Morning Star

Summary

...

Description

ယန်ကျစ်ချန် သရဲခြောက်ခံနေရသည်။

သရဲမှာ တခြားသူတော့ မဟုတ်။ သူ့ရည်းစားဟောင်းပင်။

တစ်ချိန်က နူးညံ့သိမ်မွေ့ပြီး ဖြူစင်ရိုးသားလွန်းသော ထိုလူသည် ယခုအခါ ရေချိုးခန်းမှန်ထဲတွင် ဖျော့တော့သော မျက်နှာလေးဖြင့် ပေါ်လာပြီး သွေးစွန်းနေသော မျက်ရည်စီးကြောင်း နှစ်ကြောင်းမှာလည်း သူ့ပါးပြင်ပေါ်သို့ ဖြည်းညင်းစွာ စီးကျလာနေသည်။

ယန်ကျစ်ချန် ကြောက်အားလန့်အားဖြင့် အသံကုန် အော်ပစ်လိုက်၏။

"မင်းဘာလုပ်နေတာလဲ။"

စုန့်ကွမ်းနန်၏ မျက်လုံးများက အသက်ကင်းမဲ့နေသည်။

"မင်းငါ့ကိုသတ်လိုက်တာလေ။ အဲ့ဒါကြောင့် ငါ မင်းအသက်ကို လာယူတာ!"

ယန်ကျစ်ချန်မှာ လမ်းခွဲခဲ့တာ နှစ်နှစ်ကြာပြီဖြစ်ပြီး တစ်ကြိမ်မျှ ပြန်မတွေ့ခဲ့ရသော လူတစ်ဦးကို သူ မည်သို့သတ်ပစ်ခဲ့မိမှန်း အမှန်တကယ် နားမလည်နိုင်ခဲ့ချေ။

သို့ပေမယ့် စုန့်ကွမ်းနန်ကတော့ ဂရုမစိုက်ပါ။

ပထမနေ့တွင် ထိုလူက မှန်ထဲမှ တွားသွား ထွက်လာခဲ့သည်။

ဒုတိယနေ့တွင် သူ့ဖုန်းထဲမှ ခေါင်းထွက်လာ၏။

သုံးရက်မြောက်သော နေ့တွင်တော့ ပြတင်းပေါက်ကို ဖွင့်ကာ အခန်းထဲသို့ တွားသွားဝင်လာပြီး ယန်ကျစ်ချန်လည်ပင်းကို ခပ်တင်းတင်း ညှစ်လာခဲ့လေသည်။

ယန်ကျစ်ချန် ပြိုလဲသွား၏။

သို့ပေမယ့် တစ်နေ့မှာတော့ စုန့်ကွမ်းနန်၏ အေးစက်စက် နှုတ်ခမ်းပါးကို သူ မတော်တဆ နမ်းမိလိုက်သောအခါ ထိုသရဲကောင်လေးမှာ ရုတ်တရတ် အနည်းငယ် တုံ့ဆိုင်းသွားတော့သည်။

အနက်ရောင် အခိုးအငွေ့များကို မထုတ်လွှတ်တော့သလို အပြင်ဘက်မှ ပြတင်းပေါက်ပေါ်လည်း တွယ်တက်မလာတော့ချေ။

ထို့ကြောင့် သူ၏အသက်ကို ကယ်တင်ဖို့အလို့ငှာ ယန်ကျစ်ချန်လည်း တစ်ဖက်ကောင်လေးနှင့် မရေရာသော ဆက်ဆံရေးကို ထိန်းသိမ်းထားခဲ့ရသည်။

သို့သော်ငြားလည်း အနှီထိန်းသိမ်းထားလေသော ခင်မင်ရင်းနှီးမှုမှာ တဖြည်းဖြည်း မလုံလောက်တော့ပေ။ သူတို့ဆက်ဆံရေးသည် ယန်ကျစ်ချန်၏ ဘဝလမ်းကြောင်းကို ဦးတည်ရာ တစ်ခုဆီသို့ ဆွဲငင်သွားခဲ့လေသည်။

နီရဲသော မျက်လုံးများဖြင့် ယန်ကျစ်ချန်သည် စုန့်ကွမ်းနန်၏လက်ထဲ ချုပ်နှောင်ခံထားရသည့်ကြားမှ နောက်ဆုံးတွင် မနေနိုင်စွာ မေးလိုက်မိ၏။

“မင်းကို ငါသတ်ခဲ့တယ်လို့ ခံစားနေရရင်... ငါ့ကို မုန်းသင့်တယ်လို့ မထင်ဘူးလား။”

စုန့်ကွမ်းနန်မှ ယန်ကျစ်ချန်ကို တိတ်တဆိတ်ကြည့်ကာ ပြန်ဖြေလာသည်ကား။

"မထင်ဘူး။ ကိုယ် မင်းကို ကာကွယ်ချင်တယ်။"

...

ယန်ကျစ်ချန်မှာတော့ ထိုကာကွယ်ခြင်းဟူသော အဓိပ္ပာယ်ကို နားမလည်ခဲ့။ ၎င်းက ထိုနေ့ရောက်သည်အထိပင်။ သူ စုန့်ကွမ်းနန် သေဆုံးခဲ့သော မြင်ကွင်းကို မြင်ခဲ့ရသည်။

မီးခိုးရောင် ကောင်းကင်အောက်၌ အဝါရောင်စာရွက်များက လေထဲတွင် တဖျပ်ဖျပ် ခတ်နေ၏။ စာမျက်နှာ တစ်ခုစီတိုင်း၌ ယန်ကျစ်ချန်၏ နာမည်တစ်ခုတည်းကိုသာ ရေးသားထားပြီး လက်ရေးက ထူးခြားကာ အနီရင့်ရောင် ဖြစ်လေသည်။

ထိုအခိုက် စုန့်ကွမ်းနန်သည် ရှည်လျားသော ဓားရှည်တစ်လက်ကို လက်တစ်ဖက်တွင် ဆွဲကိုင်ထားပြီး သူ၏ အဝတ်အစားများက လေညင်းကြောင့် တဖျပ်ဖျပ်ခတ်လို့နေသည်။

ထို့နောက် ထိုသူသည် ဓားကို မဆိုင်းမတွပင် သူ၏ရင်ဘတ်ထဲသို့ ထိုးသွင်းလိုက်လေတော့သည်။

***

Aurora Novel Translation Team