အခန်း (၈) - ယဲ့ယောင်းက သွားချိန်းတွေ့နေတယ်...

ယဲ့ယောင်း သံပုရာရည်ဝယ်ပြီး ပြန်လာချိန်တွင် လုရွှင်က ပုံမှန်အတိုင်းပြန်ဖြစ်သွားပုံရ၍ အလွန်စိတ်သက်သာရာရသွားသည်။

ယဲ့ယောင်းက လုရွှင်၏ လက်မှ စျေးဝယ်အိတ်ကို လုယူရန် ကြိုးစားသော်လည်း လုရွှင်က ၎င်းကို သယ်ဆောင်ခွင့်မပြုပေ။ တစ်ချိန်တည်းမှာပင် လုရွှင်က သံပရာရည်ကို ကိုင်ထားပြီး ယဲ့ယောင်း ကိုလည်း လက်ဆွဲချင်နေ၍ တတိယလက်ရှိလာစေရန်ပင် အမှန်ဆန္ဒရှိခဲ့သည်။

အဆုံးတွင် လုရွှင်က လက်တစ်ဖက်ဖြင့် စျေးဝယ်အိတ်နှင့် သံပရာရည်ကို ကိုင်ထားလိုက်ပြီး ယဲ့ယောင်း၏ ပခုံးကို နောက်တစ်ဖက်နှင့် ဖက်ကာ ကျေနပ်စွာ ပြန်သွားလိုက်သည်။

"ဒီညမှာ ဒဏ်ရာရနေတဲ့ ငါ့နှလုံးသားကို နှစ်သိမ့်ဖို့နဲ့ အပန်းဖြေဖို့ တစ်ခုခုလုပ်သင့်တယ်"

လုရွှင်က ပြောလိုက်သည်။

“အာ...”

ယဲ့ယောင်းက လုရွှင်၏ လိင်တူမုန်းတီးမှုအကြောင်းကို ထုတ်ဖော်ပြောဆိုခြင်းမရှိဘဲ တုံ့ပြန်လိုက်သည်။

"မင်း ဂိမ်းကစားချင်လို့လား"

"မကစားပါဘူး။ အဲဒါတွေကို ကစားတာ ဘာအကျိုးရှိလဲ"

လုရွှင် ရယ်မောလိုက်သည်။

သူတို့နှစ်ဦးက နီးကပ်နေပြီး လုရွှင်က ရုတ်တရက်ခေါင်းငုံ့၍ ယဲ့ယောင်း၏ နားရွက်နား နှုတ်ခမ်းကပ်လာရာ နားထဲသို့ လေပူများ စိမ့်ဝင်သွားသည်။

ယဲ့ယောင်းက လုရွှင်၏ စနောက်ကျီစယ်မှုနှင့် မျှော်လင့်ချက်အပြည့်ဖြင့် အသံကို ကြားလိုက်ရသည်။

"ငါတို့ တစ်ယောက်နဲ့တစ်ယောက်ကူညီကြရအောင်"

ထိုသို့ပြောလိုက်စဉ် ယဲ့ယောင်း၏ နားရွက်ထဲသို့ တိုးဝင်လာသော လေစီးကြောင်းက နားထဲသို့ စိမ့်ဝင်သွားကာ နှလုံးသားထဲသို့ တည့်တည့်တိုးဝင်ပြီး ကုတ်ခြစ်လိုက်သလို ယားယံလာသည်။

လုရွှင်က ခင်မင်ရင်းနှီးမှုကို ဖော်ပြသော ရုပ်ပိုင်းဆိုင်ရာထိတွေ့ဆက်ဆံမှုများတွင် ပါဝင်ရန် အလွန်စိတ်အားထက်သန်နေပုံရသည်။ လုရွှင်အား လိင်တူမုန်းတီးသူအဖြစ် လူသိခံရမှာ ကြောက်သူဟု သံသယရှိခဲ့ဖူးသော်လည်း ယခု လုရွှင်က အဖြောင့်လွန်းကြောင်းကို သူသိခဲ့ပြီး ထိုကဲ့သို့ လုံးဝမတွေးခဲ့တော့ပေ။

ယဲ့ယောင်းက သူ့ဆန္ဒများကို လိုက်လျောမှုမပြုတော့ဘဲ မျက်လွှာချကာ ပြောလိုက်သည်။

"ဒါပေမဲ့ ငါနည်းနည်းပင်ပန်းနေပြီ"

"ဒါဆို မေ့လိုက်တော့"

လုရွှင်က သူ့ကို သံသယမဝင်ဘဲ ယဲ့ယောင်းလည်ဂုတ်ကို ပွတ်သပ်လိုက်သည်။

"ရေချိုးပြီး အနားယူကြရအောင်၊ မင်းကို မနှောင့်ယှက်နိုင်တဲ့ တိတ်တဆိတ်ကစားလို့ရတဲ့ ဂိမ်းတွေ ရှိမလား ရှာကြည့်လိုက်မယ်"

***

ယဲ့ယောင်း ရေချိုးခန်းမှ ထွက်လာချိန် WeChat တွင် သူ့အမေထံမှ အသံမက်ဆေ့ချ်တစ်ခုကို တွေ့လိုက်ရသည်။

ယဲ့ယောင်းမိခင်၏ အသံက နူးညံ့သိမ်မွေ့သည်။

[ယောင်းယောင်းရေ၊ အဲ့မှာ ရာသီဥတုက ပိုအေးလာသလား။ အအေးမမိစေဖို့ နွေးနွေးထွေးထွေးဝတ်နော်...]

ယဲ့ယောင်း၏ မျက်ခုံးများက ပျော့ပျောင်းသွားသည်။

[ဟုတ်ကဲ့ မေမေ၊ စိတ်မပူနဲ့၊ ကျွန်တော် နေကောင်းပါတယ်]

သူ့အမေက မက်ဆေ့ချ်ကို မြန်မြန်ပြန်ဖြေခဲ့၏။

[အ၀တ်အစားတွေဝယ်လိုက်တော့ မင်းမှာ စားသောက်ဖို့ လောက်သေးရဲ့လား။ မလောက်ရင် မေမေတို့ကိုပြောပြနော်၊ မေမေ ပိုက်ဆံပေးမယ်။ အခုဆို မေမေတို့မိသားစုက အရင်ကထက် ပိုကောင်းတဲ့ အခြေအနေရောက်နေပြီဆိုတော့ ပိုက်ဆံစုစရာ မလိုတော့ဘူး။]

ယဲ့ယောင်းက ပညာသင်ဆုတစ်ခုရထားလို့ စားဝတ်နေရေးစရိတ်စက ပြတ်လပ်မှုမရှိပေမဲ့ ဒီနေ့မှာ အဝတ်အစားတွေ သွားဝယ်တာ သူ့အမေ ဘယ်လိုသိသွားတာလဲ။

ယဲ့ယောင်းက စိတ်ထဲ သံသယများဝင်လာပြီး သူ့အမေ၏ စိုးရိမ်မှုကို တုံ့ပြန်လိုက်သလို ထိုမေးခွန်းကို မေးလိုက်သည်။

သူ့အမေက ပြုံးလိုက်သည်။

[ရှောင်လုက သူ့ Moment မှာ ဓာတ်ပုံတင်ထားတယ်လေ၊ မတွေ့ဘူးလား]

ယဲ့ယောင်း: "...?"

ဘယ် Moments လဲ။ လုရွှင်က Moments တွင် ပို့စ်တင်ခြင်းကို မကြိုက်ဘူးလေ...

သူ ရေချိုးနေတုန်း ဘာဖြစ်သွားတာလဲ။

ယဲ့ယောင်းက သူ့အမေနှင့်စကားပြောပြီးနောက် 'Moments' ကို လျင်မြန်စွာ ဖွင့်လိုက်ပြီး Moments ရှိ ပထမဆုံးဆောင်းပါးက လုရွှင်၏ ပို့စ်အသစ်ဖြစ်ကြောင်း တွေ့ရှိခဲ့သည်။

လုရွှင်က ဓာတ်ပုံတစ်ပုံကို တင်ထားသည်။ ပုံထဲတွင် သူနှင့် လုရွှင်တို့ဟာ ဆင်တူအဝတ်အစား အသစ်ကို ၀တ်ဆင်ထားပြီး သူက လုရွှင်၏ရှေ့ ခြေတစ်လှမ်းတစ်ဝက်ခန့်တွင် ရပ်နေပြီး လုရွှင်၏ ခန္ဓာကိုယ်မှ အနက်ရောင်ဆွယ်တာအင်္ကျီကို ကိုင်ထားသည်။

လုရွှင်က အပြင်ကလိုပင် ခပ်မိုက်မိုက် အမျိုးသားပုံရိပ်က ပေါ်လွင်နေသေးသည်။ ပုံတွင် စကားလုံးတစ်လုံးတည်းဖြင့် ရေးသားထားသည်။

[စျေးဝယ်ထွက်ခြင်း]။

ယဲ့ယောင်းက သူ့လိင်စိတ်ခံယူမှု ပြောင်းလဲခြင်းကြောင့်လားမသိသော်လည်း ဤပုံက သူ့အတွက် ပုံမှန်မဟုတ်နေ။ ငယ်ရွယ်သောစုံတွဲတစ်တွဲက နေ့စဉ်အချိန်ဇယားအတိုင်း မသိနားမလည်သလို အကြည့်များအောက် အတူတူနေထိုင်ခဲ့ကြပုံနှင့်တူနေသည်။ လုရွှင်၏ စိတ်နေစိတ်ထားနှင့် အသွင်အပြင်ကြောင့် သူနှင့်အတူ ဈေးဝယ်ထွက်စဉ် ချစ်သူအပေါ် လွှမ်းမိုးချုပ်ကိုင်ထားသော CEO ဖြစ်သူကဲ့သို့ ထိတ်လန့်စရာကောင်းသော ခံစားချက်တစ်ခုပင် ရှိနေခဲ့သည်။

စိတ်အေးအေးထားလိုက်!

တစ်ခုခုမှားယွင်းနေပြီဟု သူတွေးနေမိသည်။

ဒါပေမဲ့ လူကြီးတွေကို မဖယ်ထားဘဲ ဒီလိုမျိုးဓာတ်ပုံတွေကို သူ့သူငယ်ချင်းအသိုင်းအဝိုင်းမှာ တင်ရသလား။

မူလတွင် သူတို့နှစ်ဦး၏ဆက်ဆံရေးက အလွန်ရင်းနှီးနေပြီဖြစ်ပြီး ယခုလည်း ထိုသို့ဓာတ်ပုံမျိုး တင်ထားသေးသည်။

လုရွှင်ရဲ့ မိဘတွေက သူတို့ဆက်ဆံရေးနဲ့ပတ်သက်ပြီးတော့ အမှန်တကယ် အထင်လွဲမှားနိုင်မယ်မဟုတ်လား။

ယဲ့ယောင်းက ခေါင်းမော့၍ အိပ်ရာပေါ်တွင် လဲလျောင်းနေသော လုရွှင်ကို ကြည့်လိုက်သည်။ လုရွှင်က သူ့ဖုန်းကို ပျော်ပျော်ကြီးပွတ်နေပြီး မျက်နှာထက်တွင်လည်း အပြုံးတစ်ခုရှိနေသည်။ ယဲ့ယောင်းက သူလုပ်ခဲ့သည့်အရာအပေါ် တွေးဆမရတော့ပေ။

ယဲ့ယောင်းက ပုံကို ဖြည်းညင်းစွာ အောက်ဆွဲချလိုက်ပြီး ယခုလေးတင် တင်ထားသော လုရွှင်၏ Moments ကို ကြည့်၍ ဆုတောင်းလိုက်သည်။ လုရွှင်၏ မိဘများက အလွန်အလုပ်များကြ၍ သူတို့ လုရွှင်၏ Moments မှ ပို့စ်ကို မမြင်ပါစေနှင့်။

ပုံအဆုံးတွင် ယဲ့ယောင်းက သူတို့၏ အထက်တန်းအတန်းဖော်ဟောင်းများနှင့် တက္ကသိုလ် အတန်းဖော်များက Like များ ပေးထားသည်ကို တွေ့လိုက်ရသည်။

လူတိုင်းက လုရွှင်၏ Moments တွင် စာရေးတင်ခြင်းအတွက် အံ့အားသင့်ခဲ့ကြရပြီး ပို့စ်၏ အကြောင်းအရာအတွက် ဝမ်းသာခဲ့ကြသည်။

[ဒါက တရားဝင်ကြေငြာချက်လား။]

[ကျဲမိန့်တို့၊ ဒါက အရမ်းချစ်စရာကောင်းတာပဲ။ ငါ သူတို့ရဲ့ fan ဖြစ်နေတာကြာပြီ။ ငါသဘောတူနေတဲ့ CP မှာ လိုက်ဖက်မှုရှိနေတာ မယုံနိုင်လောက်အောင်ပဲ၊ သူတို့ကို တူတူမြင်ရတာ ကောင်းလိုက်တာ။]

[လုကောက သူ့မိန်းမနဲ့ သူ့နေ့စဉ်ဘဝကို ထုတ်ဖော်ပြသဖို့ ထွက်လာပြီ၊ ငါမနာလိုဖြစ်လိုက်တာနော်၊ ငါလည်း ဇနီးလေးလိုချင်တယ်။]

ယဲ့ယောင်းက ‘Like’ များတွင် လုရွှင်၏ မိဘများကို မတွေ့ရမှသာ သက်ပြင်းတစ်ချက် ချလိုက်သည်။ လုရွှင်က ပုံမှန်အားဖြင့် မက်ဆေ့ချ်အားလုံးကို အကြောင်းမပြန်ဘဲ သူနှင့် ဆက်ဆံရေးကောင်းရှိသည့် သူငယ်ချင်းအနည်းငယ်ကသာ သူ့ထံမှ အေးစက်စက်အဖြေများကို ရရှိသည်။

သို့သော်လည်း လုရွှင်က တစ်စုံတစ်ဦး၏ မက်ဆေ့ချ်ကို ပြန်ကြားချိန်တွင် ရုတ်တရက် ပြောင်းလဲသွားခဲ့သည်။

ယဲ့ယောင်း၏ အမေ: [ရှောင်လုက အရမ်းချောနေတုန်းပဲ။ ရာသီဥတုက ပိုအေးလာတာမို့ နွေးနွေးထွေးထွေး ဝတ်ကြနော်။ ယဲ့ယောင်း အာ...ဒီကလေးက ဆောင်းရာသီမှာ ဖျားတတ်တာမို့ သူ့ကို ပြုစုဖို့ မင်းကိုပဲ ဒေါ်လေး ဒုက္ခပေးရတော့မယ်။]

လုရွှင်: [ဒေါ်လေး၊ စိတ်မပူပါနဲ့။ ယဲ့ယောင်းကို ကျွန်တော်နဲ့ ထားခဲ့လိုက်ပါ၊ ကျွန်တော် သူ့ကို ကောင်းကောင်း ဂရုစိုက်လိုက်ပါ့မယ်။]

ယဲ့ယောင်း၏မိခင်က စိတ်သက်သာရာရစွာ ပြုံး၍ ပြန်ပြောလိုက်သည်။

ယဲ့ယောင်း “…”

"လုရွှင် မင်း ဒီည ဟာသလုပ်နေတော့မှာ မဟုတ်ဘူးမလား။"

ယဲ့ယောင်း ခေါင်းကိုက်စွာဖြင့် မေးလိုက်သည်။

ခုတင်ပေါ်တွင် လဲလျောင်းနေသော လုရွှင်က လက်ကိုင်ဖုန်းကို ချလိုက်ပြီး သူ့ဘက် တစ်ချက်ကြည့်ကာ အူကြောင်ကြောင်ပြောလာသည်။

"Moments မှာ စာတင်တာက ယဉ်ကျေးပြီး လိုက်ဖက်ညီတဲ့ ဖျော်ဖြေရေးနည်းလမ်းလို့ မင်း မထင်ဘူးလား"

ယဲ့ယောင်းက ဤအံ့မခန်းဖျော်ဖြေမှုပုံစံနှင့် ပတ်သက်၍ ကြိုတင်ခန့်မှန်းချက်ရှိသော်လည်း သူ့ထင်မြင်ချက်ကို မဖော်ပြဘဲ ပြဿနာကို တတ်နိုင်သမျှ ဓမ္မဓိဋ္ဌာန်ကျကျရှင်းပြရန် ကြိုးစားခဲ့သည်။

"မင်းမိဘတွေက ငါ့အမေဆီ မင်းရဲ့ မက်ဆေ့ချ်ကို မြင်နိုင်တယ်နော်"

ယဲ့ယောင်းက ပြောလိုက်သည်။

"မင်းဘာလို့ အဲ့ဒါကို အရင်မဖျက်လိုက်တာလဲ။"

ထိုအချိန်က ပုန်ကန်တတ်သော ဆယ်ကျော်သက်လေးလုရွှင်က သူ့သဘောထားကို ပြုပြင်ပြီး ပြင်းပြင်းထန်ထန်စာကြိုးစားခဲ့သည်။ နောက်ဆုံး သူတက္ကသိုလ်ကို ရောက်ချိန်တွင် လုရွှင်၏ မိဘများက အလွန်ပျော်ရွှင်ခဲ့ကြသည်ဟု ပြောနိုင်သည်။ သူတို့သားလေး၏ သဘောထား ပြောင်းလာခြင်းမှာ ယဲ့ယောင်းကြောင့်ဟု ယုံကြည်ခဲ့ကြသည်။ ထိုအချိန်မှစ၍ သူက ညစာစားရန် မကြာခဏ ဖိတ်ကြားခံရပြီး WeChat တွင်လည်း ထည့်သွင်းခံခဲ့ရသည်။

"ဖျက်ရမယ်? ငါက ဘာလို့ဖျက်ရမှာလဲ"

လုရွှင်က မျက်မှောင်ကြုတ်ကာ ဖုန်းကို ကောက်ကိုင်လိုက်ပြီး သူ့အဖြေကို တစ်ချက်ကြည့်လိုက်သည်။

"ငါ့အဖြေက သင့်တော်တာပဲ မဟုတ်ဘူးလား"

လုရွှင်က သူလုပ်ခဲ့သမျှကိစ္စများအပေါ် အခြားသူများ၏ ထင်မြင်ယူဆချက်များကို ဂရုမစိုက်တတ်သောကြောင့် ယဲ့ယောင်းက ထိုအကြောင်းကို ဖျက်ချရမည့် အကြောင်းပြချက်အား ဖြည်းညင်းစွာ ပြောပြလိုက်သည်။

"မင်းသတိထားမိတာ ရှိ မရှိ ငါမသိဘူး၊ ဒါပေမဲ့ ဒါက ထူးဆန်းတဲ့ စကားနည်းနည်းပဲ မဟုတ်လား။ ငါတို့က တိတ်တိတ်လေးတွဲနေတာလို့ မင်းမိဘတွေ နားလည်မှုလွဲသွားလိမ့်မယ်၊ အဲဒါကို ဖုံးကွယ်ပြီး သူငယ်ချင်းလိုဟန်ဆောင်နေတာဆိုပြီးတော့ပေါ့"

ယဲ့ယောင်းက ခဏရပ်လိုက်သည်။ လုရွှင်၏ မိသားစုတွင် စီးပွားရေးလုပ်ငန်းကြီးတစ်ခုရှိသည်။

တီဗီဒရာမာအမျိုးမျိုး ဒါမှမဟုတ် လက်တွေ့ဘဝအင်တာဗျူးတွေမှာလို လူသိများတဲ့ ပုံမှန်ဇာတ်ကွက်တွေအရဆိုရင် သူတို့ရဲ့တစ်ဦးတည်းသောသားက လိင်တူချစ်သူဖြစ်ကြောင်း မိဘတွေ သိသွားရင် သူတို့ကို ခွဲပြီး သားဖြစ်သူကို လမ်းကြောင်းမှန်ပေါ် ပြန်လည်ပို့ဆောင်ဖို့ အစွမ်းကုန်ကြိုးစားကြမယ် မဟုတ်ဘူးလား။

သူနောက်ထပ်မရှင်းပြမီတွင် လုရွှင်က သူ့ Moments စာမျက်နှာကို ပြန်လည်တို့ထိလိုက်ပြီး မျက်ခုံးပင့်လိုက်သည်။

“သူတို့ မြင်ပြီးပြီ”

ယဲ့ယောင်းက ထိုအခိုက် နှလုံးခုန်ရပ်သွားသလို ခံစားလိုက်ရပြီး ပေ့ချ်ကို ပြန်ဆွဲချလိုက်ရာ လုရွှင်၏မိဘများထံမှ ပြန်ကြားချက်အသစ်နှစ်ခုကို တွေ့လိုက်ရသည်။

လုရွှင်၏ ဖေဖေ- [ဟက်၊ ရှောင်ယဲ့ရဲ့ ကြည့်ကောင်းမှုက မင်းထက်အများကြီး ပိုတယ်။]

လုရွှင်: [ဟားဟား၊ ဒါ အဖေ ကျွန်တော့်ကို ပြောစရာလိုသေးလို့လား]

လုရွှင်၏ မေမေ- [မင်းတို့နှစ်ယောက်ကို မတွေ့ရတာကြာပြီ၊ ရှောင်ယဲ့က ပိုချောလာတယ်။]

လုရွှင်: [ကျွန်တော်လည်း အဲ့လိုပဲ ထင်တယ်။]

လုရွှင်က ဖုန်းကို ပြန်ချလိုက်ပြီး ယဲ့ယောင်းအား ပြုံးပြကာ နှစ်သိမ့်လိုက်သည်။

"စိတ်မပူပါနဲ့၊ သူတို့က မင်းကို အရမ်းကြိုက်ပါတယ်"

ယဲ့ယောင်းက အောင့်သီးအောင့်သက်မျက်နှာဖြင့် “…အိုး”

သူက အနှစ် ၂၀ နီးပါး အဖြောင့်ဖြစ်ခဲ့သည်။

နောက်ဆုံးမှာ ပုံမှန်ဖို-မလောကကို နားမလည်တော့တဲ့ လူတစ်ယောက်ဖြစ်လာတာလား။

သေချာပေါက်ပင် သူက အလွန်အကဲဆတ်ပြီး ကြီးကြီးမားမားအကြောက်လွန်နေခြင်း မဟုတ်ချေ။ သူ့မိဘများ၏ အမြင်တွင် ဤမျိုးဆက်များ၌ သူတို့က ညီအစ်ကိုကောင်းများလိုပင်။

လဲလျောင်းနေသော လုရွှင်က ထထိုင်လိုက်သည်။ သူက အရာများစွာကို ဂရုမစိုက်သလို အခြားသူများ၏ စိတ်ခံစားချက်များကို ဂရုမစိုက်သော်လည်း ယဲ့ယောင်းမှာမူ ခြွင်းချက်ဖြစ်သည်။

ထိုအကြောင်းနှင့်ပတ်သက်၍ ယဲ့ယောင်းအား မစိုးရိမ်စေချင်ပေ။

"ငါတို့ရဲ့ အစစ်အမှန်ခင်မင်မှုကို ဘယ်သူနဲ့မှ လိုက်လျောညီထွေဖြစ်အောင် မဖုံးကွယ်ချင်ဘူး"

လုရွှင်သည် အကြည့်ချင်းဆုံမိစေရန် အပေါ်ထပ်မှ ခေါင်းထွက်လာသည်။ သူက ယဲ့ယောင်း၏ မျက်လုံးများကို ကြည့်လိုက်သည်။

"ဒါကြောင့် သူတို့ အတွေးမှားနေတာ ဒါမှမဟုတ် မင်းနဲ့ အဆင်မပြေရင် ငါ မင်းဘက်မှာ အမြဲရှိနေမှာပါ"

ယဲ့ယောင်းက ရှုပ်ထွေးနေသလို ခံစားလိုက်ရပြီး အကြည့်လွှဲလိုက်ကာ နူးညံ့စွာ ပြောလိုက်သည်။

"အင်း ငါသိပါတယ်"

***

အဖြစ်အပျက်က ပြီးသွားသလို ဆောင်းဦးအအေးဓာတ်က နွေရာသီအပူကို ပြေပျောက်စေပြီး အစိမ်းရောင်အရွက်များက အချိန်တိုလေးအတွင်း အဝါရောင်ပြောင်းသွား၏။

တနင်္ဂနွေနေ့က အဆောင်ခန်းထဲ အပူပေးစက်မဖွင့်ရသေး၍ အေးနေ၏။ ယဲ့ယောင်းက အခြားဘာမှလုပ်စရာမရှိသည့်အချိန် စောင်နွေးနွေးအောက်တွင် အိပ်ရခြင်းကို သဘောကျပြီး နေ့ခင်းတစ်ရေးအိပ်လျှင်ပင် နှစ်နှစ်ခြိုက်ခြိုက်အိပ်ပျော်နိုင်သည်။

အားလုံးအဆင်ပြေသော်လည်း တစ်စုံတစ်ယောက်က သူနှင့်အတူ ခုတင်ထဲ ကျပ်ညှပ်ပြီး အတင်းအကျပ်လာမတိုးလျှင် ပိုအဆင်ပြေလိမ့်မည်။

တုန်ခါမှုအနည်းငယ်ထွက်ပေါ်လာသည်။ တစ်စုံတစ်ယောက်က သူ့ဖုန်းထဲ မက်ဆေ့ခ်ျပို့ခဲ့ခြင်းပင်။ ယဲ့ယောင်းက လက်ဆန့်ပြီး ဖုန်းကို ဖွင့်လိုက်ရာ ပေးပို့သူ၏ နာမည်ကို မြင်လိုက်သည်နှင့် အိပ်ချင်စိတ်အနည်းငယ်က ချက်ချင်းပျောက်သွားသည်။ ယင်းက လုရွှင်၏ အမေပင်။

[ရှောင်ယဲ့၊ သား အားရဲ့လား။ အန်တီ မင်းကို တစ်ခုခုပြောချင်တာရှိလို့။]

ဖုန်းကိုကိုင်ထားသော ယဲ့ယောင်း၏ လက်ချောင်းထိပ်များက ဖြူလျော့တောင့်တင်းသွားသည်။ သူ့ဘေးရှိ လုရွှင်က မျက်လုံးဖွင့်လိုက်သည်။

"ဘာမှားလို့လဲ။"

"ဘာမှမဟုတ်ပါဘူး၊ အတန်းဖော်တစ်ယောက်က အိမ်စာအကြောင်းမေးတာ၊ မင်း ပြန်အိပ်လို့ ရပြီ"

ယဲ့ယောင်းက ရှောင်ထွက်သွားရန် ဆင်ခြေရှာလိုက်သည်။ သူ ခုတင်ပေါ်မှ ဆင်းပြီး ရေချိုးခန်း သွားကာ လုရွှင်အမေ၏ စာကို စပြီး အကြောင်းပြန်လိုက်သည်။

သူက လုရွှင်၏ အမေနှင့် အကြိမ်ကြိမ်တွေ့ဆုံခဲ့ဖူး၍ သူမက တကယ်ကို လှပကာ ကျက်သရေရှိပြီး အလွန်ပွင့်လင်းသည်။ မည်သို့ပင်ဆိုစေကာမူ ဤစံပြမိခင်ကိုကြည့်လျှင် သူက လုရွှင်ကဲ့သို့သော ပုန်ကန်တတ်ပြီး နာခံမှုမရှိသော သားလေးရနိုင်မည်ဟု တစ်ခါမျှ စိတ်ကူးမကြည့်နိုင်ပေ။

လုရွှင်အမေထံမှ မက်ဆေ့ချ်က လျင်မြန်စွာ ပြန်လာခဲ့ပြီး ယခုတစ်ကြိမ်တွင် သူမက အသံမက်ဆေ့ခ်ျကို ပေးပို့ခဲ့သည်။

ယဲ့ယောင်းက အသံအတိုးအကျယ်ကို ချိန်ညှိပြီး ဖွင့်လိုက်ကာ လုရွှင်အမေ၏ အနည်းငယ် ရှက်ရွံ့နေသောအသံကို ကြားလိုက်ရသည်။

"ရှောင်ယဲ့ရေ၊ ဒီလိုပါ အန်တီ့သူငယ်ချင်းမှာ ကျောင်းတက်နေတဲ့ သမီးလေးတစ်ယောက်ရှိတယ်၊ သူမက မင်းထက် တစ်နှစ်ငယ်တယ်၊ သူမက ဒီနှစ်လူသစ်ပဲ"

ယဲ့ယောင်း ခဏမျှ ထိတ်လန့်သွားပြီး ထိုပုံမှန်ဒရမ်မာများမှ ဇာတ်ကွက်များစွာက သူ့စိတ်ထဲတွင် ထိန်းမနိုင်သိမ်းမနိုင် တဖျပ်ဖျပ်လက်လာသည်။

လုရွှင်၏ အမေက ချက်လက်မှတ်ယူကာ သူ့ကို ပြောလာသည်။

"ဒီမှာ ဒေါ်လာ သန်း ၅၀၊ ငါ့သားကို ထားခဲ့လိုက်ပါ"

သို့မဟုတ် လုရွှင်လို ချမ်းသာသော မိသားစုက စီးပွားရေးမဟာမိတ်လက်ထပ်ရန် လိုအပ်၍ လုရွှင်က ဆန္ဒမရှိမည်ကို ကြောက်သည့်အတွက် သူ့ကို လှုံ့ဆော်သူအဖြစ် လုရွှင်နှင့် မိန်းကလေးကြားက ဆက်ဆံရေးကို တိုးလာအောင် တောင်းဆိုခဲ့ခြင်း။ နောက်ဆုံးတွင် လုရွှင်က သူ့ကြိုးစားအားထုတ်မှုဖြင့် လက်ထပ်ခန်းမထဲသို့ ဝင်ရောက်ခဲ့ပြီး သူက မင်္ဂလာဆောင်တွင် အကောင်းဆုံးသတို့သားအရံပင်။

လုရွှင်၏အမေအနေဖြင့် သူမသားကို လိင်တူအမျိုးသားသူငယ်ချင်းတစ်ဦးနှင့် အလွန်နီးကပ်စွာ ဆက်ဆံနေခြင်းကို ကြည့်နေရုံမျှဖြင့် မနေနိုင်တော့ပေ။

ယဲ့ယောင်းက သူ့နှုတ်ခမ်းကို ဖိထားပြီး လုရွှင်အမေ၏ နောက်ထပ်အသံမက်ဆေ့ဂျ်ကို နှိပ်လိုက်သည်။

လုရွှင်အမေ၏ အသံက ပို၍အခက်တွေ့နေပုံရသည်။

"အဲဒါ...အဲ့ဒါက ဒီမိန်းကလေးက မင်းကို အရမ်းကြိုက်တယ်လို့ပြောတယ်၊ သူက မင်းနဲ့ စကားပြောချင်တယ်တဲ့၊ WeChat မှာ မင်းကို add ချင်တယ်လို့လည်း ပြောတယ်၊ မင်းလည်း ဒီကောင်မလေးနဲ့ တွေ့ချင်လား။"

ယဲ့ယောင်း - "?"

"ဒီကလေးမက အရမ်းသွက်တယ်။ ဒီနေ့မွန်းလွဲပိုင်း မင်းတို့တက္ကသိုလ်ရဲ့ နို့လက်ဖက်ရည်ဆိုင်မှာ မင်းကို စောင့်နေမယ်၊ နေ့ခင်းလက်ဖက်ရည် တိုက်ပါရစေလို့ တောင်းဆိုလာလို့လေ။ မင်းမလုပ်ချင်ရင် အန်တီက မင်းအတွက် ငြင်းပေးလိုက်မယ်။"

ယဲ့ယောင်းတွင် ရည်းစားထားရန် ရည်ရွယ်ချက်မရှိသော်လည်း ထိုသို့ငြင်းဆိုခြင်းက မိန်းကလေးတစ်ဦး၏ မိမိကိုယ်လေးစားမှုကို အလွယ်တကူထိခိုက်နိုင်သည်ကိုလည်း သူသိသည်။

ယဲ့ယောင်းက သံသယအချို့ဖြင့် မေးလိုက်သည်။

[အန်တီက လုရွှင်ကို ပြောပြပြီး လုရွှင်ကို ကျွန်တော်ဆီ မေးခိုင်းမယ်လို့ ထင်ခဲ့တာ။]

လုရွှင်၏ အမေက သက်ပြင်းတစ်ချက်ချလိုက်သည်။

[အလိုလေး အန်တီသာ သူ့ကိုပြောပြရင် မင်းဆီ မက်ဆေ့ချ်ဘယ်တော့မှ ရောက်မှာမဟုတ်ဘူးကွဲ့။]

နောက်ဆုံးတွင် သူမသားက ယဲ့ယောင်းနားတစ်ဝိုက်ရှိ မက်မွန်ပွင့်အားလုံးကို ဖြတ်ပစ်လိုက်သည်မှာ တကယ့်ကို စိုးရိမ်စရာပင်။

သာမန်လူများက ထိုသို့လွှမ်းမိုးထားသော ခင်မင်ရင်းနှီးမှုကို မခံနိုင်ကြချေ။ သူမက တစ်နေ့နေ့တွင် ဤခင်မင်ရင်းနှီးမှုကို လုရွှင်ကြောင့် ပြတ်သွားမည်ကို တကယ်စိုးရိမ်မိသည်။

လုရွှင်၏ အမေက လက်ကိုင်ဖုန်းကို ချလိုက်ပြီး ဘေးနားရှိ လုရွှင်ဖေဖေအား ပြောလိုက်သည်။

"ရှင့်သားက ပုံမှန်ကို မဟုတ်တော့ပါဘူး။ သူ့ရဲ့ အဆက်မပြတ်နှောင့်ယှက်မှုကြောင့် ရှောင်ယဲ့က စိတ်ညစ်လာမှာ မဟုတ်ဘူးလား။"

"သူက မင်းရဲ့သားပဲဟာ"

လုရွှင်အဖေက စူးစူးဝါးဝါးကြည့်ကာ မကျေမနပ် ပြောလိုက်သည်။

"ဒီလောက်လွှမ်းမိုးချုပ်ကိုင်တတ်တဲ့ စိတ်ထားကို သူဘယ်မှာသင်ယူခဲ့မှန်းကို မသိဘူး။ ဘာပဲဖြစ်ဖြစ် ငါသာ ရှောင်ယဲ့ဆိုရင် လှည့်ပြီးပြေးလိမ့်မယ်။ လုရွှင် ဒီခွေးကောင်က သေဖို့လမ်း တကယ်ရှာနေတာ"

***

လုရွှင်က တစ်ရေးအိပ်နေရာမှ နိုးလာပြီး အောက်ရှိ စားပွဲခုံပေါ်၌ တင်ထားသော သူ့လက်ကိုင်ဖုန်းက အဆက်မပြတ်တုန်ခါနေကာ ကောင်းကင်ယံကို ကွဲအက်လုနီးပါးပင်။

အရပ်မြင့်မြင့်နှင့် ခြေတံရှည်များကို အားကိုး၍ လုရွှင်က ခုတင်လှေခါးကို မသုံးဘဲ ခုတင်ပေါ်မှ လှိမ့်ကာ စားပွဲပေါ်မှ ဖုန်းကို လှမ်းယူလိုက်သည်။

သူ့ဖုန်းကိုဖွင့်လိုက်သည်နှင့် လုရွှင်က မရေမတွက်နိုင်သော '@' အကြောင်းအရာများကြောင့် အံ့ဩသွားသည်။

[လုကော၊ လုကော၊ မင်း အခု တိတ်တိတ်လေးငိုနေတာလား။]

[လုကော ကြေကွဲနေပြီ၊ ဘာလို့ အရက်သောက်ဖို့ မထွက်လာတာလဲ ဒါမှမဟုတ် ငါတို့နဲ့ ကစားဖို့ အင်တာနက်ကဖေးကို လာလိုက်၊ ဒီယောက်ျားကြီးတွေက မင်းကို အဖော်ပြုလိမ့်မယ်။]

ဘာလဲ၊ ဘာလို့ တိတ်တိတ်လေး ငိုရမှာလဲ...

လုရွှင်က နားမလည်နိုင်သလို မျက်မှောင်ကြုတ်လိုက်ပြီး ဓါတ်ပုံတစ်ပုံကို တွေ့လိုက်ရသည်။

ဓာတ်ပုံထဲတွင် မကြာသေးမီက သူဘေးတွင် အိပ်နေသော ယဲ့ယောင်းက ရိုးရိုးဂျာကင်အင်္ကျီနှင့် ဂျင်းဘောင်းဘီကို ၀တ်ဆင်ထားပြီး အဖြူရောင်ဝတ်စုံနှင့် ချစ်စဖွယ် မိန်းကလေးတစ်ဦး၏ ဘေးမှ ကျောင်းဝင်းအတွင်း လမ်းလျှောက်နေပုံကို မြင်တွေ့ရသည်။

လုရွှင်၏ မျက်နှာပေါ်တွင် အက်ကွဲကြောင်းတစ်ခုပေါ်လာသည်။

ယဲ့ယောင်းက သူအနားတွင်မရှိစဉ် မိန်းကလေးတစ်ဦးနှင့် ချိန်းတွေ့သည်။

ယဲ့ယောင်းက...

ကောင်မလေးတစ်ယောက်နဲ့ ချိန်းတွေ့နေတယ်!

ယဲ့ယောင်းက ကောင်းကောင်းဝတ်စားထားပြီး ခံ့ညားနေသည်မှာ မည်သူမျှ မငြင်းနိုင်ပေ။

ယဲ့ယောင်းကို ငြင်းဆန်သူက သေချာပေါက်မျက်ကန်းဖြစ်ပြီး ယဲ့ယောင်း ဝမ်းနည်းအောင် ငြင်းဆန်သူက ယဲ့ယောင်းကို ဝမ်းနည်းအောင် လုပ်ပါက သူ ထိုလူယုတ်မာကို ရိုက်နှက်မိလိမ့်မည်။

ယဲ့ယောင်းက တခြားတစ်ယောက်နဲ့ အတွဲဖြစ်တော့မယ်!

လုရွှင်၏ စိတ်ထဲတွင် မရေမတွက်နိုင်သော အတွေးများနှင့် စိတ်ကူးများ ပြည့်လျှံသွားကာ သူ့မျက်လုံးများက မည်းမှောင်လာပြီး ကမ္ဘာကြီးချာချာလည်နေသည်ဟု ခံစားလိုက်ရသည်။

သူက စားပွဲကို ကိုင်ကာ မျက်နှာကို သုတ်လိုက်ပြီး ယဲ့ယောင်းနှင့် ဆင်တူဂျာကင်အင်္ကျီကို ဆွဲ၍ တတ်နိုင်သမျှ မြန်မြန်ပြင်ဆင်ကာ တံခါးကို ‘ဘမ်း’ ခနဲ တွန်းဖွင့်လိုက်သည်။

....