အပိုင်း ၂၁ (ကောလာဟလ)
ချစ်သူကို နှစ်သစ်ကူးပွဲတော်တက်ဖို့ ဖိတ်သတဲ့လား။
ချစ်သူဖြစ်နေသဖြင့် နှစ်သစ်ကူးပွဲတော်သို့ တက်ရောက်၍မရခြင်းမျိုး မဟုတ်ပေ။
သို့ရာတွင် နှစ်သစ်ကူးပွဲတော်သို့ ချစ်သူများ တက်ရောက်ခြင်းမှာ ချစ်သူဟူသော အဆင့်အတန်းအရိုက်အရာမဟုတ်လျှင်ပင် နှစ်သစ်ကူးပွဲတော်သို့ တက်ရောက်နိုင်သည့် အဆင့်အတန်းအရိုက်အရာမျိုးရှိသည့်အခါမှသာ ဖြစ်လေ့ဖြစ်ထရှိ၏။
အဆင့်အတန်းနိမ့်ပါးသော ချစ်သူကို ရထားသည့် ဧကရာဇ်များက သူတို့၏ချစ်သူများကို အခြားမှူးမတ်အနွယ်တော်များနှင့် ဟန်ပြလက်ထပ်ပေးကာ နယ်စားကတော်တို့၊ မားကီးစ်ကတော်တို့အဖြစ် ပြောင်းလဲပေးရသည့် အကြောင်းရင်းကား ဤအချက်ကြောင့်ပင်။
သို့ရာတွင် ဆိုဗီရ်ရှုက ထိုကဲ့သို့ အပေါ်ယံဖုံးဖိမှုမျှပင်မလုပ်ဘဲ သူ့ချစ်သူကို နှစ်သစ်ကူးပွဲတော်သို့ ဖိတ်ခဲ့၏။
ရက်ရှ်တာကို ဤနေရာတွင် တွေ့ရလိမ့်မည်ဟု ထင်မှတ်မထားသဖြင့် အံ့အားသင့်သွားရသည်။
ကျွန်မ ဘေးဘက်သို့ ခေါင်းလှည့်လိုက်၏။
အံ့အားသင့်သွားသူက ကျွန်မတစ်ယောက်တည်းသာ။
ဆိုဗီရ်ရှုကတော့ ရက်ရှ်တာကို ပြုံးပြရင်း ခေါင်းညိတ်ပြနေသည်။
ရက်ရှ်တာကို ပြန်ကြည့်လိုက်တော့ သူက ဝတ်ထားသည့် ဂါဝန်ကို ကိုးရိုးကားရား ပင့်ထားရင်း ဆိုဗီရ်ရှုကို ကြည့်ကာ 'ဒါက ခက်ပါတယ်' ဟု အသံမထွက်ဘဲ နှုတ်ခမ်းဖြင့်ပြောခဲ့သည်။
ထို့နောက်တွင် ရက်ရှ်တာက ကျွန်မကို တွေ့သွားတော့၏။
မျက်လုံးချင်းဆုံတော့ သူက ပြုံးလိုက်ရင်း 'မမ' ဟုခေါ်ဟန်ပင် လုပ်ခဲ့သေးသည်။
ဆတ်ခနဲဖြစ်သွားတော့ သူက လန့်သွားသလိုမျက်နှာထားလေးနှင့် သူ့ပါးစပ်သူပုတ်ကာ တောင်းပန်သလို ချစ်စရာကောင်းစွာ ရယ်လိုက်၏။
"ဟုတ်ပါရဲ့၊ အူတူတူလေးဆိုတော့။"
ဆိုဗီရ်ရှုက ထိုသို့သော ရက်ရှ်တာကို အင်မတန် ချစ်ဖို့ကောင်းလိုက်လေခြင်းဟူသော အသံဖြင့် ရယ်ခဲ့သည်။
နှလုံးသားက ပျက်စီးသွားသလို ခံစားချက်မျိုး ဝင်လာ၏။
ကျိန်းသေပေါက် သူ့ဇနီးက ကျွန်မပင်။ သို့သော် ကျွန်မက သူတို့နှစ်ယောက်၏ ပတ်သက်မှုကြားသို့ ဝင်မိသော သူစိမ်းပြင်ပြင်အရာတစ်ခု ဖြစ်သွားသလို ခံစားလိုက်ရသည်။
ပထမတွင် ကျွန်မတို့ကို ဂါရဝပြုနေကြသူများကလည်း ယခုတော့ ဆိုဗီရ်ရှုနှင့် ရက်ရှ်တာကို တစ်လှည့်စီ ကြည့်နေကြပေပြီ။
အမျိုးသမီးများက ယပ်တောင်ဖြင့် ပါးစပ်ကိုအုပ်ကာ၊ အမျိုးသားများက လက် သို့မဟုတ် လက်အိတ်များဖြင့် ပါးစပ်ကိုကွယ်ကာ တစ်ယောက်နှင့်တစ်ယောက် တီးတိုးပြောကုန်ကြတော့သည်။
တစ်ယောက်ချင်းစီ၏ အသံက တိုးတိတ်သော်လည်း အကုန်ပေါင်းလိုက်တော့ အင်မတန် ကျယ်လောင်သည့်အသံဖြစ်လာ၏။
ရက်ရှ်တာလည်း လန့်သွားကာ ပတ်ပတ်လည်ကို ကြည့်လိုက်ပြီး ကြောက်ရွံ့တကြီး မျက်နှာလေးနှင့် ဆိုဗီရ်ရှုကို မော့ကြည့်လာသည်။
ဆိုဗီရ်ရှုက သက်ပြင်းတစ်ချက်ချပြီး ကျွန်မကို မေးလာ၏။
"ဧကရီ တစ်ယောက်တည်း ဆင်းသွားလို့ရမလား။"
နှစ်ယောက်အတူ ယှဉ်တွဲကာ ဝင်လာခဲ့သဖြင့် သူ ကျွန်မနှင့်အတူ ဆောင်ရွက်ရမည့် တာဝန်က ပြီးဆုံးသွားပေပြီ။ တစ်ယောက်တည်း ဆင်းသွားလည်း အဆင်ပြေသည်ဟုတွေးလိုက်၏။
သို့ရာတွင် ဤနေရာအထိ အတူတူ ဝင်လာပြီးပြီဆိုလျှင် လှေကားကိုလည်း အတူတူဆင်းမှ သဘာဝကျပေမည်။ ဤနေရာတွင် တစ်ယောက်တစ်လမ်း သီးခြားသွားလိုက်ပါက 'ကျွန်မတို့က အတင်းကြိတ်မှိတ်ပြီး အတူတူလာခဲ့တာပါ' ဟု ပြသလိုက်သလို လုပ်ရပ်တစ်ခုထက်ပိုမည်မဟုတ်ပေ။
ကျွန်မ အတင်းဖျစ်ညှစ်ကာ ပါးစပ်ဖွင့်လိုက်သည်။
"....အတူတူဆင်းသွားမှ ဖြစ်ပါမယ်။"
ကိုယ်ကို ဘေးဘက်သို့ အနည်းငယ်လှည့်ထားသော ဆိုဗီရ်ရှုက အံ့ဩသလိုပုံစံနှင့် ကျွန်မကို ကြည့်လာသည်။
ကျွန်မလည်း အတတ်နိုင်ဆုံး တည်တည်ငြိမ်ငြိမ် ပြန်ဖြေလိုက်၏။
"တိုင်းတစ်ပါးက ထိပ်တန်း မှူးမတ်အနွယ်တော်တွေ အများကြီးရှိနေတာပါ။ ဒီနေရာမှာ တစ်ယောက်တစ်လမ်း ခွဲသွားလိုက်ရင် အရှင်ဧကရာဇ်နဲ့ ကျွန်မ ရန်ဖြစ်ထားတဲ့ပုံပေါ်နေပါလိမ့်မယ်။"
"..."
"တော်ဝင်ဇနီးမောင်နှံရဲ့ မသင့်မြတ်မှုက အိမ်နီးချင်းတိုင်းပြည်တွေအတွက် ရယ်စရာဖြစ်နိုင်သလို ရန်သူတိုင်းပြည်တွေအတွက်တော့ တိုက်ခိုက်ရလွယ်တဲ့ အားနည်းချက်တစ်ခု ဖြစ်သွားနိုင်ပါတယ်။ ဆက်ဆံရေးကောင်းတဲ့ ဇနီးမောင်နှံလို ဟန်ဆောင်စရာမလိုပေမဲ့ ဆက်ဆံရေး မကောင်းဘူးဆိုတာကိုတော့ မပြသင့်ပါဘူး။"
ဆိုဗီရ်ရှု၏ မျက်နှာထားက မသိမသာ ပျက်ယွင်းသွားသည်။
"အာ၊ ဟုတ်သားပဲ။ အဲ့ဒီလိုဖြစ်သွားမှာပေါ့။"
ကျွန်မစကားကို ယုံကြည်ခြင်းထက် ဆင်ခြေတစ်ခုဟု လက်ခံလိုက်ပုံပင်။
သူက အနည်းငယ် မချင့်မရဲပြုံးလိုက်ကာ ကျွန်မဆီသို့ လက်ကမ်းလင့်ခဲ့သည်။
"ဒါဆို အတူတူဆင်းကြတာပေါ့။"
ကျွန်မကို စောင့်ကြပ်တွဲခေါ်ရင်း လှေကားမှ ဆင်းလာသည့် ဆိုဗီရ်ရှုက လူများရှိရာဘက်သို့ ပေါ့ပေါ့ပါးပါး မျက်လုံးဖြင့်နှုတ်ဆက်ပြီး လျှောက်လာခဲ့ရာမှ သင့်တော်သည့် နေရာသို့အရောက်တွင် ကျွန်မကို ပြန်ကြည့်ခဲ့သည်။
လက်ကိုဖယ်လိုက်တော့ သူက နူးညံ့စွာပြုံးရင်း သူ့လက်ကို အောက်ချလိုက်၏။
"ဒီလောက်ဆိုရင် ရပြီလား။"
"ဟုတ်ကဲ့။"
ဆိုဗီရ်ရှုက သူ့တာဝန် ပြီးဆုံးသွားသည့်အလား တစ်ချက်လေးပင် နောက်သို့ပြန်မကြည့်ဘဲ ရက်ရှ်တာ့ထံသို့ သွားလေတော့သည်။
ကျွန်မလည်း တစ်ယောက်တည်း ရပ်ကျန်ခဲ့သည့်အတိုင်း ထိုနေရာဘက်ကို ငေးကြည့်နေမိ၏။
ရက်ရှ်တာ၏ဘေးတွင် ဝိုင်းရံနေကြသော တိုင်းတစ်ပါးသား မှူးမတ်အနွယ်တော်တို့က ပြုံးပြုံးရယ်ရယ်နှင့် ဆိုဗီရ်ရှုကို ကြိုဆိုခဲ့ကြသည်။ သူတို့ အနည်းငယ်နောက်ဆုတ်ကာ နေရာပေးလိုက်တော့ ရက်ရှ်တာက အလျှင်မြန်ပင် လက်နှစ်ဖက်ကို ဆန့်တန်းကာ ဆိုဗီရ်ရှုကို ပွေ့ဖက်လေတော့၏။
ဘယ်သူကြည့်ကြည့် မလွဲမသွေ ချစ်စရာကောင်းသည့် ချစ်သူစုံတွဲလိုပင်...။
ကျွန်မလည်း ဖယ်ခွာနိုင်ခြင်းမရှိသည့် အကြည့်ကို ဘေးဘက်သို့ အတင်းအကျပ် လွှဲလိုက်သည်။
နာကျင်နေကြောင်းမပြဘဲ ပုံမှန်အတိုင်း အသာလေး ပြုံးလိုက်ကာ အနီးအနားရှိ တူအာနီယာ မြို့စားကတော်ကို နှုတ်ဆက်လိုက်၏။
"ဒီနှစ် နှစ်သစ်ကူးပွဲတော်ကိုလည်း ဧကရီအရှင်မကပဲ စီစဉ်ခဲ့တာဆိုရှင့်။ တကယ်ကို အံ့ဩဖို့ကောင်းပါတယ်။"
တူအာနီယာ မြို့စားကတော်က အကင်းပါးလှစွာပင် ဆိုဗီရ်ရှုနှင့် ရက်ရှ်တာ့အကြောင်း လုံးဝမပြောဘဲ ဖော်ရွေစွာ ချဉ်းကပ်လာသည်။
ခဏနေတော့ မှူးမတ်ကတော်များနှင့် သခင်မလေးများ တစ်ယောက်ပြီးတစ်ယောက် ကျွန်မဆီသို့ လျှောက်လာကုန်ပြီး ကျွန်မတို့တွေ ပေါ့ပေါ့ပါးပါး စကားလက်ဆုံကျရင်း လမ်းလျှောက်ခဲ့ကြ၏။
"ဘုရားရေ၊ ဟိုကို ကြည့်ပါဦး။"
"အဲ့ဒီပုဂ္ဂိုလ်က တော်ဝင်မင်းသား ဟိုင်န်ရီဆိုတာလေ။"
"တအားကို မိန်းမလိုက်စားတယ်ဆို။ ဟုတ်လည်းဟုတ်ပါရဲ့။ တကယ်ကိုလှတဲ့ မျက်နှာပဲမဟုတ်လားရှင့်။"
"ကောလာဟလအရဆိုရင် အန္တရာယ်ရှိတဲ့ ပင်လယ်ဓားပြတွေနဲ့လည်း ပေါင်းတယ်ဆိုပဲ..."
ရက်ရှ်တာနှင့် ဆိုဗီရ်ရှုအကြောင်း စကားဝိုင်းကို ရှောင်ပေးခဲ့ကြသဖြင့် ပြောဖြစ်သည့် စကားအများစုက တော်ဝင်မင်းသား ဟိုင်န်ရီအကြောင်းများ ဖြစ်နေခဲ့သည်။
"ဘယ်နေရာပဲသွားသွား ကောလာဟလတွေ ဖန်တီးတဲ့သူဆိုတော့ ဒီတစ်ခေါက်လည်း တစ်ယောက်ယောက်နဲ့ အချစ်ဇာတ်လမ်းလေးဖန်တီးပြီးမှ ပြန်မှာပေါ့နော်။"
"မီးနဲ့ကစားဖော်ကစားဖက်က ဘယ်သူများဖြစ်လာမှာပါလိမ့်။"
"တော်ဝင်မင်းသား ဟိုင်န်ရီဆိုရင် လူပျိုလူလွတ်ဆိုတော့... မီးနဲ့ကစားရုံလေးတင် အဆုံးသတ်သွားမှာ မဟုတ်တာမျိုးလည်း ဖြစ်လာမလားမသိဘူးနော်။"
"ဟုတ်ပါရဲ့။ နောင်တစ်ချိန် အနောက်တိုင်းပြည်ရဲ့ ဘုရင်ဖြစ်လာမဲ့ပုဂ္ဂိုလ်ဆိုတော့ ကျွန်မတို့ အရှေ့အင်ပါယာသူနဲ့ လက်ဆက်ထိမ်းမြားတာကလည်း အကူအညီဖြစ်လာနိုင်တာပဲလေ။"
"ဒါပေမဲ့ ဒီလို ကောလာဟလတွေ အရမ်းထွက်တဲ့လူက အခုအချိန်ထိ တိတ်တိတ်ဆိတ်ဆိတ်ပဲ နေနေသေးတယ်ဆိုတော့..."
ကျွန်မ တော်ဝင်မင်းသား ဟိုင်န်ရီအကြောင်း နားထောင်နေရင်း ဖြတ်သွားသည့် အစေခံတစ်ယောက်ထံမှ ရှမ်ပိန်တစ်ခွက် ယူလိုက်သည်။
အရက်ပါဝင်မှုအနည်းဆုံး ရှမ်ပိန်ဖြစ်၍ တကယ်တမ်းတွင် အချိုရည်နှင့် သိပ်မကွာပေ။
ရှမ်ပိန်ခွက်ကို နှုတ်ခမ်းနားတေ့ကာ အပေါ်သို့ အနည်းငယ် ပင့်လိုက်တော့ ခေါင်းကလည်း သဘာဝကျကျ မော့သွား၏။
ဖန်ခွက်ကြည်ကြည်လေးထဲမှ ရှမ်ပိန် အနေအထားပြောင်းသွားတော့ ဖန်ခွက်တစ်ဖက်ခြမ်းတွင် ရပ်နေသူ၏ ပုံစံက ဖန်ခွက်အနောက်မှ ပေါ်လာသည်။
ဒီဘက်သို့ စိုက်ကြည့်နေသော တော်ဝင်မင်းသား ဟိုင်န်ရီပင်။
ကျွန်မ ဖန်ခွက်ကို အောက်ချပြီး နှုတ်ခမ်းမှ ခွာလိုက်သည်။
မျက်စိမှားတာပဲလားဟု တွေးခဲ့သော်လည်း သူ ဒီဘက်ကို ကြည့်နေခြင်းက တကယ်ဖြစ်နေ၏။
မျက်လုံးချင်းဆုံသွားသော်လည်း သူက တစ်ဖက်လှည့်ပြီး အကြည့်ကို ရှောင်မသွားပေ။
ထိုအစား သူ့လက်ထဲတွင် ကိုင်ထားသည့် ဖန်ခွက်ရှည်ရှည်ကို မြှောက်ပြခဲ့သည်။
ထို့နောက် ခွက်ချင်းတိုက်သည့်ပုံစံမျိုးလုပ်ပြကာ ဖန်ခွက်ကို သူ့ပါးစပ်နားသို့ ကပ်လိုက်၏။
ခေါင်းကို ဘေးဘက်သို့ စောင်းထားသဖြင့် ခေါင်းမော့လိုက်သည့်အခါ ထွင်းထုပုံဖော်ထားသည့်အလား သူ၏ ဘေးဘက်မျက်နှာက ပေါ်လာတော့သည်။
တော်ဝင်မင်းသား ဟိုင်န်ရီ၏ ဘေးတွင်ရှိနေသော တိုင်းတစ်ပါးသား မှူးမတ်တစ်ယောက်က ဒီဘက်သို့ ခေါင်းလှည့်လာသဖြင့် ကျွန်မလည်း သူ့ထံမှ အကြည့်ကို မြန်မြန်လွှဲလိုက်၏။
ထိုအချိန်မှာပင်။
"ဘယ်လောက်ပဲ ကြီးကျယ်မြင့်မြတ်လှပါတယ်ဆိုတဲ့ ဧကရီဖြစ်နေပါစေ၊ ဧကရာဇ်ရဲ့ အရိပ်အကဲကို ကြည့်ရတာကတော့ ဘယ်လိုမှမတတ်သာဘူးပေါ့။"
ဘယ်ကမှန်းမသိ ရယ်သံစွက်နေသော အသံတစ်သံ ထွက်လာသည်။
ချက်ချင်းပင် နှလုံးသားက အောက်သို့ နင့်ခနဲကျသွားသလို ခံစားလိုက်ရ၏။
ကျွန်မ မသိစိတ်ဖြင့် အသံလာရာဆီသို့ လှည့်ကြည့်လိုက်မိသည်။
နံရံနှင့်ကပ်လျက် ထိုင်ခုံများတွင် ပြည်တွင်းပြည်ပမှ မှူးမတ်အနွယ်တော်များ ရောနှောလျက် ထိုင်နေကြ၏။
လူများလွန်းသဖြင့် ဘယ်သူပြောလိုက်မှန်း မသိသော်လည်း သူတို့အချင်းချင်းတော့ သိကြပေလိမ့်မည်။
ထို့အပြင် သူတို့က ယင်းမှတ်ချက်ကို အင်မတန် ရယ်စရာကောင်းသည်ဟု ထင်နေပုံရကာ ဗိုက်နှိပ်ပြီး ရယ်နေကြသည်။
ရှင်းရှင်းလင်းလင်း မကြားရသော်လည်း စောစောက ထိုစကားပြောခဲ့သောလူက နောက်တစ်ခါ ဘာထပ်ပြောလိုက်သည်မသိ ထို့နောက်တွင် ရယ်သံက ပိုကျယ်လာတော့၏။
တဟီးဟီး ရယ်နေကြသူများထဲတွင် အချို့က ကျွန်မဘက်သို့ စွေစောင်းကြည့်ခဲ့ကြပြီး ကျွန်မနှင့် မျက်လုံးချင်းဆုံသွားတော့ ချက်ချင်းပင် တစ်ယောက်ကို တစ်ယောက် တံတောင်နှင့်တွတ်ကာ တိတ်တိတ်နေရန် အချက်ပြလိုက်ကြသည်။
သူတို့၏ တုံ့ပြန်မှုကြောင့် ကျွန်မအကြောင်းပြောနေကြတာ သေချာမှန်း ယုံကြည်သွား၏။
သူတို့ ဘာတွေပြောနေကြမှန်း နားထောင်ရမည်ဟု ကျွန်မ တွေးလိုက်သည်။
သို့သော် အဖြေကို ထိုမျှအထိ ရှည်ရှည်ဝေးဝေးလိုက်ရှာရန် မလိုအပ်ခဲ့။
"ဟို... ဒါနဲ့လေ ဧကရီအရှင်မ။ 'အဲ့ဒီမိန်းမ' ကို တကယ်ပဲ လက်ဆောင် ပို့ပေးခဲ့တာလားရှင့်။"
စောစောကတည်းက ကျွန်မကို ပြောစရာရှိနေသည့်အလား ချီတုံချတုံဖြစ်နေသည့် မှူးမတ်ကတော်တစ်ယောက်၏ မေးခွန်းကြောင့်ပင်။
"လက်ဆောင်တဲ့လား။"
အလိုလို စူးရှသောအသံ ထွက်လာသည်။
မှူးမတ်ကတော်က မျက်နှာနီရဲသွားကာ "တောင်းပန်ပါတယ်" ဟု ပြောလာ၏။
ကျွန်မလိုချင်သည့်အရာက တောင်းပန်စကားမဟုတ်။
"တကယ် ဘာကိစ္စမှန်းမသိလို့ မေးကြည့်တာပါ။ ဒေါသထွက်နေတာ မဟုတ်ပါဘူး။ လက်ဆောင်ဆိုတာက ဘာစကားလဲရှင့်။"
ကျွန်မ အသံကို ပုံမှန်အတိုင်းဖြစ်အောင် ဖျစ်ညှစ် ဟန်ဆောင်ပြီး မေးလိုက်တော့ မှူးမတ်ကတော်က စိုးရိမ်သည့်ပုံစံနှင့် စကားစခဲ့သည်။
"တိုင်းတစ်ပါးသား ဧည့်သည်တွေက 'အဲ့ဒီမိန်းမ' အကြောင်း ထွက်နေတဲ့ ကောလာဟလတွေကို မသိဘူးမဟုတ်လားရှင့်။ အရှင်ဧကရာဇ် ပထမဆုံးတော်ကောက်ခဲ့တဲ့ ချစ်သူဆိုပြီး လက်ဆောင်တွေ အမျိုးမျိုးပေးကြ၊ သွားတွေ့ကြ လုပ်နေတယ်လို့ ပြောပါတယ်။"
ထိုအကြောင်းအရာက အစီရင်ခံစာရထားပြီးသားကိစ္စပင်။
'ဒါပေမဲ့ အဲ့ဒါက ဘာလို့ ရုတ်တရက် ငါ့လက်ဆောင် ဖြစ်သွားရတာလဲ။'
"အဲ့ဒီတုန်းက တိုင်းတစ်ပါးသားတစ်ယောက်က ဟို... "
"ရပါတယ်။ ပြောပါ။"
"တိုင်းတစ်ပါးသားတစ်ယောက်က ဧကရီအရှင်မနဲ့ သုံးပွင့်ဆိုင်အချစ်ဇာတ်လမ်းဖြစ်နေတာ အဆင်ပြေရဲ့လားဆိုပြီး မေးတော့ 'အဲ့ဒီမိန်းမ' က အဲ့ဒီလို ပြောလိုက်တာထင်ပါတယ်။ ဧကရာဇ်နဲ့ ဧကရီအရှင်မက သူ့ကို ချစ်ကြပါတယ်၊ ဧကရီအရှင်မက 'အဲ့ဒီမိန်းမ' ချစ်သူ ဖြစ်လာတော့ ကြိုဆိုတဲ့အနေနဲ့ အဖိုးတန်လက်ဆောင်မျိုးစုံ ပို့ပေးခဲ့ပါတယ်ဆိုပြီးတော့လေ... "
တိုင်းတစ်ပါးသားများနှင့် ပြောခဲ့သည့်စကားဆိုလျှင် လတ်တလောဖြစ်သည့်ကိစ္စ မဟုတ်ပေ။
တစ်ဖန် လူမှုရေးအသိုင်းအဝိုင်းထဲတွင် ကျယ်ကျယ်ပြန့်ပြန့် ပျံ့နှံ့နေသည့် စကားလည်း မဟုတ်သည့်အလား အနားတွင်ရှိနေသည့် မှူးမတ်အနွယ်တော် အမျိုးသမီးအများစုကလည်း အံ့ဩတကြီး မျက်နှာထားများ ဖြစ်နေကြ၏။
ထိုသို့သောစကားကို တိုင်းတစ်ပါးသားများက ပြည်တွင်းမှ မှူးမတ်အနွယ်တော်များဆီသို့ တစ်ဆင့်ပြန်ပြီးကောလာဟလ ဖြန့်နေကြသည်။
ခြေထောက်အောက်မှကြမ်းပြင် ပျောက်ကွယ်သွားသလို ခံစားလိုက်ရကာ မျက်လုံးများလည်း ဝေဝါးလာတော့၏။
လူတို့က ကျွန်မအား ဆိုဗီရ်ရှု၏ အရိပ်အကဲကို ကြည့်နေရသဖြင့် ခင်ပွန်း၏ ချစ်သူထံသို့ လက်ဆောင်များ ပို့နေသည်ဟု လှောင်ရယ်နေကြသည်။
အတင်းဖျစ်ညှစ်ကာ စုစည်းထိန်းသိမ်းထားခဲ့သည့် ကျွန်မ၏ မာနသည်လည်း ကောလာဟလတစ်ခုကြောင့် ခဏတွင်းချင်းမှာပင် သဲပုံရဲတိုက်အလား ပြိုလဲသွားရတော့၏။
တမင်ပင် ဆိုဗီရ်ရှုနှင့် ရက်ရှ်တာတို့ကြားတွင် ဝင်မပါရန် စည်းသားကန့်သတ်ထားခဲ့သော်လည်း။
ကျွန်မ၏ ဆန္ဒနှင့်ရော လုပ်ရပ်နှင့်ပါ လုံးဝမသက်ဆိုင်ဘဲ ကျွန်မက ခင်ပွန်း၏ ချစ်သူထံတွင် မျက်နှာသာရအောင် ကြိုးစားပြီးကပ်ဖားနေရသည့် အောက်ကျသူ ဖြစ်နေလေသည်။
"မဟုတ်ပါဘူး။"
ပြတ်ပြတ်သားသား ပြောလိုက်သော်လည်း ကောလာဟလများက ထိန်းမနိုင်သိမ်းမရ ပျံ့နှံ့သွားမည်မှာ ကျိန်းသေလှ၏။
ကျွန်မ ရှမ်ပိန်ခွက်ကို ကျစ်ကျစ်ပါအောင် ဆုပ်ကိုင်ကာ ခြေထောက်တွင် အားတင်းထားလိုက်သည်။ မျက်လုံးများက ဝေဝါးနေ၏။ ဤအခမ်းအနားကို လွှတ်ချကာ အနောက်နန်းဆောင်သို့ ပြန်သွားခြင်းသော်လည်းကောင်း၊ မဟုတ်ဘူးဟု အော်ဟစ်ခြင်းသော်လည်းကောင်း လုပ်ချင်စိတ်များ ပေါ်လာသော်လည်း ဤနေရာတွင် တုန်လှုပ်နေသည့်ပုံစံကို ပြ၍မဖြစ်ပေ။
"လေဒီ ရက်ရှ်တာက တစ်ခုခုကို နားလည်မှုလွဲနေတယ်ထင်ပါရဲ့။"
တည်ငြိမ်သည့်ပုံစံနှင့်ပြောကာ ရွှန်းရွှန်းစားစား ပြုံးလိုက်တော့ မှူးမတ်ကတော်များက 'ဟုတ်လားရှင့်' ဟု ပြောနေသလို မျက်နှာများနှင့် ခေါင်းညိတ်ခဲ့ကြသည်။ သို့သော် သူတို့စိတ်ထဲတွင် ယုံကြည်ခြင်းရှိမရှိဆိုသည်ကိုတော့ မသိနိုင်ပေ။ လူဆိုသည်မှာ ကောလာဟလကြောင့် နစ်နာမည့်သူ၏ စကားကို ဆင်ခြေဟု သတ်မှတ်လေ့ရှိသောကြောင့်ပင်။
သူတို့နှင့် တတ်နိုင်သမျှ မပတ်သက်မိအောင် ကျွန်မ ကြိုးစားခဲ့သော်လည်း ယခုလိုဖြစ်လာတော့ မတတ်နိုင်ပေ။ နောက်မှ ရက်ရှ်တာကို ကိုယ်တိုင်ခေါ်တွေ့ကာ ပါးစပ်ပိတ်ခိုင်းရုံသာရှိတော့၏။
ကျွန်မ သက်ပြင်းတစ်ချက်ချလိုက်ပြီး ရှမ်ပိန်တစ်ဝက်ကျော် ကျန်နေသေးသော ဖန်ခွက်ကို အစေခံအား ယူသွားခိုင်းလိုက်သည်။
"ဟော၊ အခု ကရတော့မယ် ထင်တယ်။"
ဖျစ်ညှစ်ပြီးတော့ပဲဖြစ်ဖြစ် ပြုံးပြရမလားဟု တွေးနေတုန်းစဉ် တူအာနီယာ မြို့စားကတော်က ပြောလာသည်။
သူစကားအတိုင်း သာယာငြိမ့်ငြောင်းသည့် တေးသွားကို တီးခတ်နေကြသော ဂီတပညာရှင်များက တေးသွားကို ခေတ္တရပ်ကာ စကားပြောနေကြ၏။ စန္ဒယားတီးသူနှင့် တယောတီးသူတို့က စာရွက်များကို တစ်လှည့်စီ လှန်ကြည့်ရင်း တစ်ခုခု ပြောနေကြသည်။
ပါတီတွင် ကခုန်သည့်အခါ မဖြစ်မနေ လိုက်နာရမည့်စည်းမျဉ်းက တစ်ခုသာရှိ၏။ ယင်းမှာ တွဲကဖော်တစ်ဦးတည်းနှင့် နှစ်ကြိမ်ဆက်တိုက် က၍မဖြစ်သောစည်းမျဉ်းပင်။
ထိုစည်းမျဉ်းကြောင့် ပါတီပွဲတက်သည့်အခါ တွဲကဖော်များစွာနှင့် ကခုန်နိုင်သော်လည်း မည်သို့ပင်ဆိုစေ ပထမဆုံး တွဲကဖော်ကတော့ အနည်းငယ်ပို၍ အဓိပ္ပာယ်လေးနက်မှုရှိပေသည်။
~~~~
Miel's Translations