ဖုန်းခေါ်ဆိုမှုက ရှုပ်ထွေးနေသောစိတ်ခံစားချက်များဖြင့်အဆုံးသတ်ခဲ့သည်။
ကျီရှောင်ထောင်းတစ်ယောက် ၎င်းတို့နှစ်ဦး ညသန်းခေါင်တွင် ဖုန်းပြောခဲ့မှန်း မသိခဲ့ပေ။ သူက ဆက်လက်စိတ်ပူနေပြီး အတော်လေးစိတ်ဖိစီးနေခဲ့သည်။ သို့သော် သူ ထိုကိစ္စနှင့်ပတ်သက်ပြီး ဘာမှမပြောရဲပေ။
ဖန်းရှောက်ယိက အတော်လေးတည်ငြိမ်ပြီး သူက အမြဲတမ်းထိုကဲ့သို့ပင်။ သူ့ကိုကြည့်လိုက်ရုံဖြင့် သူဘာတွေးနေလဲကို လုံးဝမပြောနိုင်သလို ခန့်မှန်း၍လည်းမရချေ။
"ထောင်းကော၊ အလုပ်များနေလား။" ယန်စစ်ရန်၏လက်ထောက်နာမည်မှာ ချန်းထုံဖြစ်၏။ သူကလည်း ကုမ္ပဏီမှာ လုပ်သက်ကြာနေပြီဖြစ်သည့် ဝန်ထမ်းတစ်ဦးပင်။ ကျီရှောင်ထောင်းနှင့် သူက အတော်လေးရင်းနှီးကြသည်။
ဖန်းရှောက်ယိနှင့် ယန်စစ်ရန်က ဇာတ်ညွှန်းအတူတူလေ့ကျင့်နေကြသည်။ ချန်းထုံက ကျီရှောင်ထောင်းဆီလျှောက်သွားပြီး သူ့နံဘေးမှာ ဆောင့်ကြောင့်ထိုင်ချလိုက်၏။
ကျီရှောင်ထောင်းက နှုတ်ဆက်လိုက်ပြီး ဖန်းရှောက်ယိ၏ထိုင်ခုံဆီရွေ့ကာ သူအစကထိုင်ခဲ့သည့်နေရာသို့ညွှန်ပြလိုက်လေသည်။ "ဒီမှာထိုင်လိုက်။"
ချန်းထုံက ပြုံးပြကာ ဝင်ထိုင်လိုက်၏။
ကျီရှောင်ထောင်းက ဖန်းရှောက်ယိ၏အဝတ်အိတ်ကိုပိုက်ထားရင်း ချန်းထုံနှင့် စကားပြောနေခဲ့သည်။ "မင်း သူနဲ့ ရေရှည်သွားရမှာလား။"
"မသိသေးဘူး။ ကျွန်တော်ထင်တာတော့ အထက်ကအမိန့်ပေးတာကိုပဲ နားထောင်ရမှာပဲ။" ချန်းထုံကသက်ပြင်းချလိုက်သည်။ "တကယ်တော့ ကျွန်တော် ဒီအတောအတွင်းမှာ သိပ်ပြီးစွမ်းဆောင်ရည်မရှိသလိုခံစားနေရတာ။ ဒီနှစ်တွေအတွင်း နောက်ကျတဲ့ထိနေရတာ ပိုပိုပြီးဆိုးလာတယ်။"
ကျီရှောင်ထောင်းက ရယ်လိုက်လေ၏။ သူက တစ်ဖက်လူကိုကြည့်ကာ ပြောလိုက်သည်။ "မင်းက အသက်ဘယ်နှနှစ်မို့လဲ။ နောက်ကျတဲ့ထိ မနေနိုင်သေးဘူးလား။"
ချန်းထုံ: "ကျွန်တော့်ရဲ့ခန္ဓာကိုယ်အခြေအနေက မကောင်းဘူးလေ၊ ကောထက်တောင်ပိုဆိုးတယ် ထောင်းကောရ။ ကျွန်တော်က ညလုံးပေါက်မနေနိုင်ဘူး။ အဲ့လိုနေလိုက်ရင် ခေါင်းတွေထိုးကိုက်လာရော။"
ထိုစဥ် ကျီရှောင်ထောင်း၏ဖုန်းထဲသို့ မက်ဆေ့ချ်နှစ်စောင်ရောက်လာခဲ့သည်။ ၎င်းတို့က ကျန်းရွှီ၏လက်ထောက်ဆီမှဖြစ်ပြီး ယင်းတို့က အရေးကြီးကိစ္စမဟုတ်ဘဲ ရူးကြောင်ကြောင်စတစ်ကာလေးနှစ်ခုသာ။ "ဒါဆို မန်နေဂျာဖြစ်လာဖို့ ရွှေ့ပြောင်းဖို့အကြောင်း ခေါင်းဆောင်တွေကို တောင်းဆိုစာတင်လိုက်လေ။ အဲ့ဒါက ပိုသက်သာတယ်၊ ဒါပေမဲ့ နှစ်ဝက်လောက်ကနေ တစ်နှစ်အထိ လူသစ်လေးတွေနောက်ပဲ လိုက်နေရလိမ့်မယ်။"
"အမ်း၊ ကျွန်တော် အရင်တစ်ခေါက်က လင်းကောကို ပြောဖူးတယ်။" ချန်းထုံက ပြောလိုက်သည်။ "ရိုက်ကူးရေးအတွက် သရုပ်ဆောင်တွေနောက်လိုက်ရတာက တကယ်တော့ အတော်လေးများတယ်။"
ကျီရှောင်ထောင်းတစ်ယောက် သူနှင့် စကားပြောဆိုနေစဥ် WeChat တွင် ကျန်းရွှီ၏လက်ထောက်ဆီမှ စတစ်ကာစစ်ပွဲကိုလည်း ရရှိနေခဲ့သည်။ ထိုရက်ပိုင်းအတွင်း ကျန်းရွှီက ရုပ်ရှင်ဧကရာဇ်တစ်ပါး ဖြစ်နေဆဲပင်။ ဇာတ်လမ်းတွဲထဲ သူပါလိုက်သည်နှင့် ကြည့်ရှုနှုန်းမှာ ကောင်းမွန်ဖို့ အာမခံချက်ရှိပြီဖြစ်၏။ ဇာတ်ညွှန်းမဆိုးရွားဘဲ အကြိုထုတ်လုပ်ရေးကို ဖြတ်ကျော်နိုင်သရွေ့ ကြည့်ရှုမှုကို ဆွဲတင်နိုင်လိမ့်မည်ပင်။ ဖန်းရှောက်ယိနှင့် သူက နှစ်အတော်ကြာသည့်တိုင် ကောင်းမွန်သောဆက်ဆံရေးကို ထိန်းသိမ်းထားနိုင်ခဲ့သည်။ ၎သ်းတို့၏ အတန်းထဲမှ နာမည်ကြီးတချို့ကို မွေးထုတ်ပေးနိုင်ခဲ့သော်လည်း သူတို့နှစ်ဦးကတော့ ဂုဏ်သတင်းအမြင့်မားဆုံးနှစ်ယောက်ဖြစ်သည်။ ကျန်းရွှီ၏လက်ထောက်က နှစ်ဆယ့်လေးနှစ်ပြည့်ပြီးခါစဖြစ်၏။ သူက မနှစ်ကမှ ဖျော်ဖြေရေးနယ်ပယ်ထဲ စတင်အခြေချခဲ့ရာ သူ့ကိုယ်သူ လူသစ်တစ်ယောက်လိုသာ အမြဲဆက်ဆံတတ်ပေသည်။ သူက အနည်းငယ်ရူးကြောင်ကြောင်နိုင်ပြီး စတစ်ကာများပို့ရသည်ကို အတော်လေးသဘောကျပေ၏။
ကျီရှောင်းထောင်းက WeChat ကနေ မေးလိုက်သည်။ [ပေကျင်းမှာပဲလား။]
ကျန်းရွှီ၏လက်ထောက်နာမည်က သုန်လင်းဖြစ်သည်။ သူက ပြန်ပို့လာ၏။ [မဟုတ်ဘူး၊ X မို့မှာ။ ကျွန်တော်တို့ အရမ်းကို နီးနီးလေးရော်။]
ကျီရှောင်ထောင်း: [ကောင်းကောင်းပြောစမ်းပါ။]
သုန်လင်း: [ဟားဟားဟားဟား ဘာလို့ ကျွန်တော်က စနေတယ်လို့များ ထင်ရတာလဲ။ ကျွန်တော့်ရဲ့ကျန်းကောကပြောတယ်၊ ကျွန်တော်တို့က အရမ်းနီးတာကြောင့် တွေ့လို့တောင်ရတယ်တဲ့။]
ကျီရှောင်ထောင်း: [တကယ်လား။ ဒီမှာ ရိုက်ကူးရေးရှိတာပေါ့?]
သုန်လင်း: [တ~ကယ်။]
ကျီရှောင်ထောင်း: [အရမ်း gay ဆန်တယ်။]
အမှန်မှာ ထိုကလေးက အဖြောင့်တစ်ယောက်ဖြစ်ပြီး မိန်းကလေးလည်းမဆန်ဘဲ တမင်သက်သက် ရူးနှမ်းသလို ပြုမူနေခြင်းသာ။ ကျီရှောင်ထောင်းတစ်ယောက် သူနှင့် ခဏလောက်စကားပြောနေခဲ့သည်။ ဖန်းရှောက်ယိရိုက်ကူးရေးပြီးသောအခါ ကျီရှောင်ထောင်းက သူ့ကိုပြောပြလိုက်၏။ "ကျန်းကောကလည်း X မြို့မှာပဲတဲ့၊ သူနဲ့ တစ်နပ်လောက်အတူစားဖို့ တွေ့ချင်လိုက်တာ။"
ဖန်းရှောက်ယိက မေးလိုက်သည်။ "ဒီကိုဘာလို့လဲ။ ရိုက်ကူးရေးရှိတာလား?"
ကျီရှောင်ထောင်းက ပြန်ဖြေလိုက်၏။ "ဟုတ်တယ်။ သုန်လင်းပြောတာတော့ ဒီမှာရက်လေးဆယ်လောက် ရိုက်ကူးရေးအတွက် အချိန်ဇယားရှိတယ်တဲ့။"
ဖန်းရှောက်ယိက ခေါင်းညိတ်လိုက်သည်။ "ဒါဆို အချိန်ရွေးထားလိုက်။ ငါတို့နှစ်ယောက်လုံးအားတဲ့အချိန်ကျ သူနဲ့အတူ ထမင်းစားဖို့ သွားလိုက်မယ်။"
ယန်စစ်ရန်နှင့် ချန်းတုံတို့ကလည်း သူတို့နှင့် သိပ်မဝေးသောနေရာတွင်ရှိနေသည်။ ကျီရှောင်ထောင်းက ယန်စစ်ရန်တီးတိုးပြောသံကို ကြားလိုက်ရသည်။ "အနာဂတ်မှာ ကျွန်တော့်ရဲ့ဖုန်းကို မစစ်လို့မရဘူးလား။ မက်ဆေ့ချ်တွေရှိနေရင်လည်း ဒီတိုင်းပဲထားလိုက်ပါ။"
သူ ချန်းတုံ၏ပြန်ပြောသံကိုတော့ မကြားလိုက်ရပေ။ သူ၏အသံက အလွန်ကို တိုးလျနေ၏။ ဖန်းရှောက်ယိက အနားတွင်ရှိနေသောကြောင့် စကားအကျယ်ကြီးမပြောရဲခြင်းလည်း ဖြစ်နိုင်ပေသည်။ ကျီရှောင်ထောင်းက သူတို့ဘက်သို့ တစ်ချက်ကြည့်လိုက်ပြီး ဖန်းရှောက်ယိနှင့် စကားဆက်ပြောနေခဲ့သည်။
၎င်းတို့ စောစောကရိုက်ကူးခဲ့သောရိုက်ချက်မှာ အဆင်မပြေသေးပေ။ ထို့ကြောင့် ပြန်လည်ရိုက်ရဦးမည်ဖြစ်သည်။ ရိုက်ချက်များကြား အနားယူချိန်အတွင်း ဖန်းရှောက်ယိက ပုံမှန်အားဖြင့် စကားသိပ်မပြောတတ်ပေ။ သူ၏စိတ်ခံစားချက်ကို ထိန်းသိမ်းထားရန်လိုအပ်ပြီး မသက်ဆိုင်သောအကြောင်းအရာများက သူ၏စိတ်ခံစားချက်များကို လွှင့်စင်သွားစေနိုင်သောကြောင့်ဖြစ်သည်။
ယန်စစ်ရန်က ဆန့်ကျင်ဘက်အရပ်သို့ ခြေလှမ်းအနည်းငယ်လှမ်းသွားလိုက်ပြီး ချန်းတုံက အနောက်မှလိုက်သွားခဲ့သည်။ ထို့ကြောင့် ဖန်းရှောက်ယိနှင့် ကျီရှောင်ထောင်းတို့ သူတို့၏စကားဝိုင်းကို မကြားတော့နိုင်ပေ။ ယန်စစ်ရန်က မျက်မှောင်ကြုတ်လိုက်ရာ ချန်းတုံ၏ပြန်ပြောသည့်စကားကို အလိုမကျနေခြင်းဖြစ်လောက်မည်။ သူက အသံကိုနှိမ့်ထားပြီး တစ်ခုခုကိုဆက်ပြောနေခဲ့သည်။
ကျီရှောင်ထောင်းက ဖန်းရှောက်ယိကို ရေဘူးလှမ်းပေးလိုက်သည်။ ဖန်းရှောက်ယိကလည် တိတ်တဆိတ်ပင်ယူကာ လည်ချောင်းရှင်းသွားအောင် တစ်ငုံသောက်လိုက်လေ၏။
...
ယခုတစ်ကြိမ်တွင် ကျန်းရွှီက ဇာတ်ကားရိုက်ကူးရန် ရိုက်ကူးရေးစတူဒီယိုသို့ လာခဲ့ခြင်းဖြစ်သည်။ သူနှင့် ဖန်းရှောက်ယိတို့၏နေရာက ကားနှင့်ဆို နှစ်နာရီခန့်သာ ဝေးသည်။ ဖန်းရှောက်ယိတစ်ယောက် သူ့ဆီသွားလည်ရန် အားလပ်ချိန်ကို ရှာတွေ့ခဲ့သည်။
ဒါရိုက်တာက ငယ်ရွယ်ပြီး လူသစ်ဖြစ်ကာ ဆန်းသစ်သောဒါရိုက်တာဖြစ်ပေ၏။ ဖန်းရှောက်ယိ ယခင်က သူနှင့် အလုပ်တွဲမလုပ်ဖူးသော်လည်း ရုပ်ရှင်ပွဲတော်များ၌ အကြိမ်အနည်းငယ်လောက် တွေ့ဖူးပြီး စကားလည်းပြောဖူးပေသည်။ ယခုတွင် ၎င်းတို့က ပေါ့ပေါ့ပါးပါးအချစ်ဇာတ်လမ်းကို ရိုက်ကူးနေကြသည်။ ကျန်းရွှီ၏ဇာတ်ကောင်က အပြင်ပိုင်းတွင် မှုန်ကုပ်ကုပ်နှင့် အတွင်းပိုင်းတွင်နူးညံ့သော PE ဆရာဖြစ်၏။ ၎င်းမှာ ပေါက်ပေါက်စား၊ coke သောက်ရင်းဖြင့် အလွယ်တကူရိုက်ကူးနိုင်သော ဂန္တဝင်ချစ်သူများနေ့ရုပ်ရှင်မျိုးဖြစ်သည်။ ဒါရိုက်တာမှာ မည်သည့်အစွန်းရောက်သောရည်မှန်းချက်မျှ မရှိချေ။ ထိုကဲ့သို့ရုပ်ရှင်အမျိုးအစားများကို ရိုက်ကူးရခြင်းမှာ ဘယ်လောက်မှလည်း မပင်ပန်းပါချေ။
ဒါရိုက်တာက ကျီရှောင်ထောင်းဝယ်လာပေးသော အအေးကို စုပ်သောက်ကာ ဖန်းရှောက်ယိနှင့် ပျော်ရွှင်စွာ စကားပြောနေခဲ့သည်။ သူက ဖန်းရှောက်ယိထက်တောင် တစ်နှစ်ငယ်လေရာ ဒါရိုက်တာနယ်ပယ်တွင် အတော်လေးငယ်ရွယ်သည်ဟု သတ်မှတ်နိုင်ပေ၏။ သူက ပြောလာ၏။ "ရှောက်ယိကော လာလည်တာကို ဓါတ်ပုံလေးရိုက်ပေးပါဦး။ ကျွန်တော်တို့ နောက်ကျ Weibo မှာ တင်လိုက်မယ်။"
သူတို့ဘေးရှိလူများက ရယ်လိုက်ကြ၏။ ကျန်းရွှီက မေးလိုက်သည်။ "ဒါဆို ငါတို့တွေ ထိုင်ပြီးရိုက်ပေးရမလား။"
"ကိစ္စမရှိပါဘူး။ ဘယ်လိုဖြစ်ဖြစ် အတူတူပါပဲ။ အစ်ကိုပို့စ်တင်တဲ့အခါမှသာ ကျွန်တော့်ရဲ့ခြေထောက်တွေကိုရှည်ပေးလိုက်လေ။" ဒါရိုက်တာက ပြောလာခဲ့သည်။
ထိုနေ့က ဖန်းရှောက်ယိနှင့် ကျန်းရွှီတို့သည် ကျီရှောင်ထောင်း၊ သုန်လင်းတို့နှင့်အတူ သွားစားခဲ့ကြသည်။ ၎င်းတို့က သူငယ်ချင်းဟောင်းများဖြစ်ရာ သူတို့၏လက်ထောက်များက သူတို့နှင့်အတူစားနေခြင်းမှာလည်း ကိစ္စမရှိပေ။ အမှန်မှာ အတိတ်နှစ်များတုန်းက ဖန်းရှောက်ယိနှင့် ကျန်းရွှီတို့သည် မကြာခဏမတွေ့နိုင်ခဲ့ကြပေ။ သိူြသော်လည်း ၎င်းတို့၏ဆက်ဆံရေးက လုံးဝဝေးကွာမသွားခဲ့ချေ။ သူတို့တွေ့ဆုံသည့်အခါတိုင်း ပြောစရာများ များစွာရှိနေသေးသည်။ ၎င်းတို့နှစ်ဦးက သူငယ်ချင်းကောင်းများကြောင်း လူတိုင်း သိကြပေ၏ - အစစ်အမှန်ပင် အလွန်ကောင်းမွန်သော သူငယ်ချင်းကောင်းများဖြစ်ကြသည်။
သီးသန့်အခန်းထဲတွင် ကျန်းရွှီက ရှပ်အင်္ကျီကိုချွတ်၍ စွပ်ကျယ်တစ်ထည်တည်းကိုသာ ဝတ်ဆင်ထားသည်။ ကျီရှောင်ထောင်းက ရယ်မောလိက် ပြောလိုက်လေ၏။ "ကျန်းကောရဲ့ ကြွက်သားတွေက ကြည့်ကောင်းတာပဲ။"
ကျန်းရွှီက နှာမှုတ်ကာ သူ့ကိုမေးလာခဲ့သည်။ "ငါ့ကိုလှောင်နေတာလား။ မင်းရဲ့ကောရှေ့မှာ ငါ့ရဲ့ကြွက်သားတွေအကြောင်းပြောဖို့ မျက်နှာရှိသေးတယ်ပေါ့။"
"ကောက ကျွန်တော့်ကောထက် နည်းနည်းပဲ နည်းတာပါ။" ကျီရှောင်ထောင်းက ပြောလိုက်သည်။ "ကျွန်တော့်ကောကိုမကြည့်ဘဲ ကောကိုပဲကြည့်မယ်ဆိုရင်တော့ ကောရဲ့ကြွက်သားတွေက တကယ်ကောင်းတာပါ။"
"ငါတော့ မင်းက ငါ့ကိုချီးကျူးနေတာလား၊ မင်းရဲ့ကောကိုချီးကျူးနေတာလားတောင် မသဲကွဲတော့ဘူး။" ကျန်းရွှီက ဘီယာဘူးကို ဖွင့်ဖောက်ရင်း ဖန်းရှောက်ယိကိုလည်း မေးလိုက်သည်။ "သောက်ဦးမလား။"
ဖန်းရှောက်ယိက အရက်သောက်ခဲပေသည်။ သူက သူ့အတွက် ရေနွေးကြမ်းကိုသာငှဲ့လိုက်သည်။
ကျန်းရွှီက သူ၏ခွက်ကို တစ်ဖက်လူ၏ခွက်နှင့် တိုက်လိုက်လေ၏။ "ခွက်တိုက်ရအောင် သာ့ကော၊ ငါတို့မတွေ့တာ နှစ်ဝက်လောက်တောင်ရှိတော့မယ်။"
ဖန်းရှောက်ယိက သူ့ကိုမေးလိုက်၏။ "ဒါပြီးရင် မင်းမှာလုပ်စရာတွေရှိသေးလား။"
"အင်း။ ဒီရုပ်ရှင်ပြီးရင် သမိုင်းနောက်ခံဇာတ်လမ်းတွဲရိုက်ဖို့ရှိတယ်။ အဲ့ဒါပြီးရင်တော့ ဘာမှမရှိတော့ဘူး။ ငါအနားယူချင်သေးတယ်။" ကျန်းရွှီက ပြောခဲ့သည်။
ကျန်းရွှီက သိပ်မစားပေ။ သူက အရွက်သုတ်ကိုသာမှာလိုက်ပြီး ဖြည်းဖြည်းချင်းဝါးနေခဲ့သည်။ စားနေရင်းဖြင့် သူက ပြောလာ၏။ "ငါ့ရဲ့နည်းပြက အဲ့ဒါတွေ မစားခိုင်းဘူး။ သူက ငါ့ကိုကြက်ဥစားခိုင်းပေမဲ့ ငါမစားပါဘူး။ ငါ အဲ့သောက်ကျိုးနည်းကြက်ဥတွေကို အမုန်းဆုံးပဲ။"
ဖန်းရှောက်ယိ: "အစားထိုးအနေနဲ့ သက်ရောက်မှုတူတဲ့ တခြားတစ်ခုခုစားလေ။"
ကျန်းရွှီနှင့် ဖန်းရှောက်ယိတို့က အသက်တူအရွယ်တူများဖြစ်သည်။ ထိုနှစ်များတွင် ဖန်းရှောက်ယိက အချစ်ဟာသဇာတ်လမ်းများကို လုံးဝမရိုက်ကူးဖူးသော်လည်း ကျန်းရွှီကတော့ အများအပြားရိုက်ကူးခဲ့သည်။ သို့သော် သူကလည်း သုံးဆယ့်ခြောက်နှစ်ဖြစ်ရာ နောက်နှစ်အနည်းငယ်အတွင်း ထိုလမ်းကြောင်းအား ဆက်သွားလို့ရတော့မည်မဟုတ်ပေ။ သူ၏ပုံရိပ်ကို ပြောင်းလဲရန်လိုအပ်ပေသည်။
ဖန်းရှောက်ယိနှင့် သူက သူငယ်ချင်းများဖြစ်ကြပြီး သူတို့ကြားမှာ မပြောနိုင်သည့်အကြောင်းအရာဟူ၍ ဘာမှမရှိပေ။ ၎င်းတို့ ကျောင်းတက်ခဲ့စဥ်ကလည်း တစ်နေ့လုံး အတူတူအချိန်ဖြုန်းခဲ့ကြသည်။ ထိုနှစ်များမှ ယနေ့အထိ နှစ်ဦးသား တစ်ခါမှစကားမများဖူးပေ။ ၎င်းတို့က ဤနယ်ပယ်ရှိ စစ်မှန်သောညီအစ်ကိုကောင်းများဖြစ်ကြသည်။
ဖန်းရှောက်ယိက ပြောလိုက်သည်။ "မင်းရဲ့ပုံရိပ်ကိုပြောင်းချင်ရင် ဒီလိုဇာတ်ကားမျိုးရိုက်ကူးဖို့ ကမ်းလှမ်းချက်တွေကို ဆက်ပြီး လက်မခံနဲ့တော့။ မင်းရဲ့ပရိသတ်တွေကတော့ လက်မှတ်ရောင်းကုန်တဲ့အထိ အားပေးမှာပဲ။ ဒါပေမဲ့ အချိန်ကြာလာရင် မင်းရဲ့ပုံရိပ်က အခြေကျသွားလိမ့်မယ်။ အဲ့လိုဆို ဘာအကျိုးမှမရှိဘူး။"
ကျန်းရွှီက တစ်ဖက်လူကို ရေနွေးကြမ်းထပ်ဖြည့်ပေးရင်း ခါးသက်စွာရယ်မောလိုက်သည်။ "ဘယ်သူမှ ငါ့ကိုလာမကမ်းလှမ်းကြဘူး သာ့ကောရဲ့။ ဒီရက်တွေမှာ ငါ့ကိုလာကမ်းလှမ်းတာတွေက တတိယဇာတ်လိုက်နေရာနဲ့ အဲ့ထက်နိမ့်တဲ့ဟာတွေပဲ။ ရှိရင်တောင် ချီးထုပ်ရုပ်ရှင်တွေပဲ။ ဒီတစ်ခေါက်ဇာတ်ရုပ်က တကယ်အဆင်ပြေတယ်။ အနည်းဆုံးတော့ ဇာတ်ညွှန်းက အဆင်ပြေတယ်။ ရုပ်ရှင်ထဲ ဧည့်သည်သရုပ်ဆောင်ဆိုရင်တောင် ငါလက်ခံဦးမှာကွာ။ ဘယ်လိုလုပ် တတိယ၊ စတုတ္ထဇာတ်လိုက်အဖြစ် သရုပ်ဆောင်ရမှာလဲ။"
ကျန်းရွှီက ဇာတ်လမ်းတွဲလောကတွင် A အဆင့်ရှိ အနုပညာရှင်တစ်ယောက်ဖြစ်သည်။ ဤနှစ်များအတွင်း သူ၏နေရာကို ထိန်းသိမ်းထားနိုင်ခဲ့၏။ သို့သော် သူက အိုင်ဒေါဇာတ်လမ်းတွဲများတွင် ထပ်ပြီးသရုပ်မဆောင်တော့ပေ။ လက်ရှိတွင် ဤနယ်ပယ်၌ ထုတ်လွှင့်နိုင်သည့် ဇာတ်လမ်းတွဲအမျိုးအစားများစွာရှိသည်။ စစ်ပွဲနောက်ခံဇာတ်လမ်းတွဲများမှအပ ရိုက်ကူးနိုင်သည့်အရေအတွက်အကန့်အသတ်မှာ များလွန်းပေ၏။
မနှစ်ကမှ သူသည် လက်ထက်ပြီးသားအိမ်ထောင်ရေးဇာတ်လမ်းတွဲတစ်ခု ရိုက်ကူးခဲ့ပြီး ကောင်းသည့်မှတ်ချက်များလည်းရရှိခဲ့သည်။ သို့သော် ထိုသို့သောအမျိုးအစားများ ရိုက်ကူးခြင်းက သရုပ်ဆောင်များကိုတောင် ပျင်းသွားစေနိုင်သည်။ ထုတ်လုပ်မှုကြီးမားသော နိုင်ငံရေးနောက်ခံဇာတ်လမ်းတွဲများကို နှစ်တိုင်းရရရှိရန်မှာလည်း ရှားလွန်းလှသည်။ ကျန်းရွှီကလည်း စောင့်နေဖို့ မတတ်နိုင်ချေ။
ယင်းက အလွန်ကသိကအောက်နိုင်သည့် အခြေအနေပင်။ သူ၏စတူဒီယိုနှင့် ကုမ္ပဏီအရင်းအမြစ်များသည် အားလုံးမှာ ရုပ်သံဇာတ်လမ်းတွဲနယ်ပယ်သာဖြစ်သည်။ ၎င်းတို့က ရုပ်ရှင်နယ်ပယ်ထဲ မဝင်ရောက်နိုင်ရာ ကြီးမားသောထုတ်လုပ်မှုများအတွက် ကမ်းလှမ်းမှုများလည်း မရနိုင်ပေ။ နာမည်ကြီးဒါရိုက်တာအများစုမှာ ကိုယ်ပိုင်ပုံစံရှိသော သရုပ်ဆောင်များရှိတတ်ကြသည်။ ကျန်းရွှီကလည်း ဇာတ်ကြမ်းရုပ်ရှင်များတွင် မပါဝင်ချင်ပေ။ ထို့ကြောင့် တစ်နှစ်ပြီးတစ်နှစ် အီးလေးဆွဲနေခဲ့သည်။ ဤသည်မှာ သူ ဇာတ်လမ်းတွဲများ ဆက်လက်ရိုက်ကူးနေခြင်း၏ အကြောင်းပြချက်ဖြစ်သည်။
ဖန်းရှောက်ယိက ပြောလိုက်သည်။ "တချို့ဇာတ်ကားတွေမှာဆို တတိယ ဒါမှမဟုတ် စတုတ္ထဇာတ်လိုက်နေရာကလည်း မဆိုးပါဘူး။ မင်း မနှစ်က ဒါရိုက်တာဝေ့ရဲ့ကမ်းလှမ်းချက်ကို ငြင်းလိုက်တယ်ဆို။ ငါ မင်းအတွက် မျက်လုံးရှင်ရှင်ထားပေးထားမယ်။ အနာဂတ်မှာ မင်းနဲ့သင့်တော်တဲ့ဇာတ်ကောင်တွေ့ရင် မင်းကိုပြောပေးမယ်။ ဒါဆို မင်းကုမ္ပဏီကို ဖြစ်နိုင်ခြေရှိ၊ မရှိ သွားမေးခိုင်းလိုက်လို့ရတယ်။"
နှစ်တိုင်းနှစ်တိိုင်း ဖန်းရှောက်ယိက သူ၏အချိန်ဇယားကြောင့် ရုပ်ရှင်တော်တော်များများကို ငြင်းလိုက်ရသည်။ သို့သော် သူနှင့် ကျန်းရွှီက လုံးဝဆန့်ကျင်ဘက်ပင်။ ယေဘုယျအားဖြင့် သူ့ကိုကမ်းလှမ်းသောရုပ်ရှင်များက ကျန်းရွှီအတွက် အကောင်းဆုံးအံဝင်ခွင်ကျဖြစ်စရာမလိုပေ။ ထို့အပြင် တစ်ဖက်လူက သေးသေးမွှားမွှားဇာတ်ကောင်လေးရရန်အတွက် တိုးဝှေ့နေရမည့် ကုမ္ပဏီက လူသစ်လေးလည်းမဟုတ်ချေ။ ကျန်းရွှီက အရေးပါသောဇာတ်ကောင်နေရာရရန်လိုအပ်သည်။ ၎င်းတို့အားမေးမြန်းခြင်းဖြင့် နာမည်ကြီးဒါရိုက်တာများ၏ ရုပ်ရှင်များတွင် ထိုသို့ဇာတ်ကောင်ရရန်မှာ လုံးဝမဖြစ်နိုင်ပေ။
"ကျေးဇူးကွာ။ ဒါရိုက်တာဝေ့ရဲ့ရုပ်ရှင်အတွက်က... အမျိုးသမီးဇာတ်လိုက်က ငါ့ ရည်းစားဟောင်းဖြစ်နေတယ်၊ သာ့ကောရ!" ကျန်းရွှီက ဦးခေါင်းကို အနောက်သို့လှန်ချပြီး ရယ်လေတော့သည်။ သူက ဖမ်းရှောက်ယိကိုကြည့်ကာ ပြောလိုက်၏။ "ငါ့အကြောင်းပြောနေတာရပ်ပြီး မင်းအကြောင်းပြောရအောင်။ မကြာခင်ကပဲ အရမ်းအလုပ်ရှုပ်နေခဲ့တာမလား ဟမ်?"
သုန်လင်းက အချိန်အတော်ကြာ တိတ်တဆိတ်သာနေနေခဲ့သော်လည်း ယခုမှာမူ နောက်ဆုံးတော့ သူလည်း ဖင်လှုပ်နိုင်ခဲ့သည်။ "ဟားဟားဟား၊ ယွမ်ယယ်ကောက ကောကိုလိုက်နေပြီလား ရှောက်ယိကော?"
လူအများစုက ဖန်းရှောက်ယိကိုတွေ့လျှင် ထိုအကြောင်းကို စနောက်မပြောရဲကြသော်လည်း ကျန်းရွှီကတော့ ဘာပြဿနာမှမရှိပေ။ ဖန်းရှောက်ယိအပြင် သူက ယွမ်ယယ်နှင့်လည်း အလွန်ရင်းနှီးသည်။ ယွမ်ယယ် ပဲစေ့လေးသာဖြစ်နေချိန်ကတည်းက သူသည် တစ်ဖက်လူကို သိနေပြီဖြစ်၏။ ၎င်းတို့သုံးယောက်မှာ မကြာခဏဆိုသလို အတူတူ အပြင်ထွက်စားတတ်ကြသည်။ ထိုအချိန်က သူသည် ယွမ်ယယ်အား လက်ပါးစေအငယ်လေးလိုသာ ဆက်ဆံခဲ့သည်။ မမျှော်လင့်စွာနှင့် ယွမ်ယယ်က ဖန်းရှောက်ယိနှင့်အတူရှိဖို့ အမှန်တကယ်စီမံနိုင်ခဲ့သည်။
နောက်ပိုင်းတွင် အမှန်တကယ် ကွာရှင်းခဲ့ကြသည်။
ကျီရှောင်ထောင်းက သုန်လင်းအား တံတောင်ဖြင့်တွက်လိုက်၏။ "မင်း ဘာအကြောင်းတွေ စုံစမ်းနေတာလဲ။"
ကျန်းရွှီက ဆူလိုက်လေသည်။ "ငါ့လက်ထောက်ကို တံတောင်နဲ့မတွက်နဲ့။ လာ သုန်လင်း မေးလိုက်၊ မင်းရဲ့ရှောက်ယိကောကို ယွမ်ယယ်ကောနဲ့အတူရှိနေပြီလား၊ မရှိကြသေးဘူးလားလို့။"
ထိုအချိန်တွင် ဖန်းရှောက်ယိက သူတို့အားလုံးကို လျစ်လျူရှုကာ အစားအသောက်ကိုပဲစားနေပြီး ဘာမှမပြောခဲ့ပေ။
ကျန်းရွှီ: "မင်းတို့နှစ်ယောက် အတူရှိတာပဲကြာသွားလို့လား၊ မင်းတို့ ပြဿနာနည်းနည်းမှမရှာရရင် သက်တောင့်သက်သာမရှိကြသလိုပဲနော်။ မနှစ်တုန်းက မင်းတို့ကောင်တွေကို ဘာမှကောင်းတာဖြစ်လာမှာမဟုတ်ဘူးနော်လို့ ငါပြောခဲ့တယ်။ ဒါကရော ဘယ်လိုပျော်စရာမျိုးလဲ။"
ဖန်းရှောက်ယိက ထမင်းစားပွဲ၌ သူနှင့် ယွမ်ယယ်အကြောင်းပြောနေခြင်းကို သဘောမကျပေ။ သူကလည်း ထိုအကြောင်းအရာကို အစမဖော်ခဲ့ချေ။ ၎င်းမှာ ကျန်းရွှီဖြစ်နေသော်လည်း သူဘာကိုမှမပြောပြချင်ပေ။
ထို့အပြင် ဖန်းရှောက်ယိတွင် ဘာမှပြောစရာလည်းမရှိပေ။ သူဘာပြောနိုင်မည်နည်း။ ထို Weibo ပို့စ်တင်ပြီးနောက်ပိုင်း ယွမ်ယယ်က သူ့ကို အမှန်တကယ်မလိုက်ပါဟု ပြောရမည်လော။ တစ်ဖက်လူမှာ သူ့ကိုပြန်လိုက်ဖို့ အရိပ်အမြွက်လေးတောင်မစသေးသော်လည်း ယခုတွင် ၎င်းတို့နှစ်ယောက်က ညအချိန်၌ ဖုန်းခေါ်ခြင်း၊ စာပို့ခြင်းများလုပ်နိုင်ခဲ့ကြသည်။
အမှန်တိုင်းပြောရန်မှာ အတော်လေးရှက်စရာကောင်းလှ၏။ မျောက်ကလေးမှာ မယုံကြည်ရပေ။
သူ အရမ်းမယုံကြည်ရနိုင်လောက်အောင် မျောက်ကလေးက လက်တလောတွင် မည်သည့်အရာများဖြင့်အလုပ်များနေသနည်း။
...
ယွမ်ယယ်က ဖုန်းကို နားနှင့်ပခုံးကြားညှပ်ထားသည်။ ရေနွေးကြမ်းအိုးတည်နေရင်း သူက အသံပြုလိုက်သည်။
"ဒီတော့ မင်းစောစောကပြောခဲ့တာတွေက ချီးထုပ်ဇာတ်ညွှန်းကြီးပေါ့။" ယွမ်ယယ်က ရေနွေးကြမ်းကိုယူကာ စားပွဲပေါ်တင်လိုက်ပြီးနောက် အကြောဆန့်လိုက်လေသည်။ "အရင်က မင်းဘာလုပ်နေတာလဲ။ မင်းမဝယ်ခင် ငါ့ကိုလာမေးပါ့လား။"
"ငါ မင်းကို ပေါ့ပေါ့တန်တန်ပြောနေတာမဟုတ်ဘူး။ ငါ ဇာတ်ညွှန်းကို ဇာတ်ကောင်တစ်ခုချင်းစီဖတ်ပြီးလို့ တစ်အုပ်လုံးပြီးသွားပြီ။ နိုးဆို နိုးပဲ။"
"ခြောက်သန်း? မင်း ဒီဇာတ်ညွှန်းကိုဝယ်လိုက်လို့ ငွေတော်တော်များများဆုံးရှုံးခဲ့ရတာကို ဝန်ခံလိုက်ပါကွာ။ မင်း နောက်ထပ်ခြောက်သန်းထပ်သုံးမယ်ဆိုရင် အနာဂတ်မှာ ငိုနေရတော့မှာ။ မဟုတ်ရင်လည်း လူနည်းနည်းလောက်အလုပ်ခန့်ပြီး မင်းအတွက် ဒီဇာတ်ညွှန်းကို ပြန်ရေးခိုင်းလိုက်လေ။ ဒါကို လုံးဝပြောင်းပစ်လိုက်ကွာ။"
"ဇာတ်လမ်းကို စဥ်းစားနေတာရပ်လိုက်တော့။ အဲ့မှာ သောက်ကျိုးနည်းဇာတ်လမ်းကိုမရှိတာကွ။"
"ငါ? ငါမရေးနိုင်ဘူး။ ငါအဲ့လိုမျိုးတွေမရေးနိုင်ဘူး။ အဲ့ဒါက ပိုက်ဆံကြောင့်မဟုတ်ဘူး။ တစ်သန်းပေးလည်းမရေးဘူး၊ ရှစ်သန်းပေးလည်းမရေးနိုင်ဘူး။ မင်းငါ့ကိုသတ်မယ်ဆိုရင်တောင် ငါမရေးပေးနိုင်ဘူး။"
"အနာဂတ်မှာ မင်းပိုက်ဆံမသုံးခင် ဦးနှောက်လေးသုံးဦး ဟုတ်ပြီလား။ ဘိုင့်ဘိုင် အချစ်လေး။"
ယွမ်ယယ်သည် ဖုန်းချကာ ဖုန်းကိုစားပွဲပေါ်ပစ်တင်လိုက်လေသည်။ သူသည် လက်ကိုအနောက်ပစ်ကာ သူ၏ဇာတ်ကြောကို နှိပ်လိုက်၏။ မကြာသေးမီက သူသည် သူ၏စာမူကို အလျင်အမြန်ထုတ်ရန် အလွန်အလေးအနက်ထားခဲ့သည်။ သူ၏ခန္ဓာကိုယ်ထဲက အရိုးများအားလုံး တောင့်တင်းနေပြီး သူလှုပ်ရှားလိုက်တိုင်း ကျိုးပဲ့သွားသလိုခံစားနေရ၏။
စောစောက နင်းလုတစ်ယောက် သူ့အားဖုန်းခေါ်ခဲ့သည်။ သူသည် ပြီးခဲ့သည့်လက ထိပ်တန်းဇာတ်ညွှန်းရေးဆရာတစ်ဦးထံမှ ဇာတ်ညွှန်းတစ်ခုကို ဝယ်ယူရန် ငွေကြေးအမြောက်အမြား သုံးစွဲခဲ့၏။ ၎င်းမှ ကြီးမားသော အမြတ်အစွန်းကို ရနိုင်မည်ဟု သူခံစားမိသောကြောင့် ယွမ်ယယ်ကို ပြောပြရန် ပို့လိုက်လေသည်။ အစီအစဥ်မှာ သူက ငွေခြောက်သန်း အကုန်အကျခံပြီး ရုပ်ရှင်တစ်ကားရိုက်ရန်ဖြစ်သည်။ သူသည် ယမန်နှစ်၏ 《Fairytales of the Wilderness》ကို ကျော်တက်ချင်နေလေသည်။
ယွမ်ယယ်က ပို့လိုက်သောဇာတ်ညွှန်းကို ရခဲ့သော်လည်း တစ်ခါမှမဖတ်ရသေးပေ။ မကြာသေးမီကလည်း သူတက်ရောက်ရမည့် အလုပ်ကိစ္စတချို့ရှိနေခဲ့၏။ မနေ့ကမှ နင်းလုသည် သူ့အား ၎င်းကိုဖတ်ကြည့်ရန် အလောတကြီးတိုက်တွန်းလာခဲ့သည်။ ယွမ်ယယ် စာမျက်နှာအနည်းငယ်ကို လှန်ကာ အမြန်ကြည့်လိုက်၏။ ထို့နောက် ချက်ချင်းဆိုသလို အဆင်မပြေမှန်းသိလိုက်လေ၏။ ထို့နောက် သူ သေသေချာချာလေး ဖတ်ကြည့်လိုက်ပြီးချိန်မှာတော့ အမှန်တကယ်အလုပ်မဖြစ်မှန်း သိသွားခဲ့သည်။ သူ အဆုံးထိဖတ်လိုက်ပြီးနောက်မှာ တစ်ယောက်ယောက်ကသာ ၎င်းကိုရုပ်ရှင်အဖြစ်ဖန်တီးမည်ဆိုလျှင် ၎င်းတို့တွေ သေချာပေါက် ပိုက်ဆံများဆုံးရှုံးရလိမ့်မည်ဖြစ်ကြောင်း သူရှာတွေ့သွားခဲ့သည်။
ဤဇာတ်ညွှန်းက တုံးအပြီး ချမ်းသာသော ရင်းနှီးမြှုပ်နှံသူများကို အရူးလုပ်ရန်သာဖြစ်သည်။ နင်းလုက ထိုတုံးအပြီး ချမ်းသာသော ရင်းနှီးမြှုပ်နှံသူဖြစ်ခဲ့သည်။
ဤအဖြစ်အပျက်မှာ တိုက်ဆိုင်လွန်းလှ၏။ ၎င်းအားမဝယ်ခင် နင်းလုက ယွမ်ယယ်ကို ကြည့်ပေးဖို့ အကူအညီတောင်းထားခဲ့သည်။ သို့သော် ထိုအချိန်မှာ ယွမ်ယယ်က Weibo ပေါ် ပို့စ်တင်ပြီးသည့်အချိန်ဖြစ်ရာ သူ ရက်အနည်းငယ်လောက် ပျောက်နေခဲ့သည်။ နင်းလုမှာ သူနှင့်အဆက်အသွယ်မရခဲ့ဘဲ ဇာတ်ညွှန်းရေးဆရာဆီမှာ အရူးလုပ်ခံလိုက်ရ၏။ သူသည် ဇာတ်ညွှန်းကိုဝယ်ကာ ယွမ်ယယ် သူ့ကိုချီးကျူးလာမည်ကိုပင် စောင့်နေခဲ့သေးသည်။ ယွမ်ယယ် သူ့ကိုပြန်ပေးသောစကားများကြောင့် သူ၏နှလုံးသားမှာ တစ်ဝက်လောက် အေးခဲသွားခဲ့ရှာသည်။ သူ ထိုကဲ့သို့ ဒေါ်လာပေါင်းများစွာကို ဖြုန်းတီးလိုက်မိခြင်းအား ဝန်ခံရန် ရှက်ရွံ့နေပေသည်။
နင်းလုက အမှန်တကယ် ရင်းနှီးမြှုပ်နှံသူတစ်ဦးဖြစ်၏။ သူက တုံးအပြီး ပိုက်ဆံအတော်လေးချမ်းသာသည်။ သူရင်းနှီးမြှုပ်နှံလိုက်သော ပရောဂျက်တိုင်းက အတော်လေးကံကောင်းခဲ့ပေ၏။
ယွမ်ယယ်က ခေါင်းယမ်းကာ ဇတ်ချိုးလိုက်လေသည်။
ထို့နောက်မှာတော့ ယွမ်ယယ်တစ်ယောက် အချိန်အကြာကြီး သည်းမခံနိုင်တော့ဘဲ နင်းလု၏ စုတ်ပြတ်နေသော ဇာတ်ညွှန်းကိုထုတ်ကာ စာလုံးပေါင်းတစ်ထောင်ကျော်လောက်ရှိသော ဇာတ်လမ်းအကျဉ်းကို ရေးသားခဲ့သည်။သူက အဓိကဇာတ်ကောင်များကို ဆွဲထုတ်၍ အကျဉ်းချုပ်အတိုကို ရေးသားခဲ့၏။
[မင်းငါ့ကိုယုံရင် ဒါကို ရုပ်ရှင်မရိုက်နဲ့။ စျေးလျှော့ပြီး ရောင်းနိုင်မလားဆိုတာပဲ ရှာကြည့်လိုက်။ ရုပ်ရှင်ရိုက်ဖို့ဆုံးဖြတ်ထားရင်တော့ ဒါတွေက ငါ့မှာရှိတဲ့ ဖြစ်နိုင်တဲ့အတွေးတွေပဲ။ အကုန်လုံးကို တစ်ချက်ပြန်ကြည့်ကြည့်လိုက်။]
ယွမ်ယယ်သည် နင်းလုအား အီးမေးလ်ပို့လိုက်ပြီး WeChat ကနေ သတိပေးထားလိုက်သည်။
အရင်နှစ်တစ်နှစ်လုံး သူက ဘာကိုမှမလုပ်ဘဲ အချိန်ဖြုန်းနေခဲ့သည်။ ယခုတွင် သူ့မှာ အကြွေးဆပ်စရာများ များစွာရှိနေ၏။ ယခုအချိန်အတောအတွင်း သူတော်တော်များများကို ပြန်ဆပ်ပြီးဖြစ်သည်။ ယွမ်ယယ်တစ်ယောက် ကိုယ်ပိုင်စာအုပ်ထုတ်ရန်အတွက် လုပ်နေသည်မှာ နှစ်နှစ်လောက်ရှိလေပြီ။ ၎င်းမှာ ဇာတ်သိမ်းသာလိုအပ်နေပြီး ရက်အနည်းငယ်အတွင်း အဆုံးသတ်နိုင်လိမ့်ပေမည်။
သူ အချိန်ကို တစ်ချက်ကြည့်လိုက်ရာ ညဆယ်နာရီရှိနေလေပြီ။ သူ ဖန်းရှောက်ယိကို ဖုန်းခေါ်လိုက်၏။ ဖုန်းက အချိန်အကြာကြီးမြည်နေခဲ့သည်။ နောက်ဆုံးမှာမှ ကိုင်လိုက်သော်လည်း ဖုန်းဖြေဆိုသူက ဖန်းရှောက်ယိမဟုတ်ပေ။
"ယယ်ကော? ယယ်ကော ကျွန်တော့်ရဲ့ကောကိုရှာနေတာလား။ ကျွန်တော့်ကောက ဒါရိုက်တာရဲ့အခန်းမှာ အစည်းအဝေးလုပ်နေတယ်!" ကျီရှောင်ထောင်းက အော်ပြောလာခဲ့သည်။
"အိုကေ၊ ဒါဆို ငါဘာမှမလိုတော့ဘူး။" ယွမ်ယယ်က ထိုသို့ပြောပြီး ဖုန်းချရန်ပြင်လိုက်သည်။
ကျီရှောင်ထောင်းက သူ့ကိုတားလိုက်လေ၏။ "ယယ်ကော!"
ယွမ်ယယ်မှာ ဒေါသတကြီး ပြန်ပြောလိုက်သည်။ "ငါ့ကို အော်အော်ပြီး မခေါ်နဲ့လို့။ ငါတစ်ခုခုမကောင်းတာဖြစ်နေသလိုမျိုး ခံစားရတယ်။"
"ယယ်ကော နောက်ဆုံးတော့ ကောလှုပ်ရှားပြီပေါ့!" ကျီရှောင်ထောင်း၏အသံက အတော်လေးစိတ်လှုပ်ရှားနေဟန်ပင်။ "ကျွန်တော် ကော ထပ်ပျောက်သွားပြန်ပြီလို့ ထင်လိုက်တာ!"
ယွမ်ယယ်က မျက်ခုံးပင့်လိုက်၏။ တစ်ဖက်လူမှာ သူနှင့် ဖန်းရှောက်ယိတို့၏ လျှို့ဝှက်ဖုန်းခေါ်ဆိုမှုများအကြောင်းကို မသိလောက်သေးပေ။ ယွမ်ယယ်က ရယ်လိုက်၏။ "အာ"
ကျီရှောင်ထောင်း: "ယယ်ကော၊ ကော ဘာတွေအလုပ်များနေတာလဲ။"
ယွမ်ယယ်သည် သူနှင့် အာလာပ သလ္လာပလေးတောင်ပြောရန် အချိန်မရှိပေ။ သူ ပြောလိုက်သည်။ "ငါတကယ်အလုပ်များနေတာ။ ထောင်း-အာ*၊ ငါ့မှာ လုပ်စရာတွေအများကြီးကျန်သေးတယ် ငါအရင်ဖုန်းချလိုက်တော့မယ်နော်။"
[TN/ ရင်းနှီးတဲ့သူတွေ/ငယ်တဲ့သူတွေကို ချစ်စနိုးနဲ့ခေါ်တဲ့ နာမည်မျိုးပါ။]
ကျီရှောင်ထောင်းက အလျင်အမြန်ပြောလာ၏။ "အိုကေ၊ အိုကေ၊ ဘိုင့်ဘိုင်ပါ။" ဖုန်းမချခင် ယွမ်ယယ်က သူ့ကောကို ဖုန်းပြန်ခေါ်ခိုင်းဖို့ ပြောလိုက်သည်။ အမှန်တကယ်တော့ ကျီရှောင်ထောင်းက ဖန်းရှောက်ယိ၏ဖုန်းကို မစစ်ပေ။ သူသာ စစ်ကြည့်လျှင် ၎င်းတို့နှစ်ယောက်၏ ပေါများနေသော ဖုန်းခေါ်ဆိုမှု မှတ်တမ်းနှင့် WeChat မက်ဆေ့ချ်မှတ်တမ်းများကို သူ တွေ့နိုင်ပေလိမ့်မည်။
မိနစ်အနည်းငယ်ကြာပြီးနောက် ဖန်းရှောက်ယိက ဖုန်းခေါ်လာခဲ့သည်။ ယွမ်ယယ်က ဖုန်းလက်ခံလိုက်ပြီး စပီကာဖွင့်ကာ စားပွဲပေါ်တင်ထာားလိုက်၏။ "ယိကော။"
"စောစောက အပြင်ခဏသွားလို့။" ဖန်းရှောက်ယိက ပြောလာခဲ့သည်။
"အင်း သိတယ်။" ယွမ်ယယ်က ရယ်မောလျက် ပြောလာလိုက်သည်။ "ရှောင်ထောင်းပြောတယ်။"
ဖန်းရှောက်ယိတစ်ယောက် ရေချိုးဖို့သွားသောအခါ ဖုန်းကို အပြင်ဘက်တွင် စပီကာဖွင့်၍ထားခဲ့သည်။ ယွမ်ယယ်၏ဖုန်းကလည်း စားပွဲပေါ်တင်ထားပြီး ဖုန်းမချခဲ့ပေ။ ဖုန်းခေါ်ဆိုမှုမှာ ချိတ်ဆက်နေဆဲပင်။ ယွမ်ယယ်က ဖန်းရှောက်ယိပြန်ထွက်လာသည့်အသံကို ကြားလိုက်ရာ မေးမြန်းလိုက်သည်။ "ရေချိုးလို့ပြီးသွားပြီလား။"
ဖန်းရှောက်ယိက အသံပြုလိုက်၏။ ယွမ်ယယ်က ထပ်ပြောခဲ့သည်။ "ဒါဆို အသားအရေထိန်းသိမ်းတာရော?"
ဤရက်ပိုင်းအတွင်း ၎င်းတို့နှစ်ဦးမှာ မကြာမကြာဆိုသလို ထိုကဲ့သို့ဖုန်းခေါ်ဆိုများရှိခဲ့သည်။ အရိုးသားဆုံးပြောရလျှင် သူတို့တွင် ပြောစရာများများစားစားမရှိသော်လည်း ဖုန်းခေါ်ဆိုမှုမှာ အတော်လေးကြာပေ၏။ ထိုခံစားချက်က အလွန်ဆန်းသစ်ပြီး စိတ်ဝင်စားစရာကောင်းခှသည်။
ဖန်းရှောက်ယိက သူ့ကိုပြောလာခဲ့သည်။ "ဒီနေ့ ကိုယ် ကျန်းရွှီရဲ့ရိုက်ကွင်းကို သွားလည်ခဲ့တယ်။"
"သူလည်း အဲ့မှာ ရိုက်ကူးရေးလုပ်နေရတာလား။ ရုပ်ရှင်စတူဒီယိုမှာလား။" ယွမ်ယယ်က မျက်ခုံးပင့်ကာ စပ်စုလိုက်၏။
"အမ်း၊ သူက ရုပ်ရှင်ရိုက်နေတာ။"
"သူ အခုရုပ်ရှင်ရိုက်နေပြီလား။" ယွမ်ယယ်ကမေးလိုက်သည်။ "ဘာအမျိုးအစားလဲ။"
"ပေါ့ပေါ့ပါးပါး အချစ်ဇာတ်လမ်းမျိုး။" ဖန်းရှောက်ယိက ပြန်ဖြေခဲ့၏။
"အာ" ယွမ်ယယ်က ပြောလိုက်သည်။ "ရွှီကောက သူ့ရဲ့ပုံရိပ်ကို မပြောင်းလဲသေးဘူးပဲ။"
"ပြောင်းလဲဖို့ခက်တယ်။" ဖန်းရှောက်ယိသည် စောစောက ဒါရိုက်တာဆီမှလက်ခံရရှိခဲ့သည့် ဇာတ်ညွှန်းအသစ်ကို ကောက်ယူလိုက်သည်။ သူကဘ၎င်းကို ဖတ်ရင်း ယွမ်ယယ်နှင့် စကားပြောနေခဲ့၏။ "သူက ရုပ်ရှင်ကောင်းတွေမှာ ကမ်းလှမ်းမခံရဘူး၊ ပြီးတော့ မကောင်းတဲ့ရုပ်ရှင်တွေထဲက ဇာတ်ကောင်တွေကိုလည်း လက်မခံချင်ဘူး။"
ယွမ်ယယ်နှင့် ဖန်းရှောက်ယိတို့က အချိန်အတော်ကြာတဲ့အထိ စကားပြောနေခဲ့ကြသည်။ ၎င်းမှာ သိပ်မရင့်ကျက်သလိုထင်ရသော်လည်း သူက ဖန်းရှောက်ယိနှင့် ထိုသို့ပြောနေရသည်ကို အမှန်တကယ်သဘောကျပေသည်။
၎င်းတို့နှစ်ဦး စကားပြောပြီးနောက် အချိန်မှာ ညဆယ့်နှစ်နာရီထိုးခါနီးဖြစ်သွား၏။ ယွမ်ယယ်က အနည်းငယ်ပင်ပန်းနေသော်လည်း မအိပ်ချင်သေးပေ။ ထို့ကြောင့် သူ အလုပ်ဆက်လုပ်နေခဲ့သည်။ သူ မပြီးပြတ်သေးသောအလုပ်များကို မြန်မြန်အဆုံးသတ်ရန်လိုအပ်ပေ၏။
နောက်ရက်အနည်းငယ်အတွင်း ဖန်းရှောက်ယိက ညအချိန်၌ ရိုက်ကူးရမည့် ဇာတ်ဝင်ခန်းတချို့ရှိခဲ့သည်။ ယွမ်ယယ်က သူ့ကို WeChat မက်ဆေ့ချ်အနည်းငယ်သာပို့လိုက်ပြီး ဖုန်းမခေါ်ခဲ့ပေ။ ဖန်းရှောက်ယိရိုက်ကူးရေးလုပ်နေချိန်တွင် ယွမ်ယယ် သူ့ကိုဖုန်းခေါ်ခဲပေ၏။ သူက တစ်ဖက်လူ၏အလုပ်ကို နှောင့်ယှက်မိသွားမည်အား စိုးရိမ်သည်။ ထို့အပြင် ၎င်းတို့နှစ်ဦးမှာ အမှန်တကယ် အရေးကြီးကိစ္စများပြောရန်မရှိပေ။ သူ တစ်ဖက်လူရိုက်ကူးရေးလုပ်နေစဥ် ဖုန်းခေါ်လိုက်လျှင် အလွန်များသွားပေလိမ့်မည်။
သောကြာနေ့တွင် ယွမ်ယယ်က ဖိုင်တွဲတစ်ခုအား အီးမေးလ်ပို့လိုက်သည်။ ထို့နောက် WeChat တွင် အသံမက်ဆေ့ပို့လိုက်၏။ "ဥက္ကဌကျန်းရေ၊ ငါ အီးမေးလ်ကနေ ဖိုင်ပို့ထားတယ်။ ငါ ထပ်ပြီးအနှောင့်ယှက်တော့ပါဘူး။ မင်းတည်းဖြတ်လို့ပြီးရင် ငါ့ကိုမေးလ်ပြန်ပို့လိုက်။ ဒီစာအုပ်မှာ ဘာပုံမှမပါချင်ဘူး။ ကျန်တာကိုတော့ မင်းဆုံးဖြတ်လို့ရတယ်။"
တစ်ဖက်လူက ပုန်ပို့လာ၏။ "အိုကေ ယယ်ကော။ ကျွန်တော် နောက်ကျကြည့်လိုက်မယ်။"
ယွမ်ယယ်က ပြုံးကာ သူ့ကိုပြောလိုက်သည်။ "ဟုတ်ပါပြီ။ ငါက ပေါ်လာခဲတယ်ဆိုတော့ မင်းဖုန်းခေါ်လို့ ငါမကိုင်ရင် မက်ဆေ့ချ်ပို့ထားလိုက်လို့ရတယ်။ ငါတွေ့တဲ့အခါ ပြန်ခေါ်လိုက်မယ်။"
တစ်ဖက်လူက ချက်ချင်းပြန်ပြောလေသည်။ "ကောင်းပါပြီ။"
ယွမ်ယယ်က ထရပ်ကာ အညောင်းဆန့်လိုက်သည်။ အတိတ်တုန်းက ဖန်းရှောက်ယိသာ ဘေးနားမှာရှိနေလျှင် သူအချိန်အကြာကြီးထိုင်နေမိသည့်အခါ ဖန်းရှောက်ယိက သူ့ဆီလျှောက်လာပြီး သူ့ကို မတ်တတ်ရပ်ရန် အတင်းတိုက်တွန်းလိမ့်မည်။ ဖန်းလောင်ရှီး၏ စည်းကမ်းများက အလွန်တင်းကျပ်ပေသည်။ သူသာ မလိုက်နာခဲ့လျှင် သင်ခန်းစာပေးခံရဦးမည်။ ယခုမှာမူ သူ့ဘေးတွင် မည်သူကမှ သူ့ကိုထိန်းချုပ်မနေသည့်အတွက် လွတ်လပ်နေလေ၏။ သူက ရဲတင်းပြီး အထိန်းအချုပ်ကင်းမဲ့နေသည်။
ယွမ်ယယ်က ရယ်မောလိုက်ပြီး ခါးကုန်းကာ အီးမေးလ်ကို ပိတ်လိုက်လေသည်။
ထိုစဥ် ကွန်ပြူတာစခရင်ပေါ်၌ အခြားစာမျက်နှာတစ်ခုက အလိုအလျောက်ပေါ်လာခဲ့သည်။ ယွမ်ယယ် ၎င်းကို ဂရုမထားဘဲ ပိတ်ရန်ပြင်လိုက်၏။ ထိုအလိုအလျောက်စာမျက်နှာများက အလွန်စိတ်အနှောင့်အယှက်ဖြစ်စေသည်။ ၎င်းတို့အား ဘလော့၍လည်းမရပေ။ သူပိတ်တော့မည့်ဆဲဆဲတွင် ၎င်းက ဖျော်ဖြေရေးကဏ္ဍဆီသို့ ရောက်သွားလေ၏။ ယွမ်ယယ်၏လက်များလည်း ရပ်တန့်သွားခဲ့သည်။
လူများက သူတို့၏ကိုယ်ပိုင်နာမည်များကို အလွန်အထိမခံကြပေ။ သူ့အတွက်တော့ ဖန်းရှောက်ယိ၏နာမည်လည်း အပါအဝင်ဖြစ်သည်မှာ ပြောစရာပင်မလိုချေ။
ယွမ်ယယ်က ထိုစာမျက်နှာကို အလျင်အမြန်ဖတ်လိုက်၏။ ထို့နောက် တိတ်တဆိတ်သက်ပြင်းချလိုက်လေသည်။
သူသည် Weibo ကို ဖျက်ထားပြီး သတင်းဖတ်ရန်အတွက် သူ၏ဖုန်းကို မသုံးဖူးပေ။ သူ စာပို့ရန်လိုအပ်သည်မှအပ WeChat ကိုလည်း စစ်ကြည့်ခဲသည်။ သို့သော် လက်ရှိလူနေမှုပတ်ဝန်းကျင်၌ အင်တာနက်ကို လုံးဝဖြတ်လိုက်ရန်မှာ မဖြစ်နိုင်ချေ။ ယခုကဲ့သို့ပင် - သူရှောင်ချင်ရင်တောင် မရှောင်နိုင်ခဲ့ပေ။
ယွမ်ယယ်က ခေါင်းယမ်းကာ ကွန်ပြူတာကို တိုက်ရိုက်ပိတ်ချလိုက်တော့သည်။
စောစောက ခေါင်းစဥ်၊ ဓါတ်ပုံနှင့် စာတို့က အတင်းအဖျင်းကဏ္ဍတွင် နေရာယူထားလျက်ပင်။
ခေါင်းစဥ်မှာ အနက်ရောင်စာလုံးကြီးများနှင့်ဖြစ်၏။ [ဖန်းရှောက်ယိက အမျိုးသားကြယ်ပွင့်လေးတစ်ယောက်နဲ့ တစ်ခန်းထဲမှာ မိုးသောက်တဲ့အထိအချိန်ဖြုန်းခဲ့]
အင်တာနက်သုံးစွဲသူများက မေးမြန်းထားကြသည်။ "ယွမ်ယယ် မင်းသူ့ကိုလိုက်နေတုန်းမလား။"
တွဲလျက်ပါဓါတ်ပုံများက အတော်လေးဝါးနေပြီး 'XX ဖျော်ဖြေရေးဆောင်းပါး' ဟူသော ရေအမှတ်အသားဖြင့် လုံးဝဖုံးထားလေ၏။ ဓါတ်ပုံများမှာ ဖန်းရှောက်ယိက လူငယ်လေးအတွက် တံခါးဖွင့်ပေးပြီး အချိန်တစ်ခုအကြာတွင် ထိုလူငယ်လေးထွက်သွားသည့်ပုံအဆင့်ဆင့်ကို တစ်ပါတည်းတွဲတင်ထားလေသည်။
*****