ဤသို့ဖြင့် ယွမ်ယယ်က ယုံကြည်မှုအပြည့်နှင့် 'ဘယ်သူက ငါ့ထက်ငယ်မှာမို့လဲ' ဟု မေးလိုက်ခြင်းဖြစ်သည်။ သူ ဖန်းရှောက်ယိနှင့် စတွဲချိန်က တကယ့်ကိုငယ်ရွယ်နုပျိုပြီး နှင်းရည်ကြည်စက်ကလေးများထဲ ဖုံးလွှမ်းနေသလိုပင်။ သူ့အား အချစ်အကြောင်း အရာရာသင်ပေးခဲ့သူမှာ ဖန်းရှောက်ယိဖြစ်၏။ သူပိုးပန်းချင်သောတစ်စုံတစ်ယောက်၊ သူတွဲချင်သောတစ်စုံတစ်ယောက်၊ ထိုလူမှာ အမြဲတမ်း သူတစ်ယောက်တည်းသာဖြစ်ခဲ့သည်။
သို့သော် ဖန်းရှောက်ယိက 'မင်း ငါနဲ့စတွဲတဲ့အချိန်တုန်းက' ဟူသောစကားကို လုံးဝသဘောမတူပေ။
"ကိုယ်က မင်းနဲ့စတွဲတာ?" ဖန်းရှောက်ယိက မျက်ခုံးပင့်ကာ ရယ်လျက်ပြောလိုင်သည်။ "မင်းကမှ ကိုယ်နဲ့တွဲတာမဟုတ်ဘူးလား။"
ယွမ်ယယ် ထိုကဲ့သို့ နုံအပြီး အပြစ်ကင်းစင်သည့် ဆယ်ခုနစ်၊ ဆယ့်ရှစ်အရွယ်ကလေးတစ်ယောက်ဖြစ်ခဲ့သည်မှာ ကြာခဲ့လေပြီ။ သူ ဆက်ဆံရေးများအကြောင်း သိသင့်သမျှကို သိခဲ့သည်မှာလည်း ကြာခဲ့ပြီဖြစ်၏။ လက်ရှိတွင် သူက အသက်သုံးဆယ့်သုံးနှစ်အရွယ် ဦးလေးအဆင့်သို့ရောက်နေပြီဖြစ်သည်။ သူက ရယ်နေသဖြင့် ပခုံးများလှုပ်ခါနေသော ဖန်းရှောက်ယိအား လက်ညှိုးထိုးကာ ပြောလိုက်သည်။ "မင်းက အကောင်ကြီးပြီး အမြီးရှည်တဲ့မြေခွေးပဲ! မင်းက ငါ ခပ်တုံးတုံးနဲ့ မင်းကိုပိုးပန်းနေတာကို ကြည့်နေခဲ့တာလေ။ မင်းက ဝက်က ကျားကိုစားသလိုမျိုး ပြုမူနေခဲ့တာ။"
"မင်းက ကျားလား။" ဖန်းရှောက်ယိက ခေါင်းယမ်းကာ ရှေ့သို့ ဖြည်းဖြည်းချင်းလျှောက်သွားလိုက်သည်။ "ကျား? အရင်တုန်းကဆို မင်းက အများဆုံးမှ ပါပီလေးနဲ့ပဲတူတာပါ။"
ယွမ်ယယ်က သူ့အနောက်မှလျှောက်နေ၏။ ညဘက်တွင် ယခုလိုလမ်းလျှောက်ရင်း လရောင်အောက်တွင် အတိတ်ကိုအမှတ်ရစေကာ သူ့အား အလွန်အမင်းလွမ်းဆွတ်လာစေခဲ့သည်။ ထိုအချိန်က သူ ဖန်းရှောက်ယိအား သူ၏ဖြစ်တည်မှုတစ်ခုလုံးကိုသုံးကာ သဘောကျခဲ့သည်။ သူက ပြတ်သားပြီး မယိမ်းယိုင်ခဲ့သော်လည်း နောက်ဆုံးတွင် ဖန်းရှောက်ယိကို ဆုံးရှုံးခဲ့ရသေးသည်။
ယွမ်ယယ် ရုတ်တရက်လက်ဆန့်ထုတ်ကာ ဖန်းရှောက်ယိ၏လက်ကို ဆုပ်ကိုင်လိုက်သည်။ နှစ်ဦးသား အလွန်သိမ်မွေ့စွာ လက်ချင်းဆုပ်ကိုင်ထားကြပြီး သူတို့၏လက်ချောင်းများမှာ နွေးထွေးနေခဲ့သည်။
ယွမ်ယယ်ကရယ်မောကာ ဖန်းရှောက်ယိကို ကြည့်လိုက်၏။ သူတို့၏မျက်လုံးများ ဆုံသွားကြချိန်၌ ယွမ်ယယ်က ပြောလိုက်သည်။ "ကျေးဇူးတင်ပါတယ်။"
ဘာကြောင့်ကျေးဇူးတင်ပြီး ဘာအတွက်ကျေးဇူးတင်သလဲကို ယွမ်ယယ်က မပြောခဲ့ပေ။ ဖန်းရှောက်ယိကလည်း သူ့ထံမှ ရှင်းလင်းချက်တို့ကို မလိုအပ်ခဲ့ချေ။
ထိုညက သူတို့နှစ်ဦး အတော်လေးနောက်ကျမှ ပြန်ရောက်ခဲ့ကြသည်။ ယင်းကြောင့် ကျီရှောင်ထောင်းဆီမှ စူးစိုက်ကြည့်ခြင်းကို ခံလိုက်ကြရလေ၏။ ၎င်းမှာ သူသည် သူတို့နှစ်ယောက်ထံမှ ထုတ်ပြောလို့မရသည့်အချစ်ရေးအကြောင်းကို ရှာတွေ့ချင်နေသကဲ့သို့ပင်။ ယွမ်ယယ် သူ့ကိုဖြတ်သွားသောအခါ သူက တစ်ဖက်လူကို တွန်းဖယ်ကာ ဆိုဖာပေါ်မှာထိုင်လိုက်သည်။ ထို့နောက် သူက ပြောလိုက်၏။ "နေ့တိုင်း မင်း ငါ့ကိုဒီလိုစိုက်ကြည့်နေတာက ကြောက်စရာကောင်းတယ်။ မင်း ဒီလိုပဲ ပုံမှန်ဟုတ်မနေဘူးဆိုရင် မင်းရဲ့ဘော့စ်ကို မင်းကိုအလုပ်ဖြုတ်ခိုင်းလိုက်တော့မယ်။ ပြီးရင် ပိုပြီးအပြုအမူကောင်းတဲ့လက်ထောက်တစ်ယောက်နဲ့ ပြောင်းခိုင်းလိုက်မယ်။"
ကျီရှောင်ထောင်းမှာ လုံးဝစိတ်အနှောင့်အယှက်ဖြစ်မနေချေ။ ၎င်းတို့နှစ်ယောက်အတွက် ရေနွေးထည့်ပေးနေရင်း သူကပြောလာ၏။ "ကျွန်တော် ဆင်ခြေပေးဖို့ကြိုးစားနေတာမဟုတ်ပါဘူး။ ဒါပေမဲ့ ကောတို့နှစ်ယောက် အခု လက်ထောက်သာပြောင်းလိုက်ရင် ကောတို့အသက်ရှင်နိုင်မှာတောင်မဟုတ်တော့ဘူး။"
ယွမ်ယယ်က ရေနွေးခွက်ကို ယူလိုက်ပြီး ခဏလောက်မှုတ်ကာ တစ်ငုံသောက်လိုက်၏။ "မင်းရဲ့မျက်နှာက ပစိဖိတ်သမုဒ္ဒရာကို ဖုံးထားနိုင်လောက်အောင်ကို ကြီးတာပဲ။"
ကျီရှောင်ထောင်း၏မျက်နှာပေါ်တွင် အပြုံးရေးရေးလေးရှိနေ၏။ သူက ယွမ်ယယ်ဘေးနားကပ်ထိုင်ပြီး စကားပြောနေစဥ် ဖန်းရှောက်ယိက ရေချိုးရန် ရေချိုးခန်းထဲသို့ဝင်သွားခဲ့သည်။ ယွမ်ယယ်က သူပြန်ထွက်လာသည်အထိစောင့်ကာ တစ်ဖက်လူအား သူမပြန်ခင် အသိပေးကာ အပေါ်ထပ်သို့ တက်လာခဲ့တော့သည်။ တစ်နေ့လုံး ရိုက်ကွင်းအား လျှောက်ပတ်နေရသည်မှာ အတော်လေးပင်ပန်းပေ၏။ သူ အခန်းပြန်ပြီး ရေချိုးကာ စောစောအိပ်ရန် လိုအပ်နေသည်။
သူထွက်သွားပြီးနောက် ဖန်းရှောက်ယိက ကျီရှောင်ထောင်းအား ပြောလိုက်သည်။ "မင်းအားတဲ့အချိန်ကျ ယန်စစ်ရန်နဲ့ စကားလေးဘာလေးသွားပြောလိုက်ဦး။"
"ဘာအကြောင်းပြောရမှာလဲ။" ကျီရှောင်ထောင်းက မျက်ခုံးပင့်လိုက်၏။ "သူဘာဖြစ်လို့လဲ။"
ဖန်းရှောက်ယိက တခြားဘာမှထပ်မပြောခဲ့ပေ။ သူက ကျီရှောင်ထောင်းကို အချိန်ရလျှင် ထိုအကြောင်းမေးရန်သာ ပြောလိုက်သည်။ မည်သို့ပင်ဖြစ်စေ ယန်စစ်ရန်က သူ၏ကုမ္ပဏီမှ သရုပ်ဆောင်တစ်ယောက်ဖြစ်သည်။ ဖန်းရှောက်ယိ၏စောင့်ကြပ်မှုအောက်တွင် သူသာ အမှန်တကယ်တစ်ခုခုဖြစ်ခဲ့ကာက ၎င်းမှာ လက်ခံနိုင်စရာမရှိပေ။
ကျီရှောင်ထောင်းက ခေါင်းညိတ်ပြလိုက်၏။ "ဟုတ်ကဲ့ပါ၊ ကျွန်တော် မေးဖို့ အခွင့်အရေးရှာကြည့်လိုက်မယ်။ သူ့ကိုကြည့်ရတာ အတော်လေးရှက်တတ်တဲ့ပုံပဲ။ သူရှက်ရွံ့သလိုခံစားနေရမှာကို ကျွန်တော်စိုးရိမ်တယ်။"
နေ့ခင်းတုန်းက ဖန်းရှောက်ယိသည် ယန်စစ်ရန်ကို ခေါင်းငုံ့ကာတစ်ခုခုပြောပြီး ခေါ်ထုတ်သွားခဲ့သည်။ သူက တစ်ဖက်လူကို အဝတ်လဲခန်းထဲ ခေါ်သွားခဲ့၏။ မည်သူမှ ဘာမှမပြောခဲ့သော်လည်း ၎င်းတို့အားလုံး အကြည့်ချင်းဖလှယ်နေကြကာ အတော်လေးထူးဆန်းနေသည်ကို တွေ့ခဲ့ကြရသည်။ အထူးသဖြင့် ယွမ်ယယ်လည်းရှိနေသည်လေ။ ဖန်းရှောက်ယိက ယွမ်ယယ်ကို အသေးစိတ်ရှင်းမပြခဲ့ဘဲ တစ်ဖက်လူ၏ခြေထောက်တွင် ဒဏ်ရာများရှိနေ၍ မိတ်ကပ်ဖုံးရန်ခေါ်သွားခြင်းဖြစ်သည်ဟုသာ ပြောခဲ့သည်။ ဖန်းရှောက်ယိအတွက် နားထောင်သူမှာ ယွမ်ယယ်ဖြစ်နေလျှင်တောင် အခြားသူများ၏ပုဂ္ဂိုလ်ရေးကိစ္စများကို အစပျိုးကာမျှဝေတတ်သည့်လူစားမျိုးမဟုတ်ပေ။
ထိုနေ့လယ်က ယန်စစ်ရန်သည် ဆိုဖာပေါ်ထိုင်နေရင်း အနည်းငယ်ချီတုံချတုံဖြစ်နေဟန်ရှိ၏။ သူ၏မျက်ခုံးအစုံမှာ တွန့်ချိုးနေပြီး ဘောင်းဘီချွန်ရန် ဆန္ဒရှိမနေပေ။ ယောက်ျားလေးသရုပ်ဆောင်တစ်ယောက်အနေဖြင့် သူ၏ခြေထောက်များကို ကင်မရာအားပြသရန်မှာ ထိုမျှလောက်ကိစ္စကြီးမဟုတ်ပေ။ သူက ထိုကိစ္စကို အတော်လေးစိတ်ဖိစီးနေပုံပင်။ ထို့နောက် ယန်စစ်ရန် ဘောင်းဘီချွတ်လိုက်သောအခါ ဖန်းရှောက်ယိက အနီးနားတွင်ရပ်နေသဖြင့် တစ်ဖက်လူ၏ပေါင်တွင် လက်ချောင်းရာများရှိနေသည်ကို သတိထားမိလိုက်၏။ တချို့မှာ စိမ်းနေဆဲဖြစ်ပြီး တစ်ချို့က အဝါရောင်ဖျော့ဖျော့လေးသန်းပြီး ပျောက်ကွယ်လုနီးပါး ဖြစ်နေပြီဖြစ်သည်။
ဖန်းရှောက်ယိက အတွေ့အကြုံရှိသည့်သူတစ်ယောက်ပင်။ သူ ထိုဒဏ်ရာများ မည်သို့ဖြစ်လာရသည်ကို အတိအကျသိပေ၏။ ယွန်စစ်ရန်က သူ့ကုမ္ပဏီအဖွဲ့သားတစ်ယောက် ဟုတ်သည်ဖြစ်စေ၊ မဟုတ်သည်ဖြစ်စေ၊ ၎င်းနေရာတွင် အခြားသာမန်သရုပ်ဆောင်လေးဆိုလျှင်တောင် ဖန်းရှောက်ယိက ဂရုစိုက်ပေးမည်သာ။ သူ၏ခြေထောက်များကို ကင်မရာပေါ်ပြလိုက်လျှင် လူတိုင်းမြင်သွားနိုင်ပေသည်။ သရုပ်ဆောင်တစ်ယောက်အတွက် ၎င်းမှာ အလွန်ရှက်စရာကောင်းသောအခြေအနေဖြစ်၏။ သူ့ကို ပြစ်တင်ပြောဆိုခြင်းမျိုး မရှိနေလျှင်တောင်မှပင်။ ထိုအချိန်က သူမျက်မှောင်ကြုတ်ကာ ပတ်ပတ်လည်ရှိဝန်ထမ်းများကို လှည့်ပြောလိုက်၏။ "ခဏလောက် စောင့်ပေးပါဦး။"
သူ ယွမ်ယယ်ကို တစ်ဖက်လူ၏ခြေထောက်တွင် ဒဏ်ရာများရှိနေသည်ဟုသာပြောခဲ့ပြီး မည်ကဲ့သို့သောဒဏ်ရာမျိုးဖြစ်သည်ကိုတော့ မပြောခဲ့ပေ။ ယွမ်ယယ်က ဤနယ်ပယ်ရှိ ထိုညစ်ပတ်သောကိစ္စရပ်များကို အရွံရှာဆုံးဖြစ်သည်။ ထို့ကြောင့် ဖန်းရှောက်ယိက သူ့ကို အသေးစိတ်ကျကျ ရှင်းမပြခဲ့ချေ။
ကျီရှောင်ထောင်းကလည်း ထိုအခြေအနေကြောင့် အလွန်ရှုပ်ထွေးနေလေ၏။ ယုတ္တိရှိရှိပြောရလျှင် ထိုကဲ့သို့အရောင်းအဝယ်(*သရုပ်ဆောင်တွေကို စပွန်ဆာရှာပေးတာကိုပြောချင်တာပါ)မှာ မဖြစ်သင့်ပေ။ ကန်းကျင့်ဝေက ၎င်းတို့၏ခန္ဓာကိုယ်ကိုရောင်းစားကာ အရင်းအမြစ်ရှာဖွေခြင်းကို အလွန်ဆန့်ကျင်သည့်သူတစ်ယောက်ဖြစ်သည်။ သူက သူ၏သရုပ်ဆောင်များအတွက် ထိုသို့သောလှုပ်ရှားမှုများနှင့် စေ့စပ်ညှိနှိုင်းခိုင်းရန် ဘယ်တော့မှ မလုပ်ဆောင်ခဲ့ဖူးသလို အရိပ်အယောင်တောင်မပြခဲ့ဖူးချေ။ ၎င်းတို့၏ကုမ္ပဏီက ဤနယ်ပယ်၌ အတော်လေးဂုဏ်သရေရှိပေ၏။ ကန်းကျင့်ဝေက စွမ်းဆောင်နိုင်စွမ်းရှိသောသူတစ်ယောက်ဖြစ်သော်လည်း ဘယ်တော့မှ တခြားသူများကို မထိခိုက်စေတတ်ပေ။ ထို့ပြင် ဖန်းရှောက်ယိ၏ကုမ္ပဏီနှင့် စာချုပ်ချုပ်ဆိုခြင်းသည် အရင်းအမြစ်များ ဘယ်တော့မှရှားပါးသွားလိမ့်မည်မဟုတ်ဟု ဆိုလိုပေ၏။ ဒါရိုက်တာကျန်းကိုယ်တိုင်ကလည်း ဤကဲ့သို့အရှုပ်အထွေးကိစ္စများတွင် မပါဝင်တတ်ပေ။ အကျိုးဆက်အနေဖြင့် သူ၏အဖွဲ့သားများကလည်း မလုပ်ရဲကြပေ။
ထို့ကြောင့် ယန်စစ်ရန် သဘောတူထားခြင်းမရှိလျှင် မည်သူကမှ သူ့ကိုဘာမှမလုပ်နိုင်ပေ။
ယွမ်ယယ်က ဂရုမစိုက်ဘူးဟုပြောခဲ့သည်မှာ သူ အမှန်ပင် ဂရုမစိုက်သောကြောင့်ဖြစ်၏။ သူ ရောက်မလာခင်က ယန်စစ်ရန်နှင့် ဖန်းရှောက်ယိတို့က နှစ်ယောက်အတူသတင်းထွက်ခဲ့ကြသော်လည်း ယွမ်ယယ်က သူ့ကို လေးလေးစားစားဆက်ဆံနေဆဲပင်။ သူ တစ်ဖက်လူနှင့် စကားပြောသည့်အခါတိုင်း သူ့အား 'ရှောင်တိ' ဟု အမြဲခေါ်တတ်၏။ သူ့အသက်အရွယ်ဖြင့် ကလေးတစ်ယောက်လိုမျိုး အခြေအမြစ်မရှိ သဝန်မတိုနေနိုင်ပေ။ သူကလည်း ထိုကဲ့သို့လူစားမျိုးမဟုတ်ပေ။
တစ်ခါတစ်ရံ သူ မနက်ခင်းတွင် စောစောမထနိုင်ပေ။ စားသောက်ပြီးနောက် နေ့ခင်းတောင်ရောက်လုပြီဖြစ်သည်။ ထို့နောက် သူက ရိုက်ကွင်းသို့ လမ်ယလျှောက်သွားလိမ့်မည်။ ဖန်းရှောက်ယိ ရိုက်ကူးရေးလုပ်နေလျှင် ယွမ်ယယ်က ထိုင်ခုံကိုဆွဲကာ ဘေးတွင်ထိုင်နေပြီး ဖန်းရှောက်ယိကိုကြည့်နေလိမ့်မည်။ ဖန်းရှောက်ယိ ရိုက်ကူးရေးလုပ်မနေလျှင် ယွမ်ယယ်က ဘာကိုမှ မကြည့်ဘဲ လျှောက်ပတ်သွားနေလိမ့်မည်သာ။
လောင်ထူက သူ့ကို ဘယ်အချိန်ပြန်လာမှာလဲဟု စာပို့လာ၏။ လက်ဖက်ရည်ဆိုင်တွင် ကောင်းမွန်သောလက်ဖက်ရွက်အသစ်ရောက်လာ၍ ယွမ်ယယ်အား မြည်းစမ်းကြည့်ရန် ဖိတ်ခေါ်ခြင်းဖြစ်သည်။
ယွမ်ယယ်က ပြောလိုက်သည်။ "နှစ်ကူးမှာ ကျွန်တော်အချိန်ရမလားတော့ မပြောတတ်သေးဘူး။ အချိန်ရခဲ့ရင် ကျွန်တော်လာခဲ့မယ်။ အချိန်မရရင်တော့ ကျွန်တော် ရုပ်ရှင်အဖွဲ့သားတွေနဲ့ပဲနေရမှာပဲ။"
လောင်ထူက နောက်ထပ်စာပို့လာခဲ့၏။ "ရှောင်မိန့်က မင်းကို ကြိုးစားထားလို့ ငါကနေတစ်ဆင့်ပြောခိုင်းလိုက်တယ်။ ငါတို့တွေ မင်း သူ့ကို သိပ်မကြာခင်ပဲ အောင်အောင်မြင်မြင်ပိုးပန်းနိုင်ပါစေလို့ ဆုတောင်းပေးပါတယ်ကွာ။"
ယွမ်ယယ်က ရယ်မောရင်း စာပြန်လိုက်သည်။ "ဒါဆို ရှောင်မိန့်ကို ကျေးဇူးတင်ပါတယ်လို့ပြောပေးပါဦး။
သူသည် ဖုန်းကြည့်ရင်း လမ်းလျှောက်လာရာ တစ်စုံတစ်ယောက်ကို မတော်တဆဝင်တိုက်မိသွားလေ၏။ ယွမ်ယယ်က ချက်ချင်းဆိုသလို ဘေးသို့ဖယ်ပေးလိုက်သည်။ သူက မော့တောင်မကြည့်ဘဲ တောင်းပန်စကားဆိုလိုက်၏။ တစ်ဖက်လူက ရုပ်ရှင်အဖွဲ့သားထဲမှ ငယ်ရွယ်သောဝန်ထမ်းတစ်ဦးဖြစ်သည်။ ထိုသူက ဝင်တိုက်မိသည့်သူကို သတိပြုမိသည်နှင့် အလျင်အမြန်တောင်းပန်စကားဆိုလာခဲ့သည်။ "တောင်းပန်ပါတယ် ယွမ်ယယ်လောင်ရှီး။"
ယွမ်ယယ်က လက်ဝှေ့ယမ်းကာ အပြုံးလေးဖြင့် 'ကိစ္စမရှိပါဘူး' ဟု ပြန်ဖြေလိုက်၏။
သူ ရိုက်ကွင်းသို့ရောက်သောအခါ အကျင့်တစ်ခုနှယ် ဖန်းရှောက်ယိကို လိုက်ရှာတတ်သည်။ တစ်ဖက်လူကို တွေ့လိုက်ရချိန်၌ သူ၏မျက်နှာက အနည်းငယ်ဖြူဖျော့နေသည်ကို မြင်တွေ့လိုက်ရ၏။ သူက မျက်လုံးများမှိတ်ထားပြီး အနားယူနေသည်။ သူ့ကိုယ်ပေါ်တွင် စောင်ပါးလေးတစ်ထည်ရှိပေ၏။ ယွမ်ယယ်က ကျီရှောင်ထောင်းကို တိုးတိုးလေးမေးလိုက်သည်။ "ဘာဖြစ်တာလဲ။"
ကျီရှောင်ထောင်း: "သူ နည်းနည်းလေး အဆင်မပြေဖြစ်နေတာ။ သူတို့ မနေ့ညကမှ အခန်းကိုဆေးအသစ်သုတ်ထားကြတာဆိုတော့ အနံ့က တော်တော်ပြင်းတယ်လေ။ တစ်မနက်ခင်းလုံးလည်း ရိုက်ကူးရေးလုပ်ခဲ့ရတာဆိုတော့။"
ယွမ်ယယ်က မျက်မှောင်ကြုတ်ကာမေးလိုက်သည်။ "ဘာလို့ဆေးအသစ်သုတ်တာလဲ။"
"မနေ့ညက ဒါရိုက်တာတို့က အဲ့ဒါကို သေချာလေ့လာပြီး အရောင်က ကင်မရာပေါ်မှာ နည်းနည်းလေးတောက်နေတယ်လို့ပြောကြလို့ ညတွင်းချင်းပဲ မြန်မြန်ဆေးပြန်သုတ်လိုက်ရတာ။" ကျီရှောင်ထောင်းကလည်း စိတ်အနှောင့်အယှက်ဖြစ်နေဟန်ပင်။ ဖန်းရှောက်ယိက အလွန်ပြင်းထန်သောအနံ့စူးစူးများကို မခံနိုင်ပေ။ သူ ထိုအနံ့များကိုရှူပြီးလျှင် ခေါင်းကိုက်လာတတ်သည်။ ဤရက်ပိုင်းအတွင်း ၎င်းတို့က မြို့ငယ်လေးရှိ စက်ချုပ်ဆိုင်တွင်ရိုက်ကူးရေးလုပ်ရမည်ဖြစ်သည်။ ရိုက်ကူးပြီးသည်နှင့် သရုပ်ဆောင်များက ထိုအနံ့ကြောင့် ချက်ချင်းထွက်သွားရန်လိုအပ်ပေသည်။ ထိုအနံ့ကို ရက်အနည်းငယ်လောက် ထပ်ပြီးသည်းခံရပေဦးမည်။ ယွမ်ယယ်က ခေါင်းငုံ့ကာ ဖန်းရှောက်ယိကိုကြည့်လိုက်သည်။ သူက သူ့ကိုယ်ပေါ်ကနေ စောင်လျောကျလာသည့်အချိန်မှာတောင် မလှုပ်မယှက်ဘဲနေနေခဲ့သည်။
စောင်ကို သူ့ကိုယ်ပေါ်ပြန်လွှမ်းပေးလိုက်ရင်း ယွမ်ယယ်က ကျီရှောင်ထောင်းကို မေးလိုက်၏။ "Tiger Balm ယူလာခဲ့လား။"
"ဟုတ် ယူလာတယ်။" ကျီရှောင်ထောင်းက သူ့အိတ်ကပ်ထဲမှ ဘူးလေးကိုထုတ်ပေးလာခဲ့သည်။ "ကျွန်တော် သူ့ကို နည်းနည်းလောက်လိမ်းပေးမလို့ကို သူက အလိမ်းမခံဘူး။"
ယွမ်ယယ်က ဘူးကိုယူကာ လက်ညှိုးနှစ်ချောင်းလုံးဖြင့် အနည်းငယ်ကော်ယူလိုက်သည်။ ထို့နောက် သူက အနည်းငယ်ငုံ့ကိုင်းကာ ဖန်းရှောက်ယိ၏နားထင်မှာ နူးညံ့စွာ ပွတ်သပ်ပေးလိုက်၏။
ဖန်းရှောက်ယိက မျက်လုံးဖွင့်ကြည့်လာခဲ့သည်။ ယွမ်ယယ်က အလွန်နူးညံ့စွာ ပြောလိုက်၏။ "ငါ မင်းအတွက်လိမ်းပေးမယ်၊ အိပ်နေလိုက်နော်။"
ထိုနှိပ်နှယ်မှုလေးက နာကျင်မှုများကို အတော်လေးသက်သာစေသည်။ ဖန်းရှောက်ယိက မျက်လုံးများမှိတ်ကာ ဆက်အိပ်နေခဲ့၏။ ကျီရှောင်ထောင်းက ယွမ်ယယ်ထိုင်ရန်အတွက် ထိုင်ခုံကိုရွှေ့ပေးလိုက်သည်။ ယွမ်ယယ်က ခေါင်းယမ်းပြကာ မထိုင်ခဲ့ပေ - ထိုင်လိုက်လျှင် ဖန်းရှောက်ယိကို မမီတော့ပေ။
ဖန်းရှောက်ယိက အမြဲတမ်း ထိုကဲ့သို့သောအနံ့ပြင်းပြင်းများကို မခံနိုင်ပေ။ ယွမ်ယယ် ထိုအကြောင်းကို သိပေသည်။ တစ်ခါတလေ ပြန်လည်သက်သာလာရန် ရက်အတော်ကြာတတ်ပေသည်။ ယွမ်ယယ်မှာ ဖန်းရှောက်ယိသက်တောင့်သက်သာဖြစ်မနေသည်ကို မြင်လိုက်ရသည့်အခါတိုင်း သရုပ်ဆောင်အလုပ်ကို ရပ်လိုက်ဖို့ ပြောလေ့ရှိသည်။
သူသည် ငယ်ငယ်လေးကတည်းက သရုပ်ဆောင်လုပ်ခဲ့ပြီး ယခုနှစ် သုံးဆယ့်ခြောက်နှစ်ပြည့်တဲ့အချိန်ထိ ထိုအလုပ်ကို စွဲစွဲမြဲမြဲလုပ်လာခဲ့၏။ ယခုနောက်ပိုင်းတွင် အရာရာမှာ ပို၍တိုးတက်ကောင်းမွန်လာခဲ့သည်။ အတိတ်တုန်းက သူ အက်ရှင်ဇာတ်ကားများအတွက် ကမ်းလှမ်းချက်အတော်များများကို လက်ခံခဲ့သည်။ ဇာတ်ကားတိုင်းတွင် အနည်းဆုံး ဒဏ်ရာတစ်ခုလောက်တော့ ရလာစမြဲပင်။ ထိုကဲ့သို့အချိန်တိုင်း ယွမ်ယယ်၏နှလုံးသားမှာ မကြာခဏ ဖိညှစ်ခံထားရသလိုပင်။ သူ တစ်ဖက်လူကို ထိုလမ်းကြောင်းပေါ်ဆက်မသွားစေချင်ခဲ့ပေ။ ယခု သူက သူ့ကိုယ်သူနှင့်ငြိမ်းချမ်းရေးယူလိုက်ပြီးဖြစ်၏။ အသက်အရွယ်တစ်ခုရလာသောအခါ တချို့အရာများကို ရှင်းရှင်းလင်းလင်းမြင်လာရသည်။ လူသားများတွင် ၎င်းတို့စိတ်အားထက်သန်ကာ မြတ်နိုးကြသောအရာများ ရှိတတ်ကြသည်။ သူတို့ ထိုအရာများကို ပိုပိုပြီးရရှိလေ ပေးရသည့်တန်ဖိုးမှာ မြင့်လေပင်။
ဖန်းရှောက်ယိက နေ့လယ်စာမစားခဲ့ပေ။ သူ့တွင် စားချင်စိတ်ရှိမနေချေ။ သူ၏ဦးခေါင်းမှာ မူးဝေနေပြီး ပေါက်ကွဲထွက်တော့မလို ခံစားနေရသည်။ ယွမ်ယယ်က သူ၏အိတ်ကပ်ထဲတွင် Tiger Balm ကို ဆောင်ထားခဲ့သည်။ ဖန်းရှောက်ယိရိုက်ကူးရမည့်အခန်းပြီးသည်နှင့် သူက ဆေးတချို့ကိုကော်ယူကာ ဖန်းရှောက်ယိ၏နားထင်ကို နှိပ်နယ်ပေးလိမ့်မည်ဖြစ်သည်။ ကျီရှောင်ထောင်းက ၎င်းတို့နှစ်ဦး၏ထိုပုံကို တိတ်တဆိတ်ရိုက်ယူကာ ကျန်းရွှီ၏လက်ထောက်ဖြစ်သူ သုန်လင်းဆီပို့လိုက်ပြီး တိတ်တဆိတ်ကြွားဝါခဲ့၏။ [ငါ့မိသားစုထဲကနှစ်ယောက်ကတော့ နေ့တိုင်း ချစ်ကြည်နူးနေကြပေမဲ့ ပြန်ပြီးလက်မထပ်ကြသေးဘူး။ သူတို့ ဘာတွေကစားနေလဲ မသိတော့ဘူး။]
သုန်လင်းက 'ကြောင်တောင်တောင်နိုင်ပေမဲ့ ယဥ်ကျေးသောအပြုံး' ဟူသော စတစ်ကာကို ပြန်ပို့လာသည်။ ထို့နောက် သူက မေးလာ၏။ "[ရှောက်ယိကောက ဘာဖြစ်တာလဲ။ သူ့ကိုကြည့်ရတာ အဆင်မပြေနေသလိုပဲရော်။]
ကျီရှောင်ထောင်း: [အာ၊ အဆင်ပြေပါတယ်။ သူက သုတ်ဆေးအနံ့ကြောင့် ခေါင်းမူးနေတာ။]
သုန်လင်း: "[ရော်၊ တော်တော်လေးဆိုးတာလား။]
ကျီရှောင်ထောင်း: [မင်း နောက်ထပ် 'ရော်' လို့ထပ်ပို့ရင် ငါ မင်းကို ဘလော့ပစ်မယ်။]
သုန်လင်းက နောက်ထပ် စတစ်ကာနှစ်ခုထပ်ပို့လာသည်။ [ဟားဟားဟားဟားဟားဟားဟား၊ အိုကေပါ ကျွန်တော်ထပ်မပို့တော့ဘူး။]
ယခုလက်ရှိတွင် ကျီရှောင်ထောင်းက သမီးကို လက်ထပ်ပေးတော့မည့် အမေတစ်ယောက်နှင့်တူနေပေ၏။ သူ၏ကိုယ်ထဲရှိ ဆဲလ်တစ်ခုစီတိုင်းမှနေ၍ မကြွားဘဲမနေနိုင်ခဲ့ပေ။ သူက သုန်လင်းကိုပြောလိုက်သည်။ "တကယ်တော့ ငါ့တို့ယဲ့ကောက အဲ့လိုသုတ်ဆေးအနံ့တွေရပြီးရင် ပုံမှန်အားဖြင့်တော့ အဆင်မပြေဖြစ်တတ်ပေမဲ့ အဲ့လိုအခြေအနေတွေမှာ သိုက်ယွီလိုမျိုး မပြုမူတတ်ပါဘူး။ အိုင်း၊ ဒါပေမဲ့ ယယ်ကောက ဒီမှာရှိနေတယ်မလား။ ဒီတော့ နည်းနည်းလေးနေလို့မကောင်းတာနဲ့ ဒရမ်မာတွေခင်းနေရောပဲ။ သူ့ကို ပြုစုပေးမဲ့သူရှိလို့ သူက အရင်ကနဲ့ကွဲပြားနေတာလေ ဟားဟား။"
(*သိုက်ယွီ >> မဟူရာကျောက်စိမ်း >> အဖိုးတန်လေး)
သုန်လင်းက မည်သို့တုံ့ပြန်ရမည်ကို မသိသောကြောင့်ဖြစ်နိုင်၏။ သူက စတစ်ကာဗုံးထပ်မချခင် 'ဟားဟား' အရှည်ကြီးကို ပို့လာခဲ့လေသည်။
ထိုညက ယွမ်ယယ် ဖန်းရှောက်ယိ၏အခန်းတွင်စားရန် ဆန်ပြုတ်နှစ်ယောက်စာမှာပေးဖို့ ကျီရှောင်ထောင်းကိုပြောလိုက်သည်။ ကျီရှောင်ထောင်းမှာ အလွန်အလိုက်သိပေ၏။ အစားအစာများမှာပေးပြီးနောက် သူ၏အခန်းသို့ပြန်သွားပြီး အစားစားရင်း TVကြည့်နေခဲ့သည်။ တစ်ဖက်အခန်းတွင် ဖန်းသိုက်ယွီလေးမှာ အစားစားချင်စိတ်ရှိမနေခဲ့ချေ။ နည်းနည်းလေးစားရန်အတွက် အများကြီးချော့မော့ပြောနေရမည်ဟု မည်သူကမှ တွေးမိမည်မဟုတ်ပေ။ ယခုလိုအချိန်မျိုးတွင် သူတို့နား၌ လက်ထောက်ရှိမနေသည်က ပိုအဆင်ပြေပေ၏။
တခြားအခန်းတွင် ယွမ်ယယ်က ဆန်ပြုတ်ပန်းကန်ကိုယူကာ ဖန်းရှောက်ယိကို ပြောလိုက်သည်။ "လာ ယိကော၊ ဆန်ပြုတ်လေးနည်းနည်းစားလိုက်။"
ဖန်းရှောက်ယိက မျက်ခုံးများတွန့်ချိုးထားပြီး တိုးတိုးလေးပြောလာခဲ့သည်။ "ဟင့်အင်း၊ ကိုယ်ခေါင်းကိုက်နေတယ်။"
"ဒါဆို ခေါင်းမကိုက်တော့အောင် ဘာလုပ်ပေးရမလဲ။" ယွမ်ယယ်က အပြုံးလေးဖြင့်မေးလိုက်လေ၏။
ဖန်းရှောက်ယိက သူ့ကိုတစ်ချက်ကြည့်ကာ အမူအရာမဲ့စွာပြောလာခဲ့သည်။ "Tiger Balm။"
(*ယွမ်ယယ် be like : (ノT＿T)ノ ＾┻━┻)
*****