ပါဆယ်ထုပ်ကို ရွှေရောင်တိမ်တိုက်များသဏ္ဍာန် ပန်းထိုးထားသည့် ပိုးပဝါစဖြင့် ထုတ်ပိုးထားပြီး ၎င်းက စန္ဒကူးရနံ့ဖျော့ဖျော့လေး ထုတ်လွှင့်နေ၏။
၎င်းမှာ ဇိမ်ခံပစ္စည်းတစ်ခုဖြစ်ကြောင်း ထင်ရှားပေ၏။
ချည်နှောင်ထားသည်အား ဖြည်လိုက်သောအခါ ပဝါအထဲ၌ ကြမ်းတမ်းသော အနားသတ်များမပါသည့် ချောမွေ့သန့်ရှင်းနေသော မီးခိုးနက်ရောင် သစ်သားသေတ္တာလေးတစ်လုံး ရှိနေသည်။
သေတ္တာ၏ ညာဘက်အောက်ခြေထောင့်တွင် ငွေဖြင့်ထွင်းထားသော စာလုံးတစ်လုံးရှိ၏ - 'ဟယ်'။
ပေးပို့သူက လှပပြီး သိမ်မွေ့ကာ နှလုံးသားနူးညံ့သည့် အမျိုးသမီးတစ်ယောက်ဖြစ်သည်။
လင်ရှူးသည် အရင်ကလည်း မိန်းကလေးများဆီမှ လက်ဆောင်များကို လက်ခံရရှိဖူးသည်။
ကျောင်းတုန်းက မိန်းကလေးအတန်းဖော်များသည် သူ၏စားပွဲပေါ်၌ လက်ဆောင်လေးများကို အမည်ဝှက်ကာ နေ့တိုင်း လာထားတတ်ကြ၏။ အကခန်းမရှိ ယာချီနှင့် အခြားသူများကတောင် သူ့ဆီကဆုကြေးငွေထက် သူနှင့် အလကား ကချင်နေကြသည်။
သို့သော် ရုတ်တရက်ဆိုသလို သေတ္တာထဲ၌ ပါဝင်မည့်အရာကို ပို၍စိတ်ဝင်စားနေခဲ့၏။ ဟယ်ရို့အန်းက ပို့ပေးလာသည့်အတွက် ၎င်းက ထူးခြားသောတစ်စုံတစ်ခု ဖြစ်ပေလိမ့်မည်။
သေတ္တာအား သော့ခတ်မထားဘဲ အလွယ်တကူဖွင့်လို့ရသော သော့ခလောက်လေးသာ ပါရှိသည်။
အထဲ၌ ရွှေမှုန်လေးများပါသော စာရွက်အနီရောင်တစ်ရွက်၊ ဘောပင်တစ်ချောင်းနှင့် ရေမွှေးနှင့်တူသော်လည်း မင်ဟုထင်ရသော အရည်တစ်ပုလင်းပါပေ၏။
စာရွက်အနီက ဖိတ်စာ သို့မဟုတ် မင်္ဂလာပွဲကြေညာချက်နှင့် တူသော်လည်း ထိုအပေါ်၌ စာတစ်လုံးမှရေးမထားဘဲ စာရွက်အလွတ်တစ်ခုပင်။
လင်ရှူး စိတ်ဝင်စားသွား၏။
သူ ခန့်မှန်းကြည့်ရသလောက် ဟယ်ရို့အန်းသည် အရင်တစ်ခေါက်က သူ(မ)၏အသက်ကို ကယ်တင်ပေးခဲ့သောကြောင့် ဤလက်ဆောင်အား ပေးပို့ခြင်းဖြစ်ရမည်။
ဤသည်က လက်ဆောင်တစ်ခုဖြစ်ရာ ၎င်းအား အလျင်စလိုထုတ်ပိုးမှာမဟုတ်ဘဲ အမည်နှင့် အကြောင်းအရာတို့ကိုလည်း မေ့လျော့မည်မဟုတ်ပေ။
ဤသည်က မီးပုံးပွဲ၌ မီးပုံးစကားထာကဲ့သို့ ဆုကြေးပါသော ပဟေဠိတစ်ခုနှယ်။ စကားထာကို ဖြေရှင်းပြီးမှ ထိုမီးပုံးကို ပိုင်ဆိုင်ရမည်။
အလွန်စိတ်ဝင်စားစရာကောင်း၏။
"ဒါက ဘာလဲ။" ယွဲ့တင့်ထန်က တံခါးတွန်းဖွင့်လိုက်ရာ သူနှင့်အတူ အေးစက်သောလေထုကိုပါ သယ်ဆောင်လာခဲ့သည်။
လင်ရှူး၏ အံ့အားသင့်သောအမူအရာကို မြင်လိုက်ရသောအခါ သူက ရှင်းပြခဲ့၏။ "ဒီနေ့ ကျောင်းမှာ အတန်းမရှိလို့ ကျောင်းသားတွေရဲ့အိမ်စာကို အမှတ်ပေးဖို့ ရောက်လာတာ။ ဒီမှာက ပိုနွေးတယ်လေ။"
လင်ရှူးမှာ ထိုသူသည် သူ့အား စောင့်ကြည့်ဖို့ ရောက်လာသည်ဟု မတွေးဘဲမနေနိုင်ခဲ့ချေ။
"မိန်းကလေးဟယ်က အရင်တစ်ခေါက် သူ(မ)ကို ကယ်ခဲ့လို့ ကျေးဇူးတင်တဲ့အနေနဲ့ လက်ဆောင်ပို့လိုက်တာပါ။" လင်ရှူးက ကလေးတစ်ယောက် သူ၏သကြားလုံးဘူးကို သကြားလုံးမရှိသည့်ကလေးအား ကြွားဝါနေသလိုမျိုး အနည်းငယ်ဂုဏ်ယူဝံ့ကြွားစွာဖြင့် ပြောခဲ့သည်။
"သူ(မ)က လင်အိမ်တော်ကိုမပို့ဘဲ ဒီကိုပို့တာဆိုတော့ မင်းအတွက်ပဲ မဟုတ်လောက်ဘူး၊ ငါတို့နှစ်ယောက်လုံးအတွက် ဖြစ်နိုင်တယ်။" ယွဲ့တင့်ထန်က ပြောလိုက်၏။
လင်ရှူးက များများစားစား တွေးမနေချေ။ "မင်းက ငါ့အထက်လူကြီးလေ၊ ဒီတော့ လူနှစ်ယောက်အတွက်ဆို ဘာလို့ ငါ့ဆီကိုပဲပို့ရတာလဲ။"
ယွဲ့တင့်ထန်က ဖျော့တော့စွာ ပြုံးလိုက်၏။ "အဲ့ဒါ မင်းက သူ(မ)အသက်ကို ကယ်ပေးခဲ့လို့လေ။ ဟယ်ရို့အန်းက ဆင်းရဲတဲ့မိသားစုကနေ ဆင်းသက်လာပြီး ရှန်ရှစ်ချီးကြောင့် နာမည်ရလာခဲ့တာ။ သူ(မ)က အထက်တန်းစားတွေနဲ့ လူချမ်းသာတွေကြား ပေါင်းသင်းဆက်ဆံလာရတယ်။ အရင်တစ်ခေါက်က ကောင်စစ်ရုံးပွဲမှာ ရှန်ရှစ်ချီး အရှုပ်အထွေးဖန်တီးလိုက်တဲ့ကိစ္စနဲ့ပတ်သက်ပြီး လူအုပ်ကြီးဆီကနေ အထင်သေးမခံရတဲ့အပြင် စာနာသနားမှုတွေကို ရခဲ့တယ်။ အဲ့နေ့ညပြီးတော့ သူ(မ)ရဲ့ရုပ်ရှင်တွေ အကုန်ရောင်းထွက်ကုန်ပြီး လူချမ်းသာတွေဆို သူ(မ)ကို ပန်းတွေသွားပို့ကြတယ်လို့ ငါကြားခဲ့တယ်။ သူ(မ)က သူ(မ)အပေါ် ငွေကြေးသုံးစွဲဖို့ ဆန္ဒရှိတဲ့ ပရိသတ်တွေ ပိုရလာခဲ့တယ်။ တချို့ဆို သူ(မ)ကို ရှန်ရှစ်ချီးလက်ထဲကကယ်တင်ဖို့ သူ(မ)အတွက် ရုပ်ရှင်ကုမ္ပဏီတောင် ဝယ်ပေးချင်နေကြတာ။ သူ(မ)က သူ(မ)ရဲ့အပြုအမူတွေကို အရမ်းဂရုစိုက်ပြီး ဘယ်သူ့ကိုမှ မစော်ကားဘူး၊ ဒီတော့ မင်းပြောသလို အမှားမျိုးက ဘယ်လိုလုပ်ရှိနိုင်မှာလဲ။"
လင်ရှူး မမေးဘဲ မနေနိုင်ခဲ့ချေ။ "တစ်စုံတစ်ယောက်က သူ(မ)အတွက် ရုပ်ရှင်ကုမ္ပဏီဝယ်ပေးချင်တာကို ဘာလို့ သူ(မ)က သဘောမတူခဲ့တာလဲ။"
ယွဲ့တင့်ထန်: "သူ(မ)က သဘောမတူခဲ့ဘဲ ရှန်ရှစ်ချီးက သူ(မ)အပေါ်မှာ ကျေးဇူးတွေရှိတယ်လို့ ပြောခဲ့တယ်။ သူ(မ)က စိတ်မြန်တဲ့သူဆိုပေမဲ့ တခြားလူတွေရဲ့စိတ်သဘောထားကြောင့်နဲ့ သူ(မ)ရဲ့ကျေးဇူးရှင်ကို မမေ့နိုင်ဘူး။ ဒီကိစ္စပျံ့သွားတော့ လူတိုင်းက သူ(မ)ကို သစ္စာရှိတယ်၊ ဖြောင့်မတ်တယ်ဆိုပြီး ချီးကျူးခဲ့ကြသေးတယ်။ အမေရိကန်ကောင်စစ်ဝန်ရုံးက မစ္စတာပန့်စ်တောင် သူ(မ)ကို အခမ်းအနားတစ်ခုအတွက် ဖိတ်ကြားခဲ့ပြီး နောက်လ ဝါရှင်တန်ရဲ့မွေးနေ့မှာ သီချင်းဆိုဖျော်ဖြေပေးဖို့ တောင်းဆိုထားတယ်။ ပြင်သစ်ကောင်စစ်ဝန်ကလည်း မိန်းကလေးဟယ်ကို လိုက်နေတယ်ဆိုလားပဲ။"
သူ၏ သတင်းအချက်အလက်အရင်းအမြစ်များက လင်ရှူးထက် ပို၍ကျယ်ပြန့်ပေ၏။
သို့သော် ၎င်းအား ကြားလိုက်ရသောအခါ လင်ရှူးမှာ မနာလိုမဖြစ်သလို စိတ်ဓာတ်လည်းမကျဘဲ ချီးကျူးပေးခဲ့လေသည်။ "အပြင်ပိုင်းပဲလှတဲ့ မိန်းကလေးတွေက များပေမဲ့ အတွင်းစိတ်ရော အပြင်ပိုင်းပါလှတဲ့ မိန်းကလေးတွေကတော့ သိပ်ကိုနည်းတယ်။ မိန်းကလေးဟယ်က သူတို့ကြားထဲမှာ တကယ်ကိုထူးချွန်တာပဲ!"
ယွဲ့တင့်ထန်မှာ သူ နက်နက်ရှိုင်းရှိုင်းကို အဆိပ်ခတ်ခံထားရပြီး မြင်းဆယ်ကောင်က သူ့ကို ပြန်ဆွဲခေါ်လျှင်တောင် မရနိုင်တော့ဘူးဟု ခံစားနေရ၏။ ထိုအဆိပ်အား 'ဟယ်ရို့အန်း၏အလှတရားအဆိပ်' ဟု ခေါ်ပေသည်။ ထိုအဆိပ်ကို အပေါ်ယံသာ သက်ရောက်ခံထားရသူများက ဟယ်ရို့အန်းကိုမြင်လျှင် ရှက်ရွံ့ကာ ပူလောင်လာကြမည်။ နက်နက်ရှိုင်းရှိုင်း အဆိပ်မိထားသူများကတော့ ဟယ်ရို့အန်း လူသတ်ပြီး မီးရှို့လျှင်တောင် လက်ခုပ်တီးကာ အားပေးကြလိမ့်မည်။
ယွဲ့တင့်ထန်၏ ကောက်နုတ်ချက်အရ လင်ရှူးသည် အဆိပ်ပျော့ကနေ အဆိပ်ပြင်းဆီသို့ ကူးပြောင်းနေသည့် လက္ခဏာများ ပြသနေ၏။ သူက စာရွက်အနီကို ကောက်ယူလိုက်ပြီး အနီးကပ် လေ့လာကြည့်လိုက်သည်။
"ဒါက မမြင်နိုင်တဲ့ မင်ဖြစ်ရမယ်။ မင်း စာရွက်ကို အပူပေးလိုက်ရင် စာလုံးတွေ ပေါ်လာလိမ့်မယ်။ ဒီနေ့ခေတ် ဓာတုဗေဒအတန်းတွေမှာ ရေဘဝဲမင်ကိုသုံးပြီး စာရေးသားရတဲ့ အခြေခံသင်ခန်းစာတစ်ခုရှိတယ်။ ရက်အနည်းငယ်ကြာရင် စာလုံးထားတာတွေက ပျောက်သွားတတ်တာမို့ ကျောင်းသားအများစုက အဲ့ဒါနဲ့ဆော့ရတာကို သဘောကျကြပြီးတော့ အချင်းချင်း လျှို့ဝှက်စာတွေ ပေးတတ်ကြတယ်။"
ထိုသို့ကြားလိုက်ရသောအခါ လင်ရှူးက စကားထာခန့်မှန်းဖို့ကို စိတ်မဝင်စားတော့ပေ။
ယွဲ့တင့်ထန်က စာရွက်အနီကို လှန်ကြည့်ကာ ၎င်းနှင့်ဆော့ကစားနေ၏။
"ငါ့မှာ အကြံရှိတယ်။" သူက ပြုံးလိုက်သည်။ "ငါတို့တွေ လောင်းကြေးထပ်ကြရင်ရော? ဒါက ငါတို့နှစ်ယောက်လုံးအတွက် လက်ဆောင်ဖြစ်မယ်ဆို ငါနိုင်မယ်။ မင်းတစ်ယောက်တည်းအတွက်ဆို ငါရှုံးမယ်။ ဘယ်လိုလဲ။"
လင်ရှူးက မေးလိုက်၏။ "လောင်းကြေးက?"
ယွဲ့တင့်ထန်က ပြန်ဖြေလိုက်သည်။ "နိုင်တဲ့သူအတွက် တစ်ခုခုလုပ်ပေးကြေး။ ဒါပေမဲ့ တရားမဝင်တာမျိုး၊ လူ့ကျင့်ဝတ်နဲ့ ဆန့်ကျင်တဲ့အရာမျိုးတော့ ဖြစ်လို့မရဘူး။"
လင်ရှူးက ထိုအကြောင်းအား တွေးလိုက်ပြီး အရှုံးမရှိသလို ခံစားလိုက်ရသည်။
"ကောင်းပြီလေ၊ ဒါပေမဲ့ ငါတို့တွေ တရားဝင်ဖြစ်ဖို့အတွက် သက်သေလိုသေးတယ်။"
ယွဲ့တင့်ထန်က မေးလိုက်သည်။ "ငါ စကားမတည်မှာကို စိုးရိမ်နေတာလား။"
လင်ရှူးက လူလိမ္မာလေးလို ဟန်ဆောင်လိုက်၏။ "မင်းက ငါ့ရဲ့အထက်လူကြီး၊ ငါက မင်းရဲ့ လက်အောက်ငယ်သားလေ။ မင်းပြောသမျှကို ငါက ဘယ်လိုလုပ်ပြီး ပြန်ခံပြောရဲမှာလဲ။"
ယွဲ့တင့်ထန်က မေးလိုက်၏။ "ဒါဆို ဘယ်သူ့ကို သက်သေအဖြစ် အကြံပြုချင်လဲ။"
လင်ရှူးက ပြန်ဖြေခဲ့သည်။ "ချွင်းရှောင်ကျဲကို ရွေးလိုက်ကြရအောင်။ မင်းက သူ(မ)ရဲ့မောင်ဆိုပေမဲ့ သူ(မ)ရဲ့ သမာသမတ်ရှိမှုကို ငါ ယုံကြည်တယ်။"
ယွဲ့တင့်ထန်: "... ငါ မယုံဘူး။ သူ(မ)က မင်းကို ဘက်လိုက်မှာသေချာတယ်။ အဲ့လိုဆို ငါလည်း လင်ကျဲကို ရွေးလိုက်မယ်လေ။" လင်ယောင်က လင်ရှူး၏အကြောင်းပြချက်များကို သည်းခံမှာမဟုတ်ပေ။
လင်ရှူး၏ပါးစပ်များက တွန့်ချိုးသွား၏။ "ဒါဆို မင်းရဲ့ကျောင်းက စံပြပုဂ္ဂိုလ်ဖြစ်ပြီး သေချာပေါက် ဘက်မလိုက်မဲ့ တက္ကသိုလ်ပါမောက္ခတစ်ယောက်ယောက်ကို ရွေးလိုက်မယ်ဆိုရင်ရော?"
"အဲ့ဒါ အလုပ်ဖြစ်တယ်။" ယွဲ့တင့်ထန်က ခေါင်းညိတ်လိုက်၏။
မနက်ခင်းပိုင်းက အချင်းချင်း၏ ကိုယ်ပိုင်အလုပ်ကိစ္စများဖြင့် လျင်မြန်စွာ ကုန်ဆုံးသွားခဲ့သည်။ ယွဲ့တင့်ထန်က အိမ်စာများကို အလင်း၏အရှိန်ဖြင့် အမှတ်ပေးခဲ့ပြီး လင်ရှူးက စာအုပ်စင်ကနေ စာအုပ်တစ်အုပ်ကို ရွေးယူခဲ့သည်။
ယွဲ့တင်ထန်က အချိန်ခဏရတုန်း စာအုပ်၏ခေါင်းစဥ်ကို တစ်ချက်ခိုးကြည့်ခဲ့လေသည်။ 'လူမှုကိစ္စများကို ဆွေးနွေးခြင်း' ဝိုး၊ တော်တော်လေး နက်နဲပြီး လေးစားစရာကောင်းတာပဲ။
ယွဲ့တင့်ထန်မှာ အံ့အားသင့်သွားခဲ့သည်။ နာရီဝက်ကြာသော် သူက အိမ်စာများအမှတ်ပေးခြင်းကို လက်စသတ်လိုက်ပြီး မော့ကြည့်လိုက်ရာ စာအုပ်ကို ခေါင်းခုကာအိပ်နေသော လင်ရှူးအား တွေ့လိုက်ရလေသည်။
ယွဲ့တင့်ထန်: ...
***
Aurora Novel Translation Team