတူဖြတ်သန်းမည်ဟု ကျိန်ဆိုခဲ့ပြီး သူ(မ)၏စာလေ့လာမှုကိုစွန့်လွှတ်စေကာ သူနှင့်အတူထွက်ပြေးဖို့ကိုတောင် လှုံ့ဆော်ပေးခဲ့၏။ ကမ္ဘာလောကကြီးကို မျက်နှာပြောင်တိုက်ကာ စွန့်စွန့်စားစားဖြင့် လက်မထပ်မီ ကလေးယူပြီးနောက်မှာတော့ ကလေးငိုသံများနှင့် ဆင်းရဲမွဲတေမှု၏ဒဏ်များကြား ချူးဝမ်လင်၏ထင်ယောင်ထင်မှားများကို တဖြည်းဖြည်းချေဖျက်သွားခဲ့သည်။
အိမ်ထောင််ရေး၊ လိုက်ဖက်တဲ့အဆင့်အတန်း၊ မိသားစုဆင်းရဲမွဲတွေမှု... သူ့ကိုကြည့်ရတာ ထိုစကားလုံးများကို ပထမဆုံးအကြိမ်ခံစားဖူးခြင်းဖြစ်ပုံပေါ်ပြီး နောင်တရသလို ခံစားခဲ့ရသည်။ သူက ဇိမ်ကျသောဘဝကနေ ဆင်းသက်လာသည့် ချမ်းသာသောသခင်လေးဖြစ်ပြီး အခက်အခဲများကို မခံစားနိုင်ခဲ့ပေ။ သူက သူ့ဇာတ်ရှုပ်များကိုဖုံးဖိကာ သူ့မိသားစုဆီပြန်သွားခဲ့ပြီး အပြစ်ကိုလက်ခံခဲ့၏။ တစ်နှစ်ကြာပြီးနောက်မှာ မိသားစု၏စီစဥ်မှုကိုနာခံ၍ အမျိုးကောင်းသမီးတစ်ဦးနှင့် လက်ထပ်ခဲ့လေသည်။
ယဲ့ဟုန်ကျွင်းက ငိုကြွေးခဲ့သည်၊ အော်ဟစ်သောင်းကျန်းခဲ့သည်၊ တောင်းပန်ခဲ့သည်၊ အံတင်းတင်းကြိတ်ကာ မာနကိုစွန့်လွှတ်ခဲ့သည်။ သို့သော်လည်း အနှီးထုပ်လေးဖြင့်ပတ်ထားသည့် ယဲ့ချစ်လေးကိုချီပွေ့ထားရင်း ထိုအခြေအနေကို ကယ်တင်နိုင်စွမ်းမရှိခဲ့ပေ။
လက်မထပ်ဘဲ ကလေးမွေးဖွားခဲ့သည့် အိုမီဂါက ဝေဒနာခံစားရခြင်းနှင့် အဓိပ္ပါယ်ဆင်၏။ သူ(မ)က ယဲ့စစ်ကို ဆင်းရဲသားရပ်ကွက်မှာ ပျိုးထောင်ပေးခဲ့သည်။ သူ(မ) မည်မျှပင်ခံစားနာကျင်ရပါစေ၊ သင်ခန်းစာမရဘဲ အပြစ်ကင်းစင်သောမိန်းကလေးသဘာဝကို ထိန်းသိမ်းထားဆဲပင်။ သူ(မ)မှာ အယ်ဖာသာမက ဘီတာရည်းစားများစွာရှိခဲ့သော်လည်း တစ်ယောက်မှကြာရှည်မခံဘဲ အမြဲလိုလို ဆိုးဆိုးဝါးဝါးနည်းလမ်းများဖြင့် လမ်းခွဲပြတ်စဲခဲ့ကြသည်။
ယဲ့စစ်ငယ်ငယ်တုန်းက အမျိုးမျိုးသောမျက်နှာများစွာထဲမှာ သူ့အဖေ၏အရိပ်ကို လိုက်ရှာဖို့ကြိုးစားခဲ့သော်လည်း မရှာနိုင်ခဲ့ပေ။ သူ၏မျိုးရိုးနာမည်က သူ့မိခင်၏မျိုးရိုးကိုယူထားသည့်အတွက် ထိုကိစ္စနှင့်ပတ်သက်၍ သဲလွန်စမရှိခဲ့ချေ။
သူ အရွယ်ရောက်လာချိန်မှာ သူ့ဖခင်နှင့်ပတ်သက်သောအတွေးများက မှေးမှိန်ပျောက်ကွယ်သွားခဲ့သည်။
သို့သော် လွန်ခဲ့သောလအနည်းငယ်က အလှည့်အပြောင်းတစ်ခုဖြစ်လာခဲ့၏။
ချူးမိသားစု၏အာဏာကို ထိန်းချုပ်ထားပြီး လက်လွှတ်ဖို့ငြင်းဆန်ခဲ့သည့် လူအိုကြီးချူးက အပြင်းအထန်နာမကျန်းဖြစ်၍ ဆေးရုံတင်လိုက်ရသည်။ သူ့ကို ကယ်တင်နိုင်ခဲ့သော်လည်း ချူးမိသားစု၏မြေးများက ၎င်းအား အန္တရာယ်လက္ခဏာအဖြစ်မှတ်ယူကာ မိသားစုပိုင်အမွေများအတွက် တိုက်ပွဲက အရှိန်ပြင်းလာခဲ့သည်။
ချူးဝမ်လင်က အရည်အချင်းသိပ်မရှိသလို တစ်ကိုယ်ကောင်းဆန်ပြီး ရှစ်နှစ်အရွယ် သားဖြစ်သူချူးရွေ့ကလည်း ခေါင်းမာပြီး ဉာဏ်တုံးလှ၏။ ထို့ပြင် မစ္စတာချူး၏တတိယဇနီး ချူးဝမ်လင်၏မိခင်က ငယ်ရွယ်စဥ်တုန်းက ကချေသည်တစ်ယောက်ဖြစ်ခဲ့သည်။ သူ(မ)က နိမ့်ကျသောမိသားစုမှ ဆင်းသက်လာရုံသာမက လက်ထပ်ပြီးနောက်မှာ ဖောက်ပြန်သည့်ကောလာဟလများတောင် ရှိခဲ့သည်။ ထို့ကြောင့် တတိယအိမ်ထောင်က လူအိုကြီး၏သဘောကျမဟုတ်ခဲ့ဘဲ အမွေဆက်ခံသည့်တိုက်ပွဲမှာ လုံးဝအလေးမသာခဲ့ပေ။
ချူးဝမ်လင်က သူ့ညီအစ်ကိုမောင်နှမများ၏သွားကြားမှ ထွက်ကျလာသည့်အမှိုက်များကိုသာ လက်ခံဖို့ဆန္ဒမရှိချေ။ သူက ကောက်ရိုးမျှင်ကိုဖမ်းဆုပ်၍ အပြင်မှာ သသေသလားရှင်သလားမသိသော သူ၏သားကြီးကိုတွေးမိသွားပြီး ထိုကလေးက တန်ဖိုးရှိကာ အသုံးချနိုင်လိမ့်မည်ဟုခံစားခဲ့ရပုံပင်။ ထိုအချိန်ကျမှ သူက သားအမိနှစ်ယောက်၏တည်နေရာကို ရှာဖွေခဲ့ပြီး ၎င်းတို့၏အိမ်တံခါးဆီသို့ ပထမဆုံးအကြိမ်ရောက်လာခဲ့၏။
"မား၊ ကျွန်တော်... ကျွန်တော် ဒီနေ့ ပြိုင်ပွဲတစ်ခုမှာ ဝင်ပြိုင်ခဲ့တယ်။" ယဲ့စစ်က ယဲ့ဟုန်ကျွင်းထံ ထစ်ထစ်အအဖြင့် သတင်းကောင်းကိုပြောပြနေခဲ့သည်။ "မားရဲ့... မားရဲ့ရောဂါကိုကုသဖို့ ပိုက်... ပိုက်ဆံတွေ အများကြီးရခဲ့တယ်။"
သူ့အမေရှေ့မှာ ယဲ့စစ်က သူ၏ဟန်ဆောင်မျက်နှာဖုံးကို လုံးဝဖယ်ရှားလိုက်၏။
သူက နာခံမှုရှိလာပြီး မျက်ခုံးတန်းများကလည်း ပျော့ပျောင်းစွာကွေးညွတ်နေသလို ချစ်စဖွယ်အသွင်အပြင်နှင့် မျက်လုံးများကလည်း တောက်ပလျက်ရှိသည်။
သူက ယဲ့ဟုန်ကျွင်းနှင့် တူညီသောပုံစံခွက်ထဲကနေ ထွင်းထူထားသည့်အတိုင်းပင်။
သို့သော် ဆင်းရဲသားရပ်ကွက်မှာ သိုးသူငယ်လေးများလို နူးညံ့လွန်းသောသားအမိခမျာ ရိုးတွင်းချဥ်ဆီများ ခန်းခြောက်လောက်အောင်ထိ အမြတ်ထုတ်ခံခဲ့ရသည်။ ယဲ့ဟုန်ကျွင်းက အားနည်းသည့်အတွက် သူက သန်မာနေမှဖြစ်မည်။
မိမိက မည်မျှပင်နူးညံ့နေပါစေ၊ ရန်လိုဟန်ဆာင်ကာ ဟန်ဆောင်ဆူးများကို တပ်ဆင်ထားဖို့လိုအပ်သည်။
ယဲ့စစ်က ယဲ့ဟုန်ကျွင်း၏ခြေလက်များကို ကြွက်သားများပျော့ပျောင်းလာအောင် နှိပ်နယ်ပေးကာ ကြမ်းပြင်ကိုတံမြက်စည်းဘာညာလှည်းကျင်းပေး၍ ဆေးရုံခန်းထဲမှာ နှစ်နာရီကျော်လောက်နေခဲ့သော်လည်း ကံမကောင်းစွာဖြင့် ယဲ့ဟုန်ကျွင်းက အလွန်အားနည်းပြီး နိုးမလာခဲ့ပေ။
သူကလည်း ထိုနှစ်နာရီအတွင်း လမ်းပတ်လျှောက်ရင်း ကျောင်းအသစ်၊ အတန်းဖော်များအကြောင်း၊ သူ ပြေးလမ်းမှာတွေ့ခဲ့သော ငွေရောင်ဆိုင်ကယ်၊ ဆေးရုံဝင်းထဲရှိ လူလုပ်ရေကန်ထဲမှငန်းများ မည်မျှလှပနေကြောင်း စသဖြင့် သတင်းကောင်းများကို ပြောပြနေခဲ့သည်။
သူက တကယ်တမ်းတော့ ထင်ထားသလောက် စကားနည်းသူမဟုတ်သော်လည်း သူ၏မိခင်မှလွဲ၍ သူ၏ထစ်ထစ်ငေါ့ငေါ့စကားများကို မည်သူကမှ နားထောင်ဖို့စိတ်မရှည်ကြပေ။
နောက်ဆုံးတော့ သူက ယဲ့ဟုန်ကျွင်း၏ဆေးရုံခုတင်နံဘေးရှိ ကြွေပန်းအိုးထဲမှ ညှိုးနွမ်းနေသောနေကြာပန်းကိုယူလိုက်ပြီး အမှိုက်ပုံးထဲထည့်ကာ သူလမ်းမှာဝယ်လာခဲ့သော မွေးပျံ့နေသည့်လီလီပန်းနှင့် အစားထိုးလိုက်သည်။
သူ(မ)က ငိုက်မြည်းနေမှုကြောင့် သူလာလည်သည့်အချိန်တိုင်းကို မသိခဲ့ပေ။ ထို့ကြောင့် ယဲ့စစ်က သူလာခဲ့ချိန်တိုင်း ပန်းများကို လဲပေးခဲ့ခြင်းဖြစ်သည်။
လီလီပန်းက မွေးပျံ့လတ်ဆတ်နေပေ၏။
ထိုသို့ဆိုလျှင် သူ ဤနေရာသို့ရောက်ခဲ့ကြောင်း သူ(မ) သိလောက်ပေမည်။
***
Aurora Novel Translation Team
There is No Eng Version