ယွမ်ယယ် ဤရက်ပိုင်းအတွင်း Tiger Balm ဆေးဘူးကို သူ၏အိတ်ကပ်ထဲ အမြဲဆောင်ထားခဲ့သည်။ ဖန်းရှောက်ယိက အမှန်တကယ့်ကို ရက်အတော်ကြာတဲ့အထိ မသက်သာခဲ့ပေ။ ၎င်းတို့ရိုက်ရမည့်အခန်းက သိပ်မများသော်လည်း ချောချောမွေ့မွေ့ဖြစ်မနေချေ။ ဇာတ်ဝင်ခန်းတစ်ခုစီတိုင်းက အလွန်ဒုက္ခများနေခဲ့သည်။ စက်ချုပ်ဆရာအဖြစ်သရုပ်ဆောင်သူမှာ ထိုင်ဝမ်သရုပ်ဆောင်ဟယ့်ဟန်ဖြစ်သည်။ သူက ဖန်းရှောက်ယိထက် တစ်နှစ်၊ နှစ်နှစ်လောက်ငယ်ပြီး ယခုနှစ်မတိုင်ခင်အထိ နာမည်သိပ်မကြီးသေးဘဲ ရုတ်တရက်ဆိုသလို အောင်မြင်မှုတချို့ရလာခဲ့၏။ သို့သော် သူက သူပြောရမည့်စာသားများနှင့်ပတ်သက်၍ အလွန်ဆိုးရွားနေဆဲပင်။ သူ၏ထိုင်ဝမ်လေယူလေသိမ်းက အလွန်ပြင်းထန်နေသလို ဒါရိုက်တာကျန်းကလည်း နောက်ခံအသံပြန်ထည့်ခြင်းကို ငြင်းဆန်သည့်အတွက် ဇာတ်ဝင်ခန်းတစ်ခုစီတိုင်း အနည်းဆုံး တစ်ခေါက်တော့ ရိုက်ကူးရမည်သာ။
ဖန်းရှောက်ယိမှာ တော်တော်လေးပြင်းထန်သည့် ခေါင်းကိုက်ဝေဒနာကို ခံစားနေရဆဲဖြစ်သည်။ သူက ရိုက်ကူးရေးတစ်ခုနှင့်တစ်ခုကြား နားချိန်တွင် လုံးဝစကားမပြောခဲ့ပေ။ ဒါရိုက်တာက တစ်ခုခုဖြစ်လို့လားဟု လာရောက်မေးမြန်းရာ ဖန်းရှောက်ယိက ခေါင်းယမ်းကာ ဘာမှမဖြစ်ဟုသာ ပြောခဲ့သည်။
ရိုက်ကူးနေချိန်အတွင်း ယွမ်ယယ် ဖန်းရှောက်ယိ၏ခုံတွင် ထိုင်နေပြီး ဇာတ်ညွှန်းကို ကြည့်နေ၏။ သူက ဘောပင်တစ်ချောင်းကိုင်ထားပြီး ဇာတ်ညွှန်းပေါ် ဟိုခြစ်ဒီခြစ်ဖြင့် ရေးခြစ်နေသည်။ ထို့နောက် ဇာတ်ညွှန်းကိုပြန်ပြင်ရန်အတွက် ဆွေးနွေးဖို့ ဒါရိုက်တာကို သွားရှာခဲ့သည်။ သူ ဖန်းရှောက်ယိနှင့် စက်ချုပ်ဆရာကြားက အပြန်အလှန်စကားပြောခန်းများကို လျှော့ချချင်နေပြီး အခြားသောသရုပ်ဆောင်များအတွက် စာသားတချို့ပိုပေးချင်ခဲ့သည်။ ဒါရိုက်တာက သူ့ကို တိုက်ရိုက်မငြင်းလိုက်ဘဲ အချိန်အတော်ကြာဆွေးနွေးနေခဲ့သည်။ ဇာတ်ညွှန်းပြန်ပြင်ခြင်း၌ ယွမ်ယယ်တွင် တစ်ကိုယ်ကောင်းဆန်သောရည်ရွယ်ချက်လေး ရှိနေပေသည်။ သို့သော် ပြင်ဆင်ထားသောဗားရှင်းမှာလည်း ယုတ္တိရှိပေ၏။ ၎င်းက ဇာတ်ကောင်များအား ပို၍စိတ်ဝင်စားအောင် ပြုလုပ်ပေးနိုင်သည်။ ထိုညက အလုပ်ပြီးနောက် ဒါရိုက်တာက ယွမ်ယယ်ကို ခေါ်ခဲ့သည်။ ၎င်းတို့နှစ်ဦး ညတစ်ဝက်လောက်ထိ ထိုဇာတ်ညွှန်းအကြောင်းကို ဆွေးနွေးနေခဲ့ကြပြီး ပြောင်းလဲထားသည့်ဇာတ်ညွှန်းကိုသုံးဖို့ ဆုံးဖြတ်ခဲ့ကြသည်။
သို့သော်လည်း နောက်ဆုံးမှာတော့ ယွမ်ယယ် မအောင်မြင်ခဲ့ပေ။
ဟယ့်ဟန်က ဖန်းရှောက်ယိကို လာရှာခဲ့သည်။ သူက အလွန်ယဥ်ကျေးစွာဖြင့် သူ၏သရုပ်ဆောင်စွမ်းရည်က မလုံလောက်လို့လားဟု မေးမြန်းခဲ့သည်။
ဖန်းရှောက်ယိက လက်ဝှေ့ယမ်းက အပြုံးလေးဖြင့် "ဘယ်ကသာ" ဟု ပြန်ပြောခဲ့သည်။
"ဒါဆို ကျွန်တော် စိတ်အေးသွားပါပြီ ရှောက်ယိကော။" ဟယ့်ဟန်က ပြောလာသည်။ "ကျွန်တော်က အရမ်းညံ့လို့ ကော ကျွန်တော်နဲ့ထပ်ပြီး သရုပ်မဆောင်ချင်တော့မှာကို စိုးရိမ်နေတာ။"
ထိုအချိန်က ယွမ်ယယ်တစ်ယောက် ဘေးမှနေ၍ သူ့ကို တစ်ချက်ကြည့်လိုက်၏။ ထို့နောက် တစ်ဖက်လှည့်ကာ စီးကရက်ကိုမီးညှိလိုက်လေသည်။
ဟယ့်ဟန်ထွက်သွားပြီးနောက် ယွမ်ယယ်က ပြောလိုက်သည်။ "သူက ဇာတ်ဝင်ခန်းတွေထပ်မလိုချင်ဘူးလား။ သူဘာဖြစ်ချင်နေတာလဲ။"
ဖန်းရှောက်ယိက မျက်လုံးများမှိတ်ကာ ပြောလာ၏။ "သူ့မှာ ဇာတ်ဝင်ခန်းတွေပိုများသွားပေမဲ့ အဓိကဇာတ်ကောင်နဲ့ သူ့ရဲ့ဇာတ်ကောင်ကြားမှာ အပြန်အလှန်ဆက်ဆံရမဲ့အခန်းတွေ နည်းသွားတယ်လေ။ ဒါ့ကြောင့် သူက လက်မခံတာ။"
ဟယ့်ဟန်ဘက်မှ သဘောမတူသောကြောင့် ၎င်းတို့ ဇာတ်ညွှန်းကို မပြောင်းခဲ့ရပေ။ ဒါရိုက်တာက ယွမ်ယယ်ကို သီးသန့်ခေါ်တွေ့၍ ပြောလာခဲ့သည်။ "ကိစ္စမရှိပါဘူး။ မဟုတ်လည်း ငါတို့ရိုက်ကူးရမဲ့ရက်က သိပ်မကျန်တော့ဘူးပဲ။ မူလဇာတ်ညွှန်းအတိုင်းပဲ သွားကြတာပေါ့။"
ထိုအချိန်တွင် ယွမ်ယယ်က မေးလိုက်၏။ "ကျွန်တော်တို့ သဘောတူပြီးသားမဟုတ်ဘူးလား။ ဒါရိုက်တာ၊ ပြင်ထားတဲ့ဗားရှင်းက ပိုကောင်းတယ်လေ။"
၎င်းမှာ ညာပြောနေခြင်းမဟုတ်ပေ။ ၎င်းက အဓိကဇာတ်ဆောင်၏အခန်းတချို့ကို ဖြုတ်ချလိုက်သော်လည်း ပန်းပဲသမားနှင့် စက်ချုပ်ဆရာဇာတ်ကောင်အတွက် ဇာတ်ဝင်ခန်းတချို့ပိုထည့်ပေးခဲ့သည်။ ယင်းကြောင့် ထိုဇာတ်ကောင်နှစ်ခုလုံးကို ပို၍လက်တွေ့ဆန်စေခဲ့၏။ ဒါရိုက်တာကလည်း ၎င်းကို သဘောတူခဲ့သည်။ သို့သော် အဆုံးတွင် သူက ယွမ်ယယ်အား 'ကိစ္စမရှိပါဘူး' ဟုသာ ပြောခဲ့လေ၏။
အရင်က ဟယ့်ဟန်သည် အနေအထားမမြင့်သည့် သရုပ်ဆောင်ငယ်လေးတစ်ယောက်သာ။ ကျန်းလင်းချွမ်၏ရုပ်ရှင်တွင် ပါဝင်နိုင်ခြင်းက ကောင်းချီးတစ်ခုဖြစ်နေပြီဖြစ်သည်။ သို့သော် ယခုတွင် မတူတော့ပေ။ သူ့မှာ သကြားဖေဖေရှိနေ၏။ ၎င်းတို့၏ရုပ်ရှင်က အကြီးစားထုတ်လုပ်ရေးအတွက်တော့ သေးငယ်သည့်ဇာတ်ကားတစ်ခုသာ။ ကျန်းလင်းချွမ် မည်မျှပင်ဦးဆောင်နေပါစေ၊ သူက ရင်းနှီးမြှုပ်နှံသူ၏အကြုံပြုချက်ကို မငြင်းဆန်နိုင်ပေ။ ဟယ့်ဟန်၏စပွန်ဆာက ထိုရုပ်ရှင်၏ အကြီးဆုံးရင်းနှီးမြှုပ်နှံသူဖြစ်သည်။ မည်သို့ပင်ဖြစ်စေ ထိုအသေးအမွှားပြောင်းလဲမှုများက သိပ်အရေးမကြီးပေ။ ၎င်းတို့က ပင်မဇာတ်ကြောင်း၏ အပိုင်းများမဟုတ်ရာ ၎င်းတို့က အဓိကမကျပေ။ ထိုပြောင်းလဲမှုသေးသေးလေးအတွက် စကားအချေအတင်ဖြစ်ရန်လည်း မလိုအပ်ပေ။
တကယ်တော့ ယွမ်ယယ် ဟယ့်ဟန်ဘက်မှ အကြောင်းပြချက်ကို လုံးဝနားမလည်နိုင်ချေ။ ဇာတ်ညွှန်းရေးဆရာတစ်ယောက်အမြင်ဖြင့် ပြင်ဆင်ထားသောစက်ချုပ်ဆရာဗားရှင်းက မူလဗားရှင်းထက် ပို၍သက်ဝင်ပေ၏။ အဓိကဇာတ်ကောင်နှင့် ပြောဆိုဆက်ဆံရမည့်အခန်းတချို့ကိုပယ်ခဲ့သော်လည်း ထိုအပြောင်းအလဲက လုံးဝကို အကျိုးများပေသည်။ နောက်ရက်အနည်းငယ်တွင် ဖန်းရှောက်ယိမှာ ဆက်လက်ရိုက်ကူးရန် ခေါင်းကိုက်ပျောက်ဆေးကိုတောင် သောက်ခဲ့ရသည်။ သူက အနံ့များနှင့်ပတ်သက်၍ အလွန်မထိမခံပေ။ ထိုနေရာ၌ နေ့နေ့ညညနေခြင်းက သူ့ကိုမဆိုထားနှင့် ယွမ်ယယ်ကိုတောင် အဆင်မပြေဖြစ်စေခဲ့သည်။ ထို့ပြင် ဟယ့်ဟန်က သူ၏အခန်းများကို ကောင်းကောင်းမလုပ်နိုင်ဘဲ သရုပ်ဆောင်များမှာ ခဏခဏပြန်ရိုက်ရတာကို ကြောက်နေကြသည်။ လက်ညှိုးညွှန်လိုက်သည်နှင့် မည်သူကမှ ဇာတ်ကောင်ထဲကို နစ်ဝင်မသွားနိုင်ချေ။ ထပ်ခါတလဲလဲချဥ်းကပ်မှုများကသာ ယခင်စိတ်ခံစားချက်ထဲ နစ်မြုပ်ထားနိုင်လိမ့်မည်။
ယွမ်ယယ်က ဟယ့်ဟန် ပါးစပ်ဖွင့်ကာ သူ၏ထိုင်ဝမ်လေယူလေသိမ်းဖြင့် စကားစပြောသည်ကို စောင့်ကြည့်နေခဲ့သည်။ သူက မျက်မှောင်ကြုတ်လိုက်ပြီး ၎င်းက ကောင်းကောင်းအဆုံးသတ်လိမ့်မည်မဟုတ်သည်ကို သိလိုက်ပေ၏။
မျှော်လင့်ထားသလိုပင် ဒါရိုက်တာက 'cut' ဟု အော်ခဲ့သည်။
ဟယ့်ဟန်က ပြောလာ၏။ "တောင်းပန်ပါတယ်၊ တောင်းပန်ပါတယ်။ ကျွန်တော် ထပ်မေ့သွားလို့။ တောင်းပန်ပါတယ် ဒါရိုက်တာ၊ တောင်းပန်ပါတယ် ရှောက်ယိကော။"
ဖန်းရှောက်ယိက ခေါင်းယမ်းကာ ပြောလိုက်သည်။ "ရပါတယ်။ ဒီလိုမျိုးက ဖြစ်နေကျပဲလေ။"
ယွမ်ယယ်မှာ ကြည့်နေရင်း အလွန်ဒေါသလာသည်။ သူသည် ထိုနေရာ၌ထိုင်နေရင်း တိုးတိုးလေးဆဲရေးလိုက်သည်။ "စိတ်ပျက်စရာကောင်းတဲ့ချီးထုတ်ပဲ။"
နောက်တစ်ခန်းတွင်လည်း ဒါရိုက်တာက ရိုက်နေရင်းတစ်ဝက်တွင် 'cut' ဟုအော်ခဲ့ပြန်သည်။ သူသည် စပီကာမှတစ်ဆင့် ပြောလိုက်၏။ "စိတ်ခံစားချက်တွေ မပါလာသေးဘူး။"
ဖန်းရှောက်ယိက လက်ဟန်အမူအရာဖြင့် ပြောခဲ့သည်။ "တောင်းပန်ပါတယ်၊ နောက်တစ်ခေါက် ထပ်ရိုက်ကြမယ်။"
"သူ့မှာ ဘာသောက်ကျိုးနည်းစိတ်ခံစားချက်မှ မရှိနေဘူး..." ကျီရှောင်ထောင်းကလည်း ထိုင်နေရင်း တိုးတိုးလေးဆဲလိုက်သည်။ "သူက ရှောင်ယန်လောက်တောင် မတော်ဘူး။ ရှောင်ယန်တောင် သူ့လောက် 'cut' လို့ အော်ခံရတာ မများဘူး။"
ရိုက်ကူးရေးပြီးနောက် ဖန်းရှောက်ယိမိတ်ကပ်ဖျက်ပြီးသောအခါ သူ၏မျက်နှာမှာ ပို၍ပင်ဖြူဖျော့နေခဲ့သည်။ အမှန်တကယ်တော့ ၎င်းတို့သာ ထိုအခန်း(ဆေးသုတ်ထားတဲ့အခန်း)မှ ရက်အနည်းငယ်လောက် ထွက်လာနိုင်လျှင် အနံ့က ထိုမျှလောက်အရမ်းမဆိုးလောက်ပေ။ သို့သော် ၎င်းတို့တွင် အချိန်သိပ်မကျန်တော့ချေ။ ထိုဇာတ်ကားပြီးနောက် သူ(ဟယ့်ဟန်)က နောက်ရိုက်ကွင်းတစ်ခုကို တိုက်ရိုက်သွားရမည်ဖြစ်သည်။ သူ(ဟယ့်ဟန်)က စာချုပ်တောင်ချုပ်ထားပြီးဖြစ်ကြောင်း ပြောခဲ့သည်။
ယွမ်ယယ်တစ်ယောက် ကျီရှောင်ထောင်းမှ ၎င်းတို့(ဟယ့်ဟန်)ခနောက်ရိုက်ကွင်းတစ်ခုကို သွားရမည်ဟု ပြောလာသောအခါ ရယ်မောခဲ့သည်။ "ဘယ်ရိုက်ကွင်းအဖွဲ့သားတွေက နွေဦးပွဲတော်မတိုင်ခင်လေးမှာ ရိုက်ကူးရေးစရလောက်အောင်ထိ ဆိုးလို့လဲ။"
ဟယ့်ဟန် သူ၏အခန်းများကို ရိုက်ကူးပြီးစီးသွားသောအခါ အခြေခံအားဖြင့် နွေဦးပွဲတော်တောင်ရောက်နေလောက်ပြီဖြစ်သည်။ ရိုက်ကွင်းအများစုက ထိုအချိန်အတောအတွင်း အနားယူတတ်ကြသည်။ ထိုကဲ့သို့အချိန်တွင် မည်သည့်ရိုက်ကူးရေးအဖွဲ့သားကမှ သရုပ်ဆောင်တစ်ယောက်ကို ၎င်းတို့၏ရိုက်ကွင်းသို့လာစေမည်မဟုတ်ပေ။ သူသွားလျှင်တောင် ၎င်းတို့အနားယူသည့်အချိန်ဖြစ်နေမည်သာ။ ပုံမှန်အားဖြင့် အားလပ်ရက်များပြီးသည်အထိ ရိုက်ကူးရေးစမည်မဟုတ်ပေ။ ထို့ကြောင့် သူ၏အကြောင်းပြချက်က အတော်လေးအတုအယောင်ဆန်ပေ၏။ သို့သော် ၎င်းမှာ သူပေးသည့်ဆင်ခြေဖြစ်သဖြင့် ၎င်းတို့လက်ခံရမည်သာ။ ရိုက်ကူးရေးပြီးနောက် အနံ့မှာလည်း အတော်လေးမှေးမှိန်သွားပြီဖြစ်သည်။ ထိုအချိန်တွင် ဖန်းရှောက်ယိမှာ သုတ်ဆေးအနံ့ဖြင့် အဆိပ်သင့်သလိုတောင်ဖြစ်ခဲ့ရသည်။
ဖန်းရှောက်ယိက ဆေးသောက်ပြီးနောက် စောစောအိပ်ခဲ့သည်။ အိပ်နေတာတောင် သူ၏အသက်ရှူသံက လေးလံနေခဲ့၏။ ယွမ်ယယ်က ပုံမှန်အားဖြင့် ဖန်းရှောက်ယိအိပ်ပျော်သွားလျှင် သူ၏အခန်းသို့ပြန်သွားတတ်သော်လည်း ဒီအတောအတွင်း သူ၏စိတ်အခြေအနေမှာလည်း ကောင်းမနေပေ။ သူက အလွန်ဒေါသထွက်နေပြီး မည်သူ့ပေါ် ဒေါသဖွင့်ထုတ်ရမည်ကို မသိနေပေ။
- အဓိကဇာတ်လမ်းဖန်တီးသူတွေကို အပြစ်တင်ရမှာလား။ သုတ်ဆေးအရောင်မှားနေလျှင် စောစောကတည်းက ဘာဖြစ်လို့မပြင်တာလဲ။
၎င်းမှာ အကျိုးကြောင်းမသင့်ပေ။ ရိုက်ကွင်းအား ရိုက်ကူးရေးမစတင်ခင်ကတည်းက ကြိုတင်ပြင်ဆင်ရမည်မှာ အခြေခံကျသောအချက်ဖြစ်သည်။ ပစ္စည်းအဖွဲ့သားများက ရိုက်ကူးရေးအတွက် ပတ်ဝန်းကျင်နှင့်ကိုက်ညီသောအရောင်ကိုရှာရန် အချိန်မရှိပေ။ ၎င်းမှာ ပြဿနာမဟုတ်ပေ။
-ဟယ့်ဟန်ကို အပြစ်တင်ရမှာလား။
သူက ဇာတ်ညွှန်းအပြောင်းအလဲကို လက်မခံဘဲ ယခုတွင် သူ၏ရိုက်ကူးရေးနှင့်ပတ်သက်၍ ရှုပ်ရှုပ်ယှက်ယှက်လုပ်နေပြီး သူ၏ဇာတ်ဝင်ခန်းများကိုလည်း ကောင်းကောင်းမလုပ်နိုင်ပေ။ သူက အချိန်ကို ပြောင်းရန်လည်း ဆန္ဒမရှိချေ။ သို့သော်လည်း သူ ထိုသို့လုပ်ရန်မလိုအပ်ပေ။ ထိုအရာများထဲတွင် တစ်ခုမှ အကျိုးကြောင်းမသင့်ခေိ။
သိသာစွာပင် ၎င်းက သူတစ်ယောက်တည်း၏ပြဿနာသာ။
...
နှစ်ကူးအကြိုနေ့တွင် ဖန်းရှောက်ယိက ရိုက်ကွင်းတစ်ခုလုံးကို ညစာဝယ်ကျွေးခဲ့သည်။ သူက ရိုက်ကွင်းသို့ပို့ပေးရန် နှစ်သစ်ကူးညစာအများကြီးကို မှာယူခဲ့သည်။ တစ်ဆိုင်လုံးနီးပါးဝယ်ယူခဲ့ပြီး ဝန်ထမ်းများအားလုံးကို လာရောက်စားသုံးရန် ဖိတ်ခေါ်ခဲ့၏။ ဖန်းရှောက်ယိက ရိုက်ကွင်းတွင် ပွဲတော်ကျင်းပသောအားလပ်ရက်နှင့်ကြုံတိုင်း ထိုကဲ့သို့ပင်။ သူက ပွဲတော်တစ်ခုစီတိုင်းကို ကျင်းပတတ်ပြီး တစ်ခုလေးမှ အလွတ်မခံချေ။ သို့သော် သူကိုယ်တိုင်ကတော့ နည်းနည်းလေးသာစားခဲ့သည်။ ဤရက်အနည်းငယ်အတွင်း သူ ကိုယ်အလေးချိန်ကျသွားခဲ့ရသည်။
ညရောက်သော် ယွမ်ယယ်က သူနှင့်အတူလမ်းလျှောက်ကာ ပြန်လာခဲ့သည်။ ၎င်းတို့၏ဦးခေါင်းတစ်ခုလုံး သုတ်ဆေးအနံ့နှင့်ပြည့်နှက်နေရာ ၎င်းတို့၏မျက်နှာကို လေညှင်းလေးများ ဖြတ်တိုက်သွားစေပြီး စိတ်ကို လန်းဆန်းစေလိုက်၏။ ယွမ်ယယ်က ဖန်းရှောက်ယိကိုမေးလိုက်သည်။ "မင်း အဆင်ပြေလား။ မင်း ပင်ပန်းနေရင် ရှောင်ထောင်းကို ငါတို့ကိုလာခေါ်ဖို့ပြောလိုက်မယ်။"
"ကိုယ်အဆင်ပြေပါတယ်။" ဖန်းရှောက်ယိ၏အသံက အနည်းငယ်အက်ရှနေ၏။ ထိုသို့ပြောပြီးနောက် လည်ချောင်းရှင်းကာ နူးညံ့စွာရယ်လိုက်သည်။ "အသက်ကြီးလာပြီလေ။"
"ခြေရာခံလိုက်တဲ့ ဇာတ်ကောင်နေရာကိုရိုက်ရတဲ့ချာတိတ်က နှစ်ဆယ့်လေးနှစ်ပဲရှိသေးတာ။ သူတောင် မထနိုင်ဘူး။" ယွမ်ယယ်ကပြောလိုက်သည်။ "သူက မင်းထက်တောင်ပိုဆိုးတယ်။ မင်းက ဆက်ပြီး ရိုက်ကူးရေးလုပ်နိုင်ပေမဲ့ အဲ့ချာတိတ်ကိုဆို ဒါရိုက်တာက အနားပေးလိုက်ရတယ်။ သူ နှစ်သစ်ကူးပြီးရင်တောင် ပြန်လာနိုင်မှာမဟုတ်ဘူး။"
ဖန်းရှောက်ယိက ဘာမှပြောမလာချေ။ သူက ယွမ်ယယ်နှင့် ဖြည်းဖြည်းချင်း လမ်းလျှောက်နေခဲ့သည်။ ယွမ်ယယ်က ဆက်ပြောလာ၏။ "ဒီနေရာမှာသာ တခြားသူဆို သူတို့တွေ ဒီကိစ္စတွေကို ဂရုစိုက်မှာမဟုတ်ဘူး။ အနံ့ပျောက်သွားတော့မှသာ ရိုက်ကူးရေးကိုပြန်စမှာပဲ။"
ဖန်းရှောက်ယိက ပြုံးလျက် ပြောလာ၏။ "မလိုပါဘူး။"
ဟယ့်ဟန်က အလျင်လိုနေခဲ့သည်။ ထို့ပြင် ၎င်းတို့စာချုပ်ချုပ်ဆိုစဥ်က နှစ်ကူးအထိသာ လက်မှတ်ထိုးထားခြင်းဖြစ်၏။ ဖန်းရှောက်ယိသာ ဆက်ပြီးမရိုက်ကူးနိုင်တော့ဘူးဟုပြောလာလျှင် ဒါရိုက်တာအတွက် ဒုက္ခရောက်သွားလိမ့်မည်။ တကယ်တော့ ယန်စစ်ရန်၏စာချုပ်ကလည်း နှစ်ကူးအထိသာဖြစ်သော်လည်း ၎င်းတို့က ဟယ့်ဟန်၏အခန်းများကိုသာ နှစ်ကူးမတိုင်ခင် အလျင်အမြန်ဆက်လက်ရိုက်ကူးနေခဲ့သည်။ ၎င်းတို့ရိုက်ကူးရေးမြန်မြန်ပြီးလေ သူစောစောထွက်သွားနိုင်လေဖြစ်သည်။ ထို့ကြောင့် ယန်စစ်ရန်ဘက်မှ အချိန်အကြောင်းလုံးဝမပြောခဲ့ပေ။ မည်သို့ပင်ဖြစ်စေ သူက ယခုတွင် နာမည်ကြီးတစ်ယောက်မဟုတ်သေးပေ။ သူ၏အလုပ်အချိန်ဇယားမှာ ပြည့်ကျပ်နေခြင်းမရှိချေ။
ဒါရိုက်တာက ယန်စစ်ရန်၏အချိန်ကို နောက်နည်းနည်းဆုတ်ရမည်ဖြစ်ကြောင်း ဖန်းရှောက်ယိကို ပြောထားပြီးဖြစ်သည်။ ဖနိးရှောက်ယိကလည်း ဒါရိုက်တာကို စိတ်မပူရန်နှင့် ရိုက်ကူးရေးကိုသာဆက်လုပ်ရန် ပြောခဲ့သည်။
ဖန်းရှောက်ယိက အပျော့စားအဆိပ်သင့်ခြင်းဝေဒနာခံစားခဲ့ရသည်။ အဆင်မပြေမှုကိုသည်းခံရင်း လွန်ခဲ့သောရက်အနည်းငယ်က ရိုက်ကူးရေးပြီးဆုံးခဲ့သောကြောင့် နောက်ဆုံးတွင် ၎င်းတို့ဘက်မှာ သက်ပြင်းချနိုင်ခဲ့တော့သည်။ နောက်ထပ်ရက်အနည်းငယ်လောက်သာ ဆက်လက်ရိုက်ကူးရမည်ဆိုလျှင် ဖန်းရှောက်ယိတစ်ယောက် သူစိတ်ရှိလျှင်တောင် ပါဝင်နိုင်တော့မည်မဟုတ်ပေ။ နှစ်သစ်ကူးအတွက် လူတိုင်း အားလပ်ရက်ငါးရက်ရခဲ့သည်။ နောက်ဆုံးအခန်းကိုရိုက်ကူးပြီးစီးခဲ့သောကြောင့် ၎င်းတို့မှာ အနားယူနိုင်ခဲ့ကြသည်။
ယွမ်ယယ်က ပြန်သွားရန် အစီအစဥ်မရှိပေ၊ သူက ကျီရှောက်ထောင်းကို အားလပ်ရက်ဆယ်ရက်ပေးကာ အိမ်ကနေ အလျင်စလိုပြန်လာဖို့မလိုကြောင်း ပြောခဲ့သည်။ မည်သို့ပင်ဖြစ်စေ ရိုက်ကွင်းတွင် အရေးတကြီးလုပ်စရာမရှိပေ။ နှစ်စဥ်နှစ်တိုင်း ဖန်းရှောက်ယိသည် ကျီရှောင်ထောင်းမပြန်ခင် ပိုက်ဆံတချို့လွှဲပေးတတ်၏။ ၎င်းကို နှစ်ကုန်ဘောနပ်စ်အဖြစ်ယူဆနိုင်ပေသည်။ ကျီရှောင်ထောင်း၏လစာက အတော်လေးများ၏။ ယခုဆိုလျှင် သူတို့၏ဆက်ဆံရေးမှာ သူဌေးနှင့်အလုပ်သမားဆက်ဆံရေးလောက် မရိုးရှင်းတော့ပေ။ ဖန်းရှောက်ယိက အလွန်ကြင်နာသနားတတ်ပြီး ကိစ္စတိုင်းတွင် သူ့ကိုလည်း ထည့်စဥ်းစားပေးတတ်သည်။
ကျီရှောင်ထောင်း အိမ်မပြန်ရသည်မှာလည်း တစ်နှစ်နီးပါးရှိနေလေပြီ။ သူ၏မိဘများကလည်း သူ့ကိုသတိရနေကြ၏။ သူက လေယာဥ်လက်မှတ်များကြိုဖြတ်ထားခဲ့ပြီး အိမ်မပြန်ရန် ဘာအကြောင်းပြချက်မှ မရှိဘဲ။
ရိုက်ကွင်းမှာ လျင်မြန်စွာနှင့်ပင် တစ်ဝက်လောက်ဗလာကျင်းသွားခဲ့သည်။ ကျန်နေသောတစ်ဝက်က ခရီးသွားခြင်းကိုရင်မဆိုင်ချင်သော့ကြောင့်ပေ။ ၎င်းတို့က ဤနွေဦးပွဲတော်အတွင်း လူစုလူဝေးကြား တိုက်ပွဲမဝင်လိုကြပေ။ ပြန်သွားသောလူအများစုမှာ ဝန်ထမ်းများနှင့် လက်ထောက်များဖြစ်၏။ အရေးပါသောနေရာများမှလူများမှာ မပြန်ခဲ့ကြပေ။ ယွမ်ယယ်က ဖန်းရှောက်ယိအတွက် ချက်ပြုတ်ပေးရန် ဟိုတယ်စားသောက်ဆိုင်၏ မီးဖိုချောင်ကို ရံဖန်ရံခါ အသုံးပြုတတ်သည်။ ဖန်းရှောက်ယိကလည်း သူချက်ပေးတာမှန်သမျှကို ကြိုက်ပေသည်။
ဘဝမှာ ရုတ်တရက်ဆိုသလို ရပ်တန့်သည့်ခလုတ်ကို နှိပ်လိုက်သလိုနှယ်။ ၎င်းတို့၏ အလျင်အမြန်လျှောက်လှမ်းနေခဲ့ရသော အလုပ်က ရုတ်ချည်းပျောက်ကွယ်သွားခဲ့သည်။ ပတ်ဝန်းကျင်လေထုမှာလည်း နူးညံ့ကာ နွေးထွေးလှသည်။ ၎င်းတို့နှစ်ဦး ထိုသို့သောအချိန်လေးကို မကြုံတွေ့ရသည်မှာ ကြာနေပြီဖြစ်သော်လည်း မရင်းနှီးသလို မခံစားခဲ့ကြရပေ။
နှစ်သစ်ကူးပွဲနေ့တွင် ယွမ်ယယ်နှင့်ဖန်းရှောက်ယိတို့နှစ်ဦးလုံး အိမ်သို့ဖုန်းခေါ်ခဲ့ကြသည်။ သို့သော် သူတို့နှစ်ဦး၏ လက်ရှိဆက်ဆံရေးမှာ အနည်းငယ်ကြောင်တောင်တောင်နိုင်လှသည်။ ထို့ကြောင့် ၎င်းတို့သည် တစ်ယောက်စီ၏မိဘများကို များများစားစားမပြောဘဲ WeChat ကနေတစ်ဆင့်သာ ဆုတောင်းစကားများပို့လိုက်ကြသည်။
ကျန်ခဲ့သောရုပ်ရှင်အဖွဲ့သားများက အတူတူ ပျော်ပွဲဆင်နွှဲခဲ့ကြသည်။ ထို့နောက် အဓိကသရုပ်ဆောင်များက ဒါရိုက်တာ၏အခန်း၌ သောက်ဖိုသွားခဲ့ကြသည်။ ကျန်းလင်းချွမ်က အယ်လ်ကိုဟောကို ခံနိုင်ရည်ရှိသောသူဖြစ်သည်။ လက်ရှိအခြေအနေအရ ဖန်းရှောက်ယိမှာ အရက်ထပ်သောက်ရန်မဖြစ်နိုင်ပါချေ။ ယွမ်ယယ်ကလည်း ပိုင်ကျို(အရက်ဖြူ)နှစ်ခွက်လောက်သာသောက်ခဲ့သည်။ သူ ယနေ့တွင် မူးမနေချင်ပေ။ ၎င်းတို့နှစ်ယောက်သောက်သည့်ပမာဏက ဒါရိုက်တာကိုမမီချေ။ ဒါရိုက်တာက သူတို့ကိုရယ်မောကာ ပြောလာ၏။ "မင်းတို့ရဲ့ အရက်သောက်နိုင်စွမ်းကိုကြည့်စမ်း။ မင်းတို့တွေ စပွန်ဆာတွေ၊ ရင်းနှီးမြှုပ်နှံသူတွေမလိုအပ်တာတော်သေးတယ်။ မဟုတ်ရင် မင်းတို့ဘာလုပ်နိုင်ဦးမှာလဲ။"
ယွမ်ယယ်က ပြုံးလျက် ပြောလိုက်သည်။ "လောင်ရှီးတို့ ကျွန်တော်တို့ကို အသက်ရှင်ခွင့်လေးပေးပါဦး။ နောက်ပြီးရင် မီးပန်းဖောက်ဖို့လည်း ပြင်ဆင်ဖို့လိုသေးတယ်။ ကျွန်တော်သာ ထပ်သောက်လိုက်ရင် မီးတောင်ညှိနိုင်တော့မှာမဟုတ်ဘူး။"
အရက်လေးသောက်ပြီးသွားလျှင် ညစ်ညစ်ပတ်ပတ်ဟာသများကလည်း ဘယ်တော့မှမပါမရှိပေ။ အထူးသဖြင့် ယခုတွင် လူတိုင်း နည်းနည်းလေးမူးနေကြပြီဖြစ်သည်။ လက်ထောက်ဒါရိုက်တာက ပြောလာ၏။ "မင်းတို့တွေ မီးပန်းသွားဖောက်မယ်လို့တော့ ငါမထင်ပါဘူး။ အခု မင်းတို့အရက်သောက်နေတာကလည်း မိန်းကလေးတွေလို နည်းနည်းလေးပဲသောက်နေကြတာ။ မင်းတို့ပြန်ရောက်ရင် ဘာလုပ်ဖို့စီစဥ်ထားသလဲဆိုတာ ဘယ်သူသိမှာလို့လဲ။"
အခန်းထဲရှိလူတိုင်းက ရယ်မောခဲ့ကြသည်။ ဤကဲ့သို့အခြေအနေမျိုးတွင် မည်သူကမှ ညစ်ပတ်သောဟာသများကို အတည်မယူတတ်ကြပေ။ ယွမ်ယယ်က လက်ဝှေ့ယမ်းပြလိုက်သည်။ ထိုအခြေအနေတွင် သူလုပ်ရမည့်အရာမှာ တိတ်တဆိတ်နေခြင်းသာဖြစ်ပြီး ထိုကိစ္စအား တုံ့ပြန်နေစရာမလိုပေ။ သူက တစ်ဖက်လှည့်ကာ ဖန်းရှောက်ယိကို ကြည့်လိုက်သည်။ ထို့နောက် သူ့နံဘေးကပ်သွားပြီး တိုးတိုးလေးမေးလိုက်၏။ "အဆင်ပြေလား။ ခေါင်းကိုက်နေသေးလား။"
ဖန်းရှောက်ယိက ခေါင်းယမ်းပြလိုက်သည်။ သူ၏အကြည့်မှာလည်း ရှင်းလင်းမနေပေ။ ခေါင်းကိုက်ခြင်းနှင့် အရက်ပေါင်းစပ်သွားသောအခါ သူ့ကို အနည်းနှင့်အများတော့ ရီဝေဝေဖြစ်စေခဲ့သည်။ သူက ယွမ်ယယ်ကိုကြည့်ကာ ပြောလိုက်သည်။ "ဟင့်အင်း။"
ယွမ်ယယ်က ထပ်မေးလိုက်၏။ "ဒါဆို ခေါင်းမူးနေသလိုခံစားရသေးလား။"
ဖန်းရှောက်ယိက မျက်တောင်ခတ်ကာ ဖြည်းဖြည်းချင်းပြောလာခဲ့သည်။ "နည်းနည်းလို့ ထင်တာပဲ။"
ယွမ်ယယ်က ရယ်မောလိုက်လေ၏။ "ဒါဆိုလည်း ဟုတ်ပါပြီ။ သွားကြတော့မလား။"
သူက ဖန်းရှောက်ယိထံမှ အဖြေကိုစောင့်မနေဘဲ ထရပ်ကာ အားလုံးကိုပြောလိုက်သည်။ "အားလုံးပဲ ဆက်သောက်နေခဲ့ကြပါ။ ကျွန်တော်တို့နှစ်ယောက် အရင်ပြန်နားလိုက်ပါဦးမယ်။"
လက်ထောက်ဒါရိုက်တာသည် စောစောက သူတို့နှစ်ယောက်ကို စနောက်လုပ်ခဲ့ပြီး ယခုတွင် ယွမ်ယယ်က ပြန်သွားတော့မည်ဟု ပြောလာရာ လူတိုင်းမှာ ရယ်မောခဲ့ကြသည်။ ယွမ်ယယ်က ထပ်ရှင်းပြမနေတော့ဘဲ သူတို့အား ဟာသလုပ်ခွင့်ပေးထားလိုက်သည်။ သူက ဖန်းရှောက်ယိအား တွဲထားပြီး သူ့ခွက်ထဲရှိ အရက်လက်ကျန်ကို မြှောက်ကာ ပြောလိုက်သည်။ "ခေါင်းဆောင်တို့ ရှင်းနျန်ခွိုက်လဲ့! ကျန်းကျန်းမာမာ၊ ချမ်းချမ်းသာသာနဲ့ ကိုယ်လိုရာအရပ်ကိုသွားနိုင်ပါစေလို့ ဆုတောင်ပေးပါတယ်ဗျာ!"
ထိုသို့ပြောပြီးနောက် သူက ဖန်းရှောက်ယိကိုဆွဲကာ ထွက်ပြေးလာခဲ့တော့သည်။
အနွေးထည်ကို သူ၏လက်မောင်းပေါ်ချိတ်ထားလျက် ဖန်းရှောက်ယိက ယွမ်ယယ်၏အနောက်ကနေ လိုက်လာခဲ့သည်။ သူက ဘယ်ကိုသွားနေသလဲဟု တစ်ခွန်းမှမမေးခဲ့ပေ။
အပြင်ဘက်တွင် လေအေးလေးများက သူ့အားဖြတ်တိုက်သွားချိန်၌ အရက်သောက်နေစဥ်ပျောက်ဆုံးသွားသော သူ၏အသိစိတ်တစ်ဝက်လောက်က ချက်ချင်းပြန်လည်သက်သာလာခဲ့သည်။ ဖန်းရှောက်ယိက အနွေးထည်ကိုဝတ်လိုက်ပြီး ယွမ်ယယ်ဘေးတွင် တစ်ချိန်လုံးရပ်နေခဲ့၏။ နောက်ဆုံးတွင် သူက ယွမ်ယယ်၏လက်ကို ဆုပ်ကိုင်လိုက်သည်။ ယွမ်ယယ်က သူ့ကိုလှည့်ကြည့်ကာ ပြုံးပြလာခဲ့သည်။
ယွမ်ယယ်က သူ့ကို ဆင်ခြေဖုံးအရပ်ဆီသို့ ခေါ်လာခြင်းဖြစ်သည်။ သူ စောစောက ကားကို ထိုနေရာ၌ရပ်ထားခဲ့၏။ ယွမ်ယယ်က ဖန်းရှောက်ယိကို ပြောလိုက်သည်။ "ဒီမှာရပ်နေပြီး ခဏစောင့်ဦး။"
သူသည် ကားထဲမှ တစ်စုံတစ်ခုကိုဆွဲထုတ်ကာ မြေပြင်ပေါ်နေရာချလိုက်သည်။ ဖန်းရှောက်ယိက ရယ်မောလေတော့သည်။ ထို့နောက် ယွမ်ယယ် ထိုမီးပန်းများကို နေရာချကာ အလုပ်များနေသည်ကို ဖန်းရှောက်ယိက ကြည့်နေခဲ့သည်။ သူက အနားသို့လျှောက်သွားလိုက်ပြီး သူ့ကို ကူရွှေ့ပေးခဲ့သည်။ ဖန်းရှောက်ယိက သူ့ကိုမေးလိုက်၏။ "မင်းအသက်ဘယ်နှနှစ်မို့လဲ။"
ယွမ်ယယ်က ပြောလိုက်သည်။ "သုံးဆယ်သုံးနှစ်။ သုံးဆယ့်သုံးနှစ်အရွယ်မှာ မီးပန်းမဖောက်ရဘူးဆိုတဲ့ စည်းမျဥ်းလည်း ရှိမနေဘူးလေ၊ ဟုတ်တယ်မလား။"
ဖန်းရှောက်ယိက ပြောလိုက်သည်။ "ပတ်ဝန်းကျင်နဲ့တော့ မကိုက်ညီဘူးပေါ့။"
ယွမ်ယယ်သည် မျက်တောင်ခတ်ကာ ဖြေလိုက်သည်။ "အဲ့ဒါကြောင့် ငါ လူမရှိတဲ့ ဆင်ခြေဖုံးနေရာကို အထူးတလည်ရွေးခဲ့တာလေ။ ပြီးတော့ ငါက နှစ်တိုင်းပဲ ပတ်ဝန်းကျင်နဲ့ကိုက်ညီပါတယ်နော်။ ဒီနှစ်မှာ ငါ့ရဲ့ခင်ပွန်းဟောင်းကိုလည်း ပြန်ပိုးပန်းနေတယ်။ ဒီတစ်ခါတော့ ငါတို့ရဲ့တိုင်းပြည်က ငါ့ကိုခွင့်လွှတ်ပေးကြဖို့ မျှော်လင့်ပါတယ်။"
ဖန်းရှောက်ယိက ရယ်မောလိုက်သည်။ သူက ယွမ်ယယ်မီးပန်းမီးညှိနေသည်ကို ကြည့်နေခဲ့သည်။ ယွမ်ယယ်က သူ့ကိုပြောလာ၏။ "နောက်နည်းနည်းဆုတ်။"
ဖန်းရှောက်ယိက သူ၏အမိန့်ကိုနာခံကာ ကားအရှေ့နားလေးထိ ဆုတ်သွားလိုက်သည်။ ယွမ်ယယ်က မီးပန်းတစ်ခုစီကို မီးညှိပြီးနောက် ဖန်းရှောက်ယိန်ဘေးသို့ပြေးသွားခဲ့၏သည်။ ၎င်းတို့၏ ဦးခေါင်းအပေါ်တွင် တောက်ပသောအလင်းတန်းများ ဖြာထွက်လာခဲ့သည်။ ဖန်းရှောက်ယိက မော့ကြည့်လိုက်သည်။ သူ၏အတွေးထဲမှပုံရိပ်များက ယွမ်ယယ် အသက်နှစ်ဆယ်ကျော်အရွယ်အချိန်တုန်းကနှင့် ထပ်တူကျနေခဲ့သည်။ ထိုအချိန်က ယွမ်ယယ်တစ်ယောက် နှစ်တိုင်း တက်ကြွနေခဲ့သည်။ သူက အမြဲတမ်း မီးရှူး မီးပန်းများကို တစ်ကားလုံးအပြည့်ဖြည့်ထားတတ်သည်။ နောက်ပိုင်းတွင် မသိလိုက်ရသောအချိန်တစ်ခု၌ သူက ထိုကဲ့သို့အရာများကို ရပ်တန့်ပစ်ခဲ့သည်။ ထိုမျှမကသေးချေ။ သူ့ဘေးပတ်ပတ်လည်ရှိ ကလေးဆန်သောလေထုကလည်း ဖြည်းဖြည်းချင်း ပျောက်ကွယ်သွားခဲ့သည်။ ဖန်းရှောက်ယိက ယခုအချိန်ထိ စဥ်းစားနေဆဲဖြစ်သော်လည်း ယွမ်ယယ် ဆိုးသွမ်းသောကောင်ငယ်လေးအဖြစ်မှ ရင့်ကျက်သောယောက်ျားတစ်ယောက်အဖြစ် ပြောင်းလဲသွားသည့်အချိန်ကို တိတိကျကျမမှတ်မိတော့ပေ။ ပြောင်းလဲသွားခြင်းဆိုသည်မှာ ကိုယ့်ရှေ့တွင် လက်တွေ့တွေ့လိုက်ရသည့်အချိန်မှသာ သတိပြုမိသည့်အရာများဖြစ်သည်။
"ယိကော" ယွမ်ယယ်က သူ၏နားနားကပ်ကာ ခေါ်လိုက်သည်။
ဖန်းရှောက်ယိက ယွမ်ယယ်ကို လှည့်ကြည့်လိုက်သည်။ ယွမ်ယယ်၏မျက်နှာပေါ်တွင် အရိပ်များကျနေသော်လည်း သူ၏မျက်လုံးများမှာ တောက်ပနေဆဲပင်။ ဖန်းရှောက်ယိက ပြန်ဖြေလိုက်သည်။ "ကိုယ်ရှိတယ်။"
ယွမ်ယယ်က သူ့ကိုပြုံးပြလိုက်လေ၏။ သူက နာမည်ခေါ်ပြီးနောက် ဘာမှထပ်မပြောဘဲ ဖန်းရှောက်ယိကိုသာ စိုက်ကြည့်နေခဲ့သည်။ ဖန်းရှောက်ယိက လက်လှမ်းကာ ယွမ်ယယ်၏မျက်ခွံလေးကို ညင်သာစွာထိတွေ့လိုက်၏။
၎င်းမှာ ယွမ်ယယ်၏မျက်ခွံပေါ်ရှိ အမာရွတ်သေးသေးလေးရှိနေသောနေရာဖြစ်သည်။
ယွမ်ယယ်က လက်မြှောက်ကာ ထိုနေရာကိုထိလိုက်သည်။ သူ၏လက်မလေးဖြင့် စောစောကဖန်းရှောက်ယိထိလိုက်သောနေရာကို ကုတ်ခြစ်လိုက်၏။ ထို့နောက် ဖန်းရှောက်ယိကို စိုက်ကြည့်နေခဲ့သည်။ သူ၏နှုတ်ခမ်းများမှာ ပြုံးနေသလို အပေါ်သို့ကော့ညွတ်နေ၏။ ထို့နောက် သူစောစောက အမာရွတ်နေရာကိုထိလိုက်သော လက်မလေးကို နမ်းလိုက်လေသည်။
ဖန်းရှောက်ယိမှာ ချက်ချင်းပင်ရယ်မိတော့သည်။ ယွမ်ယယ်အတွက် သာမန်အတိုင်းပြုမူရန်မှာ မဖြစ်နိုင်ပေ။ အခွင့်အရေးပေးလိုက်လျှင်တောင် သူက ပေါက်ကရလုပ်လိမ့်မည်သာ။ အရွယ်ရောက်သူနှစ်ယောက်အတွက် ၎င်းမှာ သွေးဆောင်သောအပြုအမူတစ်ခုဖြစ်ပြီး စိတ်ခေါ်မှုတစ်ခုလည်းဖြစ်သည်။ ယွမ်ယယ်က မျက်ခုံးပင့်ကာ ဖန်းရှောက်ယိကို စိုက်ကြည်နေခဲ့သည်။ ဖန်းရှောက်ယိက ရယ်မောလျက် ခေါင်းယမ်းနေခဲ့သည်။ ထို့နောက် ရုတ်တရက် ယွမ်ယယ်၏အင်္ကျီကော်လံကနေ အနားသို့ဆွဲခေါ်လိုက်ပြီး သူ၏နှုတ်ခမ်းများကို ကိုက်ချလိုက်လေသည်။
ဖန်းရှောက်ယိက ပြန်လွှတ်ပေးလိုက်ပြီး မေးလိုက်၏။ "ဒါက မင်းဆိုလိုတဲ့ အဓိပ္ပါယ်လား။ အကိုက်ခံချင်တာ?"
ယွမ်ယယ်က နှုတ်ခမ်းသပ်ကာ ခေါင်းယမ်းလိုက်သည်။ ထို့နောက် စိတ်ဆိုးနေဟန်ဖြင့် ပြောလိုက်လေ၏။ ".....အလုပ်ခံချင်တာ။"
သူက ရှင်းရှင်းလင်းလင်းပြောလိုက်ရာ ဖန်းရှောက်ယိက ငြင်းလို့မရတော့ပေ။ ၎င်းတို့နှစ်ဦး ပြန်ရောက်သောအခါ ဖန်းရှောက်ယိက ယွမ်ယယ်ကို ရေချိုးခန်းထဲ တွန်းထည့်လိုက်သည်။ ၎င်းတို့နှစ်ဦးကြားတွင် လက်မဝက်လောက်သာခြားကာ သူ၏မျက်လုံးထဲများထဲ၌ ယွမ်ယယ်နှင့်သာ ပြည့်နှက်နေခဲ့၏။ သူ၏လည်ချောင်းက အက်ရှနေပြီး ယွမ်ယယ့်ကို မေးလိုက်သည်။ "ဒါကို လိုချင်နေတုန်းပဲလား။"
ယွမ်ယယ်က သူနှင့်အကြည့်ချင်းဆုံနေပြီး လုံးအကြည့်မလွှဲဘဲ ပြောလိုက်သည်။ "လာခဲ့။"
ယွမ်ယယ်၏ဆံပင်ပုံစံက သူ၏အားသာချက်တစ်ခုပင်။ တစ်ခါတစ်ရံ တစ်ဖက်လူက သူ၏ဆံပင်ကိုဆွဲချင်လျှင်ပင် ဆွဲစရာဆံပင်မရှိချေ။ ဖန်းရှောက်ယိက ယွမ်ယယ်၏ဦးခေါင်းအနောက်ကိုသာ ကိုင်ထားနိုင်ပြီး ဘာမှမလုပ်နိုင်ပါချေ။
~~🚗💨~~
ဖန်းရှောက်ယိက သူ၏အိတ်ကပ်ထဲမှ စာအိတ်အနီကိုထုတ်ကာ ယွမ်ယယ်၏လက်ထဲသို့ ထည့်ပေးလိုက်သည်။
ယွမ်ယယ်က သေချာကြည့်ကာ မေးလိုက်၏။ "ဒါက?"
ဖန်းရှောက်ယိက သူ့၏မျက်လုံးထဲစိုက်ကြည့်ကာ ပြောလိုက်သည်။ "မုန့်ဖိုး။"
ယွမ်ယယ်က မေးလိုက်၏။ "ဆုတောင်းကရော?"
ဖန်းရှောက်ယိက သူ၏နှာခေါင်းထိပ်လေးကို နူးနူးညံ့ညံ့အနမ်းပေးလိုက်ပြီး သိမ်မွေ့စွာပြောခဲ့သည်။
"မျောက်ကလေး ကျန်းကျန်းမာမာနဲ့ ဘေးအန္တရာယ်တွေလည်းကင်းပါစေ၊ ပျော်ရွှင်ပြီး အထိန်းအကွပ်ကင်းမဲ့စွာနဲ့ လွတ်လပ်မှုတွေရပါစေလို့ ကိုယ်ဆုတောင်းပေးပါတယ်။"
*****