Chapter 8.1 - မန်နေဂျာလေးနဲ့ အဆိုတော်ခေါင်းဆောင်လေးက live လွှင်နေရင်း လျှို့ဝှက်ချိန်းတွေ့နေတယ်...

မနက် ၇ နာရီ...

ဗီလာ၏ တံခါးဘဲလ်သံ ထွက်ပေါ်လာသည်။ တိတ်ဆိတ်နေသော အတွင်းခန်းထဲတွင် ထိုအသံက ထူးထူးခြားခြား ထင်ရှားနေသည်။

တစ်စက္ကန့် ကုန်သွားတယ်... နှစ်စက္ကန့်...

တံခါးတစ်ဖက်ကနေ ဘယ်သူမှ ပြန်ဖြေမလာပေ။

ကင်မရာက ငြိမ်သက်စွာ ဆက်ရွေ့လျားနေပြီး အေးစိမ့်စိမ့်လေထုက လူတိုင်းကို လွှမ်းခြုံထားသည်။ ထုတ်လုပ်ရေးဝန်ထမ်းများက အကြည့်ချင်းဖလှယ်ကြပြီး နောက်ဆုံးတွင် ပုံမှန်၀တ်စားထားသော ဖိန်းကျယ်မောင်းက ရှေ့တိုးလာခဲ့သည်။ တံခါးဘဲလ်ကို နှစ်ကြိမ် ထပ်နှိပ်လိုက်သည်။

သို့သော်လည်း အတွင်းမှ တုံ့ပြန်မှု မရှိသေးပေ။

ဒါရိုက်တာဖိန်းက အင်္ကျီလက်များ ပင့်တင်ကာ တံခါးခေါင်းလောင်းကို အဆက်မပြတ် ဖိရန် ဆုံးဖြတ်လိုက်သည်။

၎င်းက သက်ရောက်မှုရှိပုံပင်။ စက္ကန့်အနည်းငယ်အကြာတွင် စိတ်တိုဒေါသထွက်နေသော ခြေသံများ ပဲ့တင်ထပ်လာသည်။ ထို့နောက် KFW ၏ ပင်တိုင်အကသမားအသံက ကျယ်လောင်ပြတ်သားစွာ ထွက်ပေါ်လာသည်။

"လာပြီ၊ လာပြီ!"

ခဏအကြာတွင် တံခါးပွင့်လာပြီး တောက်ပနေသော နေရောင်ခြည်ကြောင့် ညအိပ်ဝတ်စုံ ဝတ်ထားသည့် မိန်းချန်ရီက မျက်လုံးများကို မှိတ်ထားလိုက်မိသည်။

တိုက်ရိုက်စကားပြောခန်းက ပေါက်ကွဲသွား၏။

(OMG! (အားးးးး) မိန်းချန်ရီရဲ့ မျက်နှာက မိတ်ကပ်မလိမ်းဘဲနဲ့တောင် ဘာအပြစ်မှ မရှိဘူး!!)

(ဟားဟား၊ ထုတ်လုပ်ရေးအဖွဲ့က အရမ်းစနောက်တတ်တာပဲ။ သူတို့က နိုးတောင် မနိုးသေးဘူး။)

(ထန်ထန်က KFW နဲ့ အတူနေနေတယ်လို့ ကြားတယ်!! အားးးးဒီနေ့ မန်နေဂျာလေး နိုးလာတဲ့ ပုံတွေကို ငါမြင်ရမလားမသိ။)

(အမျိုးသမီးတို့၊ အမျိုးသမီးတွေ၊ ကြက်သီးထတယ်နော်။)

မိန်းချန်ရီက ကင်မရာနှင့် ဒါရိုက်တာအဖွဲ့ကိုကြည့်ရင်း သစ်သားတုံးလို အမူအရာနှင့်။ သူက ခြေလှမ်းနှစ်လှမ်း နောက်ဆုတ်ပြီး တံခါးကို ပိတ်လိုက်သည်။

တိုက်ရိုက်ထုတ်လွှင့်ခန်းတွင် တစ်စက္ကန့် သို့မဟုတ် နှစ်စက္ကန့်မျှ တိတ်ဆိတ်သွားသည်။ ထို့နောက် ရယ်မောသံများ ပြည့်နှက်သွား၏။

(ဟားဟားဟား၊ ငါ့ကောင်လေးက ဒီလိုပေါ့။ ငါအိပ်မက်မက်နေတာလား။)

(ဒီကလေးလေး ကြောင်သွားတာပဲ၊ ဒီလူတွေက ဘယ်သူတွေလဲ မသိဘူး။ အို့...ငါမသိဘူးကော။)

(ဟာဟားဟား၊ သူက ကလေးလေး မဟုတ်ဘူး၊ မိန်းချန်ရီက သူမငယ်တော့ဘူးလို့ ပြောပြီး ဒေါသတကြီး ခုန်နေလိမ့်မယ်။ ဟားဟား။)

(အရမ်းချစ်စရာကောင်းတာပဲ။)

ပျော်ရွှင်မှုပင်လယ်ကြားတွင် မိန်းချန်ရီက ရိုင်းပြသည်ဟု အမုန်းပွားသူများလည်း အနည်းငယ် ထွက်ပေါ်လာသည်။ ဒါရိုက်တာအဖွဲ့ကို ချန်ထားခဲ့ပြီး နာမည်မကြီးမီ အဓိကလူလို ပြုမူနေကြောင်း ပြောကြားခဲ့သည်။

မိန်းချန်ရီ၏ ပရိသတ်များက ချက်ချင်း ကာကွယ်လိုက်ကြပြီး သူ ဖိနပ်ပင် မစီးရသေးကြောင်း ထောက်ပြပြီး သေချာမနိုးသေးဘူးဆိုသည်ကို ရှင်းရှင်းလင်းလင်း ထောက်ပြကြ၏။ သူတို့က အခြားကြယ်ပွင့်နှစ်ဦးမှာ ကိုယ်တုံးလုံးချွတ်အိပ်ခြင်းကို နှစ်သက်ကြောင်း ယူဆခဲ့ကြပြီး အငယ်ဆုံးအဖွဲ့ဝင်က အခြားသူများကို အသိပေးရန် လုပ်ဆောင်ခြင်းဟု ပြောဆိုကြသည်။

တစ်ခါတစ်ရံ အမှန်တရားကို သတိမပြုမိဘဲ ကျော်သွားတတ်ကြ၏။ တိုက်ရိုက်ထုတ်လွှင့်မှုရှိ ပျော်ရွှင်ဖွယ်ကောင်းသော လေထုနှင့်မတူဘဲ မိန်းချန်ရီတစ်ယောက် ထိတ်လန့်တုန်လှုပ်သွားခဲ့သည်။ သူက အခြားသူများကို အကြောင်းကြားရန် လုပ်လိုက်သည်။

တံခါးပိတ်ပြီးနောက် မိန်းချန်ရီက အပေါ်ထပ်သို့ အမြန်တက်သွားခဲ့သည်။ သူက စောင်နွေးနွေးထဲ သာယာမှုအငွေ့အသက်များနှင့် အဝတ်ဗလာ လဲလျောင်းနေသော မန်နေဂျာလေးကို အလျင်အမြန် သယ်ဆောင်ကာ သူ့အခန်းထဲသို့ ပြန်ထည့်လိုက်သည်။

မန်နေဂျာလေးက နှစ်နှစ်ခြိုက်ခြိုက် အိပ်ပျော်နေသော်လည်း ရုတ်တရက် နိုးလာပြီး အေးစက်စက်စောင်ထဲ အထည့်ခံလိုက်ရကာ တစ်ဝက်တစ်ပျက် အိပ်မောကျသလို စိတ်ရှုပ်နေဆဲ။

မိန်းချန်ရီက မန်နေဂျာလေးကို အထဲထည့်လိုက်ပြီး အခြားဝံပုလွေပေါက်နှစ်ကောင်၏ တံခါးကို အပြေးအလွှား သွားခေါက်လိုက်ပြီး ညအိပ်ဝတ်စုံများကို ဝတ်ကာ သက်သေများကို ဖုံးကွယ်ရန် တိုက်တွန်းလိုက်သည်။

သူ့အခန်းထဲပြန်ရောက်ချိန် ထန်ထန်က နိုးနေချေပြီ။ ထိုအချိန်တွင် ထန်ထန်က သူဝတ်ထားပေးသည့်အတိုင်း ငြိမ်သက်စွာ ထိုင်နေသည်။ သူ့မျက်နှာက မနီနေသလို နှလုံးခုန်နှုန်းလည်း မြန်မနေပေ။ သို့သော် တုန်ရီနေသောလက်များက ကြယ်သီးတစ်လုံးအား အကြာကြီး ချိတ်ရန် ရုန်းကန်နေရသည်။

ဒါက တစ်နိုင်ငံလုံး တိုက်ရိုက်ထုတ်လွှင့်မှုပဲ...

သူ့ကို မိန်းချန်ရီရဲ့ အိပ်ရာထဲမှာသာ ဖမ်းမိသွားရင် အဲ့ဒါက ကမ္ဘာ့အဆင့်မီ ဖောက်ပြန်တဲ့မြင်ကွင်း ဖြစ်လာလိမ့်မယ်!!

ထန်ထန်က အသက်ပြင်းပြင်းရှူရင်း နောက်ဆုံးတွင် အင်္ကျီကြယ်သီးတပ်နိုင်ခဲ့ပြီး တစ်စုံတစ်ယောက်က ထိုနေရာတွင် သူအိပ်ပျော်သွားသည်ကို မသိစေရန် အိပ်ရာခင်းကို ဂရုတစိုက် ဖြန့်လိုက်ကာ ထုတ်လုပ်ရေးဝန်ထမ်းများအား တံခါးဖွင့်ပေးရန် အောက်ထပ်သို့ ဆင်းသွားခဲ့သည်။

အပြင်၌...

ဖိန်းကျယ်မောင်းက အားအင်အပြည့်နှင့် တံခါးဘဲလ်ကို တီးနေပြီး ပြောနေ၏။

"မိန်းချန်ရီ...မဖုံးကွယ်ထားနဲ့၊ ငါတို့ကို မြန်မြန်ပေးဝင်။ တခြားသူတွေ ကိုယ်လုံးတီး ဖြစ်နေရင်တောင် အဆင်ပြေတယ်... အဲ့ဒါက ပရိသတ်ကို ဧည့်ခံပေးတယ်လို့ပဲ တွေးလိုက်။"

"..."

ထန်ထန်က တံခါးလက်ကိုင်ကို ကိုင်လိုက်ပြီး တင်းတင်းကျပ်ကျပ် လက်သီးဆုပ်ထားလိုက်သည်။

တံခါးဘဲလ်သံက အဆက်မပြတ် မြည်နေပြီး ဖိန်းကျယ်မောင်းက အပြင်ဘက်တွင် ရပ်ကာ ဆူညံသံများ အဆက်မပြတ် လုပ်နေ၏။

ထိုအမျိုးသားက သူစိတ်ဆိုးစေမည့် တစ်စုံတစ်ခု ပြောလိုက်မည်ကို စိုးရိမ်ရသဖြင့် ထန်ထန်က တစ်ဖက်လူနှင့် အဆက်အသွယ်အားလုံး ဖြတ်တောက်လိုစိတ်ကို ထိန်းနေရ၏။ သူ တံခါးကို တွန်းဖွင့်လိုက်သည်။

နံနက်ခင်းနေရောင်ခြည်က ပြင်းထန်လွန်းလှသည်မဟုတ်ဘဲ မန်နေဂျာလေး၏ သန့်စင်ပြီး ချောမောသော မျက်နှာပေါ် တောက်ပစွာ ထွန်းလင်းနေသည်။ ဖြူစင်သော အသားအရေက တောက်ပနေကာ နှင်းဆီရောင်နှုတ်ခမ်းများ၊ သွားဖြူဖြူလေးများနှင့် နွေးထွေးသော မျက်လုံးများကို ပြသထားသည်။ သူ့အသားအရေက အလွန်ကောင်းနေ၍ ရေကို ညှစ်ထုတ်လိုက်သလိုပင်။ တိုက်ရိုက်ထုတ်လွှင့်ခန်းတွင် ရုတ်တရက် "အားးးးးးး" ဟူသော အသံများဖြင့် အော်ဟစ်နေသော ကြက်ပေါက်များ တစ်ဟုန်ထိုး ထွက်ပေါ်လာသည်။

(@ထန်ထန်ရေ၊ ကျွန်မ ရှင့်ကို ပွဲဦးထွက်ဖို့ တောင်းပန်ပါတယ်။)

(အဲ့ဒါ... မျက်မှန်နဲ့ ကွယ်နေတာ မျက်ရည်ခံမှဲ့လား။ အားးးးးး!! အဲ့ဒါ အနီရောင်ပဲ!!)

ဖိန်းကျယ်မောင်းက မျက်ခုံးပင့်ကာ တံခါးဘဲလ်ကို ဆက်မနှိပ်ဘဲ ရပ်လိုက်သည်။ ထန်ထန်က နောက်ဆုံးတွေ့ခဲ့သည့် အကြိမ်ထက်ပင် ငယ်ရွယ်သွားသည်ဟု သူ မတွေးဘဲမနေနိုင်တော့။ ဤအမျိုးသားက အသက်နောက်ပြန်သွားနေသလိုပင်။

မန်နေဂျာလေးက သူ့ခမျာ နေ့စဉ် နို့ အတင်းအကျပ် သောက်ခိုင်းခံနေရကြောင်းကိုတော့ ပြောပြမှာမဟုတ်ပေ။

"ကျွန်တော် တောင်းပန်ပါတယ်။ KFW ရဲ့ အလုပ်က မနေ့က မိုးလင်းခါနီးမှ ပြီးသွားလို့ပါ။"

ထန်ထန်က တောင်းပန်လိုက်သည်။

"ကလေးတွေက ပင်ပန်းပြီး အဝတ်မပါဘဲ အိပ်နေကြတာ။ အဝတ်မဝတ်ဘဲ ကင်မရာပေါ် ထွက်လာဖို့ကတော့...”

မန်နေဂျာလေးက ရယ်မောလိုက်သည်။

"အဖွဲ့ရဲ့ နာမည်ဂုဏ်သတင်းအတွက် မကောင်းပါဘူးလေ။"

မန်နေဂျာလေးက စနောက်လိုက်ပြီး သူ့အသံက နွေဦးလေပြည်လို နူးညံ့နေသည်။ သူ့မျက်နှာပေါ်တွင် ပြီးပြည့်စုံသော အပြုံးကို ထိန်းသိမ်းထားသည်။ စကားပြောနေရင်း ဘေးဖယ်ပေးလိုက်ပြီး အထဲသို့ဝင်ရန် အားလုံးကို ကြိုဆိုလိုက်သည်။

ထုတ်လုပ်ရေးအဖွဲ့က တံခါးအပြင်ဘက်တွင် အကြာကြီးစောင့်ဆိုင်းနေရခဲ့သော်လည်း ထန်ထန်၏ တောင်းပန်မှုကြောင့် အတော်လေး သက်သာရာရသွားသည်။ ကဲ့ရဲ့ရှုံ့ချနေသော အွန်လိုင်းရှိ မုန်းတီးသူများက ခေတ္တတိတ်ဆိတ်သွားကာ ပရိသတ်များက သူတို့ကောကော အလှလေးများ၏ အိပ်စက်ပုံကို ဟာသလုပ်ကာ လှောင်ပြောင်နေကြသည်။

အိပ်ငိုက်နေဆဲ ဝံပုလွေလေးသုံးကောင်က အပေါ်ထပ်မှ ဆင်းလာပြီး ဆိုဖာပေါ်တွင် ထိုင်နေကြ၏။ လူငယ်လေးများက ပိုးသားညအိပ်၀တ်စုံများကို ဝတ်ဆင်ကြပြီး ခေါင်းအုံးတစ်လုံးစီကို ပွေ့ဖက်ထားကြသည်။

(အား!! (မြေသိမ့်သိမ့်တုန်မတတ် အော်ဟစ်) ငါသေသွားပြီ။ ဒါက သူတို့ရဲ့ သာမန်ပုံစံလား။ တကယ်ပဲလား။)

(ဟ... ဒါက သဘာဝဆန်တဲ့ မျက်နှာမဟုတ်ဘူး။ သူတို့ မိတ်ကပ်တွေ လိမ်းထားတယ်။ သူတို့ အင်္ကျီမဝတ်ရသေးဘူးဆိုပြီး အခုလေးတင် ပြောခဲ့တာမလား။ ငါတော့ သူတို့တွေ မိတ်ကပ်လိမ်းဖို့ အထဲကို ဝင်သွားတာလို့ လောင်းရဲတယ်။)[အန်နေပုံ])

(နင်က ဘယ်သူ့ပရိသတ်လဲ။ နင့်မှာ သက်သေရှိရင် နာမည်ဝှက်နဲ့ လာမပြောနဲ့! အကျင့်မကောင်းလိုက်တာ!!)

(နင်က ငါတို့ကို စကားပြောခွင့်တောင် မပေးဘူးလား။ နင်က Y-Gang ပရိသတ်ဆိုရင်တောင် ကျိုးကြောင်းမဆီလျော်လိုက်တာ။ ငါတော့ အဲဒါကို သဘာဝကျတယ်လို့ မထင်ဘူး။ သူတို့အားလုံးက တမင်တကာ မိတ်ကပ်လိမ်းထားတာ။ ရွံရှာစရာကောင်းတယ် မဟုတ်လား။ ဒါသာ သူတို့ရဲ့ ပင်ကိုမျက်နှာဆို ငါ့ကီးဘုတ်ကို စားပြမယ်။)

(ဟီးဟီးဟီး၊ အမှားရှာဖို့ မှန်ဘီလူးကို သုံးလိုက်လေ။ မိတ်ကပ်လိမ်းလား မလိမ်းလားဆိုတာ၊ ချီယန်က ချင်းယွီရဲ့ အခန်းထဲကနေ တစ်ခုခုလုပ်ရင်း ထွက်လာတာပဲ ဟီးဟီး။)

ဝံပုလွေပေါက်များအားလုံး၏ နောက်ဆုံးစကားလုံးမှာ "Y" အက္ခရာဖြင့် စတင်ထားသောကြောင့် ပရိသတ်များက KFW အတွက် နာမည်ပြောင်များပေးခဲ့ကြသည်။ KFW ကို KFC Base နှင့် Y-Gang ဟု ဟာသနှောကာ ခေါ်ဝေါ်ခဲ့သည်။

မှန်၏။ "QY" (ချင်းယွီနှင့် ချီယန်) တို့ကို CP အဖြစ် စနောက်လိမ့်မည်ဟု ဘယ်သူကမှ မမျှော်လင့်ထားခဲ့ပေ။

သခင်ငယ်လေးနှစ်ယောက်က အစပိုင်းတွင် ဘာမှမထူးခြားသော်လည်း နောက်ဆုံးမှတ်ချက်ကို ဖတ်လိုက်ချိန်တွင် မတုံ့ပြန်ဘဲ မနေနိုင်တော့ပေ။

ချင်းယွီက လှောင်ပြောင်ပြီး ရှုတ်ချနေသော ချီယန်ထံမှ ခပ်ဝေးဝေးသို့ ရွှေ့လိုက်ရင်း သူ့ကောကော၏ ဘေးနားသို့ လျင်မြန်စွာ ချဉ်းကပ်သွားခဲ့သည်။

မန်နေဂျာလေးက အနည်းငယ် အေးစက်သော အကြည့်ဖြင့် စခရင်ကို ကြည့်နေခဲ့သည်။ သူ့ဘေးတွင် ထိုင်နေသော မိန်းချန်ရီကို ငုံ့ကြည့်ရင်း စကားပြောတော့မည့်ဆဲဆဲ။

မိန်းချန်ရီက သူ့မျက်နှာကို အနားတိုးလိုက်ပြီး တိုက်ရိုက်ထုတ်လွှင့်ခန်းရှိ ပရိသတ်များက သူတို့၏ ရင်သပ်ရှုမောဖွယ် ပုံရိပ်များကို အနီးကပ်ကြည့်ချင်သည်ဟု မအော်နိုင်ခင် သူတို့ကောကောက သူ့မျက်နှာကို ကိုင်ပြီး ပြင်းပြင်းထန်ထန် ပွတ်သပ်လိုက်သည်ကို ကြည့်လိုက်ရသည်။

(ရီငယ်လေးရေ.. ဒီမိုက်မဲတဲ့ ကလေးတော့။ မျက်နှာကို အဲ့ဒီလို မပွတ်နဲ့လေ။)

(သူ... သူ ပြင်းပြင်းထန်ထန် ပွတ်နေတာပဲ။ အဲ့လောက်အားက သူ ပလပ်စတစ်ဆာဂျရီ မလုပ်ဖူးကြောင်း သက်သေပြနိုင်နေပြီ။)

(ဟားဟားဟားဟား၊ Y-Gang ရဲ့ ပင်တိုင်အကသမားက သူ့မျက်နှာကို အရမ်းယုံကြည်မှုရှိတာပဲ။ သူက အူတူတူအတတလေးဆိုတာ သက်သေပြနေတာ။)

မိန်းချန်ရီက ခေတ္တရပ်လိုက်ပြီး သန့်ရှင်းနေသော သူ့လက်ကို ကင်မရာဆီ လှမ်းပြလိုက်သည်။

"သန့်တယ်မလား။ မိတ်ကပ်ရှိလား?"

မိန်းချန်ရီက အထင်အမြင်သေးသော အပြုံးနှင့် သူ့ထိုင်ခုံဆီ ပြန်မလာတော့ပေ။ သူ့မျက်နှာအား ကင်မရာနားကပ်၍ ပျင်းရိစွာ ပြောလိုက်သည်။

"ကီးဘုတ်စားပြမယ်လို့ ပြောတဲ့သူတွေ၊ မင်းတို့ တစ်ခုလုံး မျိုချဖို့ အစီအစဉ်ရှိလား... ဒါမှမဟုတ် ခလုတ်ဖြုတ်ပြီး ခရမ်းချဉ်သီးဆော့စ်ထဲ နှစ်ပြီး တစ်ခုချင်းစီစားလိုက်လေ။"

မိန်းချန်ရီ၏ ရုပ်ရည်ချောမောမှုကြောင့် သေနိုင်လောက်မည့် အနီးကပ်ရိုက်ချက်များကို ဖန်တီးနိုင်ခဲ့သည်။ မဟုတ်လျှင် သူတို့မျက်နှာများကို ကင်မရာနှင့် အနီးကပ်ထားပါက ကြောက်စရာကောင်းလိမ့်မည်ပင်။

ရီလေးကို လွှမ်းမိုးခြယ်လှယ်သူကြီးဟု ချီးကျူးနေသူများ၏ မှတ်ချက်များက ရုတ်တရက် ပြည့်သွားသည်။ သို့သော် သူတို့ အလွန်အကျွံ မဖြစ်မီ ယုံကြည်ချက်အပြည့်ရှိနေသော ဝံပုလွေခွေးပေါက်လေး၏ လည်ကုပ်ကို သွယ်လျလျလက်လေးက နောက်မှ ဆွဲထားသည်ကို တွေ့လိုက်ရသည်။ ထို့နောက် အလျင်စလို နောက်ပြန်ဆွဲခံလိုက်၏။

မန်နေဂျာလေးရဲ့ တင်းမာတဲ့ အကြည့်ကို ရင်ဆိုင်နေရတဲ့ ဝံပုလွေခွေးလေးက... အံ့သြစရာကောင်းလောက်အောင် ဒေါသလျော့သွားပြီး အမြီးကိုတောင် ခါလိုက်သေးတယ်!!

ချိုမြိန်မှုကို စွဲလမ်းနေသော ပရိသတ်မိန်းကလေးအများစုက အံ့အားသင့်သွားခဲ့ကြပြီး အပြင်ပန်းတွင် ဣန္ဒြေထိန်းသိမ်းထားသော်လည်း အတွင်းတွင်မူ အူလှိုက်သည်းလှိုက် အော်ဟစ်နေခဲ့ကြသည်။

ကြောင်အနေသော ထုတ်လုပ်ရေးအဖွဲ့က ယင်းအခြေအနေအရ အနည်းငယ် လှုပ်ရှားလာ၏။ ဖိန်းကျယ်မောင်းက သူ့မျက်နှာကို ပွတ်သပ်ပြီး စိတ်ရှုပ်စရာများ ရှင်းထုတ်လိုက်ရင်း ပြောလိုက်သည်။

"ခဏကြာရင် ထုတ်လုပ်ရေးအဖွဲ့က ဗီလာမှာ ကင်မရာတွေ တပ်ထားလိမ့်မယ်။ ဒီနေ့အဓိက ရိုက်ချက်က မင်းတို့နဲ့ မန်နေဂျာလေးရဲ့ နေ့စဉ်ဘဝအစစ်ကို ရိုက်ကူးဖို့ပဲ။ မနက်ဖြန်ဆို ဧည့်သည်တွေအားလုံး အဆင်သင့်ဖြစ်နေပြီဆိုတော့ ထုတ်လုပ်ရေးအဖွဲ့က မင်းတို့ သွားရမဲ့နေရာကို အကြောင်းကြားပေးလိမ့်မယ်။"

သခင်ငယ်လေးများက ခေါင်းညိတ်လိုက်၏။ ကင်မရာတပ်ဆင်နေစဉ်အတွင်း သူတို့က ပရိသတ်များနှင့် ပေါ့ပေါ့ပါးပါး စကားပြောဆိုခဲ့ကြသည်။ ထို့နောက် သူတို့က ဆိုဖာပေါ်သို့ ဖြည်းဖြည်းချင်း လှဲချကာ အစာကျွေးရန် စောင့်ဆိုင်းနေသော ဆာလောင်နေသည့် ငှက်များကဲ့သို့ မန်နေဂျာလေးကို စိတ်အားထက်သန်စွာ စိုက်ကြည့်နေကြသည်။

ပရိသတ်များက မန်နေဂျာလေး အင်္ကျီလက်များကို လိမ့်တင်ပြီး ထမင်းချက်ရန် ထွက်သွားသည်ကို ကူကယ်ရာမဲ့သော အမူအရာနှင့် ကြည့်ရှုခဲ့ကြ၏။

ဒါကို ဘယ်သူက ခံနိုင်မှာလဲ!! ငါ့ကို ပြောစမ်းပါဦး!! ဒါကို ဘယ်သူက ခံနိုင်မှာတဲ့လဲ!!

စက်ကိရိယာများကို အပြည့်အဝ မတပ်ဆင်ရသေးသောကြောင့် ဖိန်းကျယ်မောင်းက ထန်ထန်၏ ချက်ပြုတ်နည်းကို မှတ်တမ်းတင်ရန် ကင်မရာမန်းနှစ်ဦး စီစဉ်ပေးခဲ့ပြီး နောက်ပိုင်းတွင် ရိုက်ကွင်းနောက်ကွယ်ဗီဒီယိုဖိုင်အဖြစ် အသုံးပြုမည်ဖြစ်သည်။ ပရိုမိုးရှင်းပွဲ၏ တစ်စိတ်တစ်ပိုင်းအနေဖြင့် တိုက်ရိုက်ထုတ်လွှင့်မှုက ယနေ့တစ်နေ့လုံး ဆက်လက်ရှိနေလိမ့်မည်။ မနက်ဖြန်မှစပြီး အကြောင်းအရာကို တည်းဖြတ်ပြီးနောက် ရုပ်မြင်သံကြား၊ ဝဘ်ဆိုဒ်များမှတစ်ဆင့် ပရိသတ်များဆီ တင်ဆက်သွားမည်ပင်။

ဗီလာအတွင်း၌ စက်ကိရိယာများ အဆင်သင့်ဖြစ်လုနီးပါးဖြစ်နေချေပြီ။ ထန်ထန်က အစားအသောက်ကို ပြင်ဆင်ထားပြီးဖြစ်၍ ခါးစည်းမချွတ်ခင် ဖိန်းကျယ်မောင်းက သူ့ကို ကင်မရာများ မရှိသော ဧရိယာတစ်ခုဆီ ခေါ်သွား၏။

"ဘာတွေဖြစ်နေတာလဲ။"

ထန်ထန်က ဖိန်းကျယ်မောင်း၏ တုံ့ဆိုင်းမှုကို ခံစားမိ၍ မေးလိုက်သည်။

ဖိန်းကျယ်မောင်းက သက်ပြင်းမချခင် ခဏမျှ တုံ့ဆိုင်းသွား၏။

"ဟမ်းးးး... ကျန်းရှီလည်း ဒီ variety show မှာ ပါတယ်။ ငါ့ရဲ့ အရင်အစီအစဉ်အရဆို... သူက နောက်ဆိုရင် မင်းနဲ့ villa တစ်ခုတည်း နေရဖို့ ဖြစ်နိုင်တယ်။"

ထန်ထန်က မျက်မှောင်ကြုတ်လိုက်သည်။

"သူက variety show မှာ ပါတယ်ပေါ့?”

ဖိန်းကျယ်မောင်းက ထိုခေါင်းစဉ်အပေါ် အတော်လေး စိတ်ပျက်လက်ပျက်ဖြစ်နေ၏။

"ဟုတ်တယ်၊ သူ ဘယ်ကဝင်လာမှန်း ငါမသိဘူး၊ ငါက မင်းနဲ့ ရင်းနှီးနေမှန်းသိလို့ ငါ့ဆီတောင် မချဉ်းကပ်ခဲ့ဘူး။ သူက စပွန်ဆာတွေဆီကနေ ဝင်လာတာ။"

သူက စီးကရက်တစ်လိပ်ကို ဆွဲထုတ်ကာ အတော်လေး ဒေါသထွက်လာပုံပင်။

"ဒီစောက်ရူးကောင်၊ ဒီလိုမျိုးကောင်ကို ထောက်ပံ့မဲ့ စပွန်ဆာရှိတယ်ဆိုတာ မယုံနိုင်စရာပဲ။ ရှက်စရာ... ကြောင်သူတော်တစ်စု။"

ထန်ထန်က မျက်မှန်ကို ချိန်ညှိလိုက်ပြီး သိသိသာသာ ငြိမ်သက်နေခဲ့သည်။ ဇာတ်လိုက်ရှို့က ကုန်းများနှင့် နီးစပ်ရန် ကြိုးစားမည်ကို သူ သဘောပေါက်သည်။ သို့သော် ပြဿနာတိုင်းက အဖြေရှိ၏။ သူ့လူများကို သွေးဆောင်ရန် ကြိုးစားခြင်းကို စိတ်မပူချေ။ သူ့အနေနှင့် လက်ဖက်စိမ်းခွေးမကို မကြောက်ပေ။