အပိုင်း ၃၀ (ဟိုင်န်ရီ၏ ဒေါသ)
တော်ဝင်မင်းသား ဟိုင်န်ရီက 'ဒါကို ကြည့်ပါလား' ဟူသည့်သဘောဖြင့် ပတ်ဝန်းကျင်ကို တစ်ချက်ဝေ့ကြည့်ပြီးမှ တစ်ဖန်ထပ်၍ စကားစလိုက်သည်။
“ဒါပေမဲ့ စကားပြောနေတုန်း ထူးဆန်းတဲ့အချက်ကို တွေ့ခဲ့ရပါတယ်။ လေဒီ ရက်ရှ်တာက ကျွန်တော်နဲ့ အပြန်အလှန်ပေးပို့ခဲ့တဲ့ စာပါအကြောင်းအရာတွေကို တစ်ဝက်ကျော်လောက် သိမနေတာပါ။ အဲ့ဒါအပြင် ဘယ်အပိုင်းကစပြီး မသိတာလဲဆိုတာကရောပါပဲ။ ဟိုးအရင်က အကြောင်းအရာ တစ်ခုနှစ်ခုမဟုတ်ဘဲ စာရဲ့တစ်ဝက်လောက်ကို မသိဘူးဆိုတာက ထူးဆန်းမနေဘူးလားဗျ။ ပိုဆိုးတာက အဲ့ဒီမသိတဲ့အပိုင်းက လေဒီ ရက်ရှ်တာရဲ့ အစေခံမိန်းကလေး မသိတဲ့အပိုင်းနဲ့ အတိအကျတူနေတာပါ။”
လူအများက ခေါင်းညိတ်လိုက်ကြသဖြင့် ရက်ရှ်တာ၏ နားရွက်များ ရဲလာတော့သည်။
ဆိုဗီရ်ရှုက မျက်လုံးထဲမှ လျှပ်စီးများ ပစ်လွှတ်တော့မတတ် တော်ဝင်မင်းသား ဟိုင်န်ရီကို စိုက်ကြည့်ကာ အော်ပြောလိုက်၏။
“တော်လိုက်ပါတော့၊ တော်ဝင်မင်းသား ဟိုင်န်ရီ။”
“တိတ်တဆိတ် ဖြေရှင်းရမဲ့ကိစ္စဆိုပေမဲ့ လူတွေအာရုံစိုက်လာအောင် လုပ်ခဲ့တာက အရှေ့အင်ပါယာရဲ့ အရှင်ဧကရာဇ်ကိုယ်တိုင်ပါပဲ။”
“ကိုယ့်ရဲ့လေဒီက မတရားသဖြင့် အခက်အခဲနဲ့ ရင်ဆိုင်နေရရင် ကာကွယ်ပေးရမှာက စစ်သည်သူရဲကောင်းတို့ရဲ့ ကျင့်ဝတ်ထုံးတမ်းပဲ မဟုတ်ဘူးလား။ အဓိပ္ပာယ်မရှိတဲ့ အချက်တွေကို ဆုပ်ကိုင်ပြီး သနားစရာကောင်းတဲ့ လူတစ်ယောက်ကို စွပ်စွဲအပြစ်တင်နေတာက အနောက် ဘုရင့်တိုင်းပြည်ရဲ့ စစ်သည်သူရဲကောင်းကျင့်ဝတ်ဆိုရင်တော့ ဒီကိစ္စနဲ့ပတ်သက်ပြီး ပြောစရာမရှိဘူးပေါ့။”
“ဘုရားရေ။ ကိုယ့်ရဲ့လေဒီက မတရားသဖြင့် အယောင်ဆောင်တုပခံခဲ့ရတဲ့အတွက် ကာကွယ်ဖို့ ရှေ့ထွက်လာခဲ့တာပါ။ ကျွန်တော်ရောပဲ။”
“ဘာ။”
တော်ဝင်မင်းသား ဟိုင်န်ရီ၏ နှုတ်ခမ်းထက်တွင် ညစ်ကျယ်ကျယ် အပြုံးတစ်ပွင့် ပေါ်လာသည်။
“ကျိန်းသေပေါက် အယောင်ဆောင်ခံရတဲ့သူက လေဒီမဟုတ်ဘဲ ယောက်ျားတစ်ယောက်ဖြစ်နေမလား မသိဘူးဆိုပေမဲ့ပေါ့။”
သူ့အကြည့် တစ်ချက်ကလေး ကျွန်မဘက်သို့ ရောက်လာချိန်တွင် ကျွန်မရင်ထဲ ထိတ်ခနဲ ဖြစ်သွားရသည်။ ယခင်က 'ကျုပ်က ယောက်ျားလေး' ဟု သဲလွန်စပေးသည့်သဘောဖြင့် စာထဲတွင် ရေးခဲ့ဖူးသည်ကို သတိရသွား၏။
'ထင်ယောင်ထင်မှားဖြစ်တာ... နေမှာပါ။'
ဟုတ်တယ်။ တော်ဝင်မင်းသား ဟိုင်န်ရီက ရက်ရှ်တာကို အတုမှန်း သိသွားရင်တောင် ကျွန်မက အစစ်ပါဆိုပြီး သိစရာအကြောင်းမရှိဘူးလေ။
ထိုအချိန်တွင်...
ယခုအချိန်အထိ နှုတ်ဆိတ်နေခဲ့သော ရက်ရှ်တာက “အရမ်းလွန်ပါတယ်” ဟု စကားစလာသည်။
လူအများ၏ အကြည့်များက ဆိုဗီရ်ရှုနှင့် ဟိုင်န်ရီထံမှ ရက်ရှ်တာထံသို့ ပြောင်းသွားကြတော့၏။ ရက်ရှ်တာက ပြဇာတ်ထဲမှ ဇာတ်လိုက်မင်းသမီးအလား သနားစဖွယ်၊ ဖြူစင်အပြစ်ကင်းစွာ ရှိုက်ကြီးတငင် ငိုကြွေးနေလေသည်။
တော်ဝင်မင်းသား ဟိုင်န်ရီ၏ မျက်ခုံးတစ်ဖက်က အနည်းငယ် ပင့်တက်သွား၏။
“ခင်ဗျားက ကျွန်တော့်ကို တရားလွန်တယ်လို့ ပြောနေတာလား၊ လေဒီ ရက်ရှ်တာ။ အစေခံနဲ့ ပေါင်းကြံပြီး ကျွန်တော့်ကို လှည့်စားဖို့ကြိုးစားခဲ့တဲ့ ခင်ဗျားကလေ။”
ရက်ရှ်တာက ရှိုက်ငင်သံဖြင့် ပြောလာသည်။
“ကျွန်မက စာထဲမှာပါတဲ့ အကြောင်းအရာတွေအကြောင်း သေချာပြောပြခဲ့တာပါပဲ။ ဒါပေမဲ့ အရှင့်သား ဟိုင်န်ရီက စာကို အလိမ်အညာတွေဆိုပြီး အတင်းငြင်းနေတာမဟုတ်ဘူးလား။”
'အဲ့ဒါက ထပ်ပြီး ဘာကို...'
တဒင်္ဂ ပါးစပ်အဟောင်းသား ဖြစ်သွားရသည်။
'အခုလေးတင် သူ ဘာလို့ပြောလိုက်တာ။'
ရက်ရှ်တာ၏ မျက်လုံးများမှ မျက်ရည်များ တပေါက်ပေါက် စီးကျလာသည်။
“အရှင့်သား ဟိုင်န်ရီ ဘာလို့ ဒီလိုလုပ်နေမှန်း သိပြီထင်ပါတယ်။ ရက်ရှ်တာက အရှင့်သား လိုချင်တဲ့ အဆင့်အတန်းမြင့်ပြီး ပညာရည်မြင့်တဲ့ အမျိုးသမီးမဟုတ်လို့ တမင် စည်းသားနေတာမဟုတ်လားရှင့်။ ရက်ရှ်တာ့ဆီ ပို့ပေးခဲ့တဲ့ ခင်မင်ရင်းနှီးမှုတွေက အကုန် အတုအယောင်တွေချည်းပဲလားဟင်။”
သူက အဓိပ္ပာယ်မရှိသော အကြောင်းရင်းဖြင့် စွန့်ပစ်ခံလိုက်ရသည့် အလွမ်းဇာတ်ထုပ် ဇာတ်လိုက်မလေးလား မှတ်ရပေသည်။
ဆိုဗီရ်ရှုက သွားချင်းကြိတ်ရင်း တော်ဝင်မင်းသား ဟိုင်န်ရီကို စူးစူးစိုက်စိုက် ကြည့်နေခဲ့သည်။
“အဲ့ဒီလိုလား။”
တော်ဝင်မင်းသား ဟိုင်န်ရီက ပခုံးများတုန်အောင် ရယ်လိုက်ပြီးနောက် “ဟား” ဟု သက်ပြင်းတစ်ချက်ချကာ ခေါင်းခါလိုက်သည်။
“ရူးချင်စရာပဲ။”
“မဟုတ်ရင် အရှင်ဧကရာဇ်ရဲ့အရိပ်အကဲကို ကြည့်နေရလို့ ရက်ရှ်တာကို လူလိမ်ဖြစ်အောင် ပုံချနေတာလား။”
တစ်ခါတလေ ရက်ရှ်တာတွင် အရိပ်အခြည်မကြည့်ဘဲ စကားပြောတတ်သည့် အကျင့်ရှိသော်လည်း ယင်းမှာ မသိနားမလည်မှုနှင့် ဖြူစင်ရိုးအမှုမှ လာသည်ဟုသာ ထင်ခဲ့မိသည်။ ယခု ကြည့်လိုက်တော့မှ သူက အံ့ဩလောက်စရာကောင်းလောက်အောင် လိမ္မာပါးနပ်သူမှန်း သိလိုက်ရ၏။
တော်ဝင်မင်းသား ဟိုင်န်ရီက စုတ်သပ်ရင်း ပြောလိုက်သည်။
“လေဒီ ရက်ရှ်တာ။ ခင်ဗျားကတော့ ကျွန်တော် တွေ့ဖူးသမျှ လူတွေအားလုံးထဲမှာ အရှက်မရှိ မျက်နှာအပြောင်ဆုံးပုဂ္ဂိုလ်ပဲဗျ။”
“ကျွန်မတို့ရဲ့ ခင်မင်ရင်းနှီးမှုကို ထောက်ထားပြီးတော့ ရက်ရှ်တာ့ကို စိတ်ထိခိုက်စေမဲ့ စကားလုံးတွေ ဆက်မပြောပါနဲ့တော့ရှင်။”
ရက်ရှ်တာ ရှိုက်ငင်ငိုကြွေးလေတော့ အနီးအနားရှိ မှူးမတ်အချို့က မသက်မသာဖြစ်နေသည့် မျက်နှာထားများ ပြလာကြသည်။ အမှန်တရားကို မသိသူများအဖို့ ရက်ရှ်တာက ဤကဲ့သို့ ရဲရဲတင်းတင်း မျက်နှာပြောင်လှတော့ ဘယ်သူ့စကားက အမှန်မှန်း ဝေခွဲရခက်နေပုံပင်။
မင်းသမီး စီယာ့ဇ်က မုန့်ကို ပါးစပ်တွင် ငုံထားရင်း မျက်လုံးကစားနေရသည်နှင့် အလုပ်ရှုပ်နေကာ တူအာနီယာ မြို့စားကတော်က လက်ကိုထောက်၍ အခြေအနေကို အသာလေး ငြိမ်သက်စွာ စောင့်ကြည့်နေလေသည်။
ဤသို့သော အခြေအနေကြားမှာပင် ကျက်သရေရှိတင့်တယ်စွာ တစ်ယောက်တည်း စားသောက်နေသူမှာ ကန္တာရတိုင်းပြည်မှ ရောက်လာသော ခါ့ဖ်မန်း မင်းသားကြီးဖြစ်၏။ ကျန်းမာသော ခါရာမယ်လ်ရောင် အသားအရေနှင့် စူးရှထက်မြက်သော မျက်လုံးရှည်ရှည်ပိုင်ရှင် ခါ့ဖ်မန်း မင်းသားကြီးက လက်ရှိအခြေအနေကို စိတ်ရှုပ်နေသလို မျက်နှာထား တည်တည်ဖြင့် ဇွဲကောင်းကောင်း စားသောက်နေလေသည်။
‘တော်ဝင်မင်းသား ဟိုင်န်ရီရဲ့ စာဖလှယ်ဖော်က ငါပဲဆိုတာကို ရှေ့ထွက်ပြီး ကြေညာလိုက်ရင် ကောင်းမလား...’
ကျွန်မ သူ၏လှုပ်ရှားမှုကို ငေးမောကြည့်ရင်း စဉ်းစားလိုက်သည်။
ဤနေရာတွင် တော်ဝင်မင်းသား ဟိုင်န်ရီဘက်မှ ထောက်ခံလိုက်လျှင် ရက်ရှ်တာသာမက သူ့ဘက်လိုက်ပေးသည့် ဆိုဗီရ်ရှုပါ လူရယ်စရာ ဖြစ်သွားနိုင်ပေသည်။ သို့သော် တော်ဝင်မင်းသား ဟိုင်န်ရီ ရက်ရှ်တာကြောင့် အကျပ်ရိုက်ရသည်ကိုတော့ မကြည့်လိုပေ။
ရက်ရှ်တာ ဆက်တိုက် ကြေညာမောင်းခတ်နေသည့် ယင်းခင်မင်ရင်းနှီးမှုဆိုသည်မှာ ကျွန်မနှင့် တော်ဝင်မင်းသား ဟိုင်န်ရီတို့ 'ကွီးန်' ကို ကြားခံထားပြီး ဖလှယ်ခဲ့သည့်အရာပဲ မဟုတ်ပေဘူးလား။
ထိုစဉ်။ စက်ယန္တရားလို စားသောက်နေသည့် ခါ့ဖ်မန်း မင်းသားကြီးက ဆတ်ခနဲဖြစ်သွားကာ ကျွန်မဘက်သို့ လှည့်ကြည့်လာသည်။ အံ့အားသင့်နေသော မျက်နှာထားပင်။
သူ၏ လှုပ်ရှားမှုကို ငေးကြည့်နေစဉ် မျက်လုံးချင်း ဆုံမိသွားရာ ကျွန်မလည်း အသာလေး ခေါင်းညိတ်ပြလိုက်သည်။
ခါ့ဖ်မန်း မင်းသားကြီးက တုံ့ပြန်မှုမပြုဘဲ ကျွန်မကို စိုက်ကြည့်နေရာမှ ရက်ရှ်တာကို လှည့်ကြည့်ပြီး ထိုမှတစ်ဆင့် တော်ဝင်မင်းသား ဟိုင်န်ရီကို ကြည့်ပြီးနောက် လေသံလို အသံပြုကာ ခပ်သဲ့သဲ့ ရယ်ခဲ့သည်။
'ဘာလို့ အဲ့ဒီလိုလုပ်တာပါလိမ့်။'
သို့ရာတွင် ယခု ခါ့ဖ်မန်း မင်းသားကြီး၏ ထူးဆန်းသောအပြုအမူက ပြဿနာမဟုတ်သေး။
“အသာလေး နေလိုက်ချင်ပေမဲ့... အထင်လွဲစရာတွေ ရှိနေတဲ့ပုံပဲမို့လို့ ကျွန်မကပဲ ရှင်းပြရတော့မယ်ထင်ပါတယ်။”
ကျွန်မ ဘယ်သူ့ဘက်တွင် ရပ်တည်ရမလဲဆိုသည်ကို ဆုံးဖြတ်ပြီးသည့်နောက် ပါးစပ်ဖွင့်လိုက်သည်။
လူတိုင်း၏ အကြည့်များက ကျွန်မထံသို့ တစ်ဖန် ပြန်ရောက်လာကြ၏။
အခြေအနေများက လုံးလည်ချာလည်လိုက်နေသော်လည်း သူတို့က စိတ်ဝင်တစားနှင့် သဘောတွေ့နေကြပုံပင်။
ရက်ရှ်တာတစ်ယောက်တည်းသာ မျက်လုံးအဝိုင်းသားနှင့် ကျွန်မကို စိုက်ကြည့်နေသည်။
ခဏတွင်းချင်းမှာပင် သူက ကျွန်မကို စာဖလှယ်ဖော်မှန်း သိနေသည်ဟု ခံစားလိုက်ရ၏။
ဘယ်ရ်ဒီ ဗိုင်းကောင့်ကတော်ထံမှ စာပါအကြောင်းအရာများကို ကြားခဲ့ရသည်ဆိုလျှင် ကျွန်မကို စာဖလှယ်ဖော်မှန်း မကြားဘဲနေစရာ အကြောင်းမရှိပေ။
ဤသည်က အင်မတန် ထူးဆန်းသည့် ခံစားချက်ပင်။
သို့ဆိုလျှင် ရက်ရှ်တာက ကျွန်မရှေ့၌ ကျွန်မဟန်ဆောင်နေသော်လည်း ကျွန်မက ဆက်လက်ပြီး ငြိမ်နေမည်ဟု ယူဆထားခြင်းပေပဲလား။
မည်သို့သော အကြောင်းပြချက်မျိုးနှင့်များ ကျွန်မက သူ့အတွက် နှုတ်ဆိတ်ပေးလိမ့်မည်ဟု ယုံကြည်နေမှန်း နားမလည်နိုင်ခဲ့။
မည်သို့ပင်ဆိုစေ ကျွန်မက အတတ်နိုင်ဆုံး မတုန်မလှုပ် မျက်နှာထားကိုထိန်းရင်း ဆိုဗီရ်ရှုကို ပြောလိုက်သည်။
“အရှင်ဧကရာဇ်။ တော်ဝင်မင်းသား ဟိုင်န်ရီနဲ့ စာပေးစာယူလုပ်နေတဲ့သူက ဘယ်သူမှန်း ကျွန်မ သိပါတယ်။...လေဒီ ရက်ရှ်တာတော့ မဟုတ်ပါဘူး။”
တော်ဝင်မင်းသား ဟိုင်န်ရီ၏ မျက်နှာက ဝင်းပသွားသည်။
တစ်ဖက်တွင်တော့ ရက်ရှ်တာက သစ္စာဖောက်ခံရသလို မျက်နှာမျိုးနှင့် ကျွန်မကို စိုက်ကြည့်နေကာ ဆိုဗီရ်ရှု၏ မျက်နှာကလည်း ဖြူဖျော့သွားတော့၏။
“ဧကရီ။”
သူက အသံနိမ့်နိမ့်ဖြင့် ကျွန်မကို ခေါ်လိုက်သည်။
“ဧကရီ ဝင်ပါရမဲ့ ကိစ္စမဟုတ်ဘူး။ ဧကရီက ရက်ရှ်တာကို သဘောမကျဘူးဆိုရင်တောင် တော်ဝင်မင်းသား ဟိုင်န်ရီဘက်ကနေ မဖြစ်မနေ ဝင်ပြီးရပ်တည်ပေးစရာ မလိုဘူးလို့။”
“အမှန်တရားဘက်ကနေ ရပ်တည်ရုံပါ။”
ကျွန်မ စကားဆုံးသည်နှင့် တော်ဝင်မင်းသား ဟိုင်န်ရီက ခနဲ့တဲ့တဲ့ ပြောလေသည်။
“ဧကရီ အရှင်မ။ ဒီနေရာမှာ အရှင်ဧကရာဇ်ရဲ့ 'အမှန်တရား' နဲ့ 'အဖြစ်မှန်' ဆိုတာတွေက အကုန် လေဒီ ရက်ရှ်တာရဲ့ ပါးစပ်ကနေ ထွက်လာတာတွေချည်း ဖြစ်နေပုံပဲဆိုတော့ ဧကရီ အရှင်မလည်း တော်တော်လေး စိတ်ကျဉ်းကျပ်ရမှာပဲနော်။”
ထိုစကားက ဆိုဗီရ်ရှု၏ နောက်ဆုံးလက်ကျန် သည်းခံနိုင်စွမ်းကို သွားဆွလိုက်သည့်ပုံပင်။
“ဒီထက်ပိုပြီး သည်းမခံနိုင်တော့ဘူး။”
ဆိုဗီရ်ရှုက မာန်မဲသံပေးရင်း နေရာမှထရပ်ကာ ဓားကို ဆွဲထုတ်လိုက်သည်။
တကယ့် စစ်မြေပြင်တွင် အသုံးမပြုနိုင်သော အလှဆင်ပစ္စည်းသာသာ ဓားဖြစ်သော်လည်း ခုခံမှုမရှိသည့် လူတစ်ယောက်ကို ထိခိုက်နာကျင်အောင် လုပ်ရန်တော့ လုံလောက်သည့် လက်နက်ပင်။
ချက်ချင်းဆိုသလို အခန်းထဲမှ အငွေ့အသက်သည်လည်း ပြင်းထန်စူးရှလာတော့သည်။
“တော်ဝင်မင်းသား ဟိုင်န်ရီ။ ကျုပ်အမျိုးသမီးရဲ့ ဂုဏ်သိက္ခာကို ညှိုးနွမ်းစေတဲ့ ခင်ဗျားကို စီးချင်းထိုးဖို့ စိန်ခေါ်တယ်။”
“ဒီနေရာမှာ ကျွန်တော်က အရှင်ဧကရာဇ်ကို သတ်လိုက်ရင်တောင် ဘေးကင်းလုံခြုံစွာနဲ့ ထွက်သွားနိုင်မှာလားဗျ။ အဲ့ဒီလိုဆိုရင်တော့ အဲ့ဒီစိန်ခေါ်မှုကို လက်ခံပါ့မယ်။”
~~~~
Miel's Translations