အပိုင်း (၄၆) - သည်းထန်စွာရွာသောမိုး (၂)

ကောင်းကင်ထက် လျှပ်စီးများလက်နေပြီး မှောင်မည်းနေသောတောအုပ်ကြီးအား ကြောက်မက်ဖွယ်အရိပ်များဖြင့် အလင်းထင်ဟပ်သွားခဲ့သည်။ မြင်းခွာသံများ၊ ဓါးဆွဲထုတ်သည့်အသံများနှင့် တပ်သားများ၏အသံများက တစ်ဆက်တည်းထွက်ပေါ်လာ၏။ တစ်ခုတည်းသော လစ်လပ်နေသည့်အရာမှာ လူများစကားပြောသည့်အသံသာ။

မိုးသက်မုန်တိုင်း၏အနံ့အသက်က ညအမှောင်ထုကိုဖြတ်၍ လေထုနှင့်အတူ ပျံ့လွင့်လာခဲ့သည်။ ရှောင်းချီရယ် မည်မျှကြာအောင်ပြေးနေမှန်း မသိတော့ပေ။ ငွေနှင်းဖြူက တဖြည်းဖြည်းနှင့် ရပ်တန့်လာခဲ့သည်။

ပတ်ဝန်းကျင်တစ်ခုလုံး ရုတ်တရက် တိတ်ဆိတ်သွား၏။

မိုးစက်ကလေးများက ကောင်းကင်ထက်ကနေ ကျဆင်းလာပြီး ရှောင်းချီရယ်၏မျက်လုံးများရှေ့မှာ မိုးရေတစ်စက်က ဖြတ်သန်းသွားခဲ့လေသည်။ မိုးရေစက်များ တဖွဲဖွဲကျဆင်းနေသော အမှောင်ထုအလယ်မှာ ဧရာမသားရဲကြီးက တဖြည်းဖြည်း တွားသွားထွက်လာသကဲ့သို့ပင်။ မရေမတွက်နိုင်သော တော်ဝင်အစောင့်များက ဖြန့်ကျက်ထားသောအမှောင်ထုနှင့်အတူ သိပ်သည်းစွာရက်လုပ်ထားသော ပိုက်ကွန်တစ်ခုနှယ် ရှောင်းချီရယ်ဆီသို့ တိုးကပ်လာကြ၏။

မည်သူကမှ အမိန့်မပေးခဲ့ပေ။

မိုးရေစက်များက ကျဆင်းနေပြီး ရှို့ချွင်းဓါး*၏ ချွန်ထက်သောဓါးသွားက ရေစက်လေးများကို ဖြတ်သန်းသွားခဲ့သည်။ မျက်စိတစ်မှိတ်အတွင်း ၎င်းက ရှောင်းချီရယ်၏လည်ပင်းဘေးကို ရောက်လာခဲ့သည်။

[TN/ ရှို့ချွင်းဓါး - တော်ဝင်အစောင့်တပ်သားတွေကိုင်တဲ့ဓါး။]

ရှောင်းချီရယ် ခေါင်းငုံ့လိုက်သည့်တစ်ချိန်တည်းမှာပင် လန်လိဓါးက ဓါးအိမ်ထဲကနေထွက်သွားလေ၏။ 'ချွင်' ဟူသောအသံနှင့်အတူ ဓါးစောင်းက ရှို့ချွင်းဓါး၏အရှိန်အဟုန်ကို ဖြတ်တောက်လိုက်ပြီးနောက် သူက လန်လိဓါးကို ဓါးအိမ်ထဲပြန်ထည့်လိုက်၏။ ထို့နောက် ရှို့ချွင်းဓါး ကွဲအက်သွားသည့်အတွက် နားစူးစေသည့်အသံတစ်ခု ထွက်ပေါ်လာခဲ့သည်။ ဓါးရော၊ ဓါးပိုင်ရှင်ပါ မိုးရေထဲ လဲကျသွားခဲ့လေသည်။

သူ့မြင်း၏လေးဘက်လေးလံ၌ မရေမတွက်နိုင်သောပုံရိပ်များ ရုတ်ခြည်းပေါ်ပေါက်လာခဲ့သည်။ ရှောင်းချီရယ်က မြင်းကျောပေါ်ကို လက်ဖြင့်ထောက်ကာ မြင်းကုန်းနှီးပေါ်ကနေ ခုန်ဆင်းလိုက်၏။ နောက်တစ်ကြိမ်ထပ်ပြီး လန်လိဓါးက ဓါးအိမ်ထဲကနေထွက်လာခဲ့ပြန်သည်။

ယခုတစ်ခေါက်၌ ဓါးသွားက လျင်မြန်သောအလင်းတန်းဖြင့် သူ့ပတ်ပတ်လည်မှ အရေပြားများ၊ အသားစများကို ဖြတ်သန်းသွားခဲ့သည်။ သွေးများက သူ့မျက်နှာကို လာစင်ပြီး မေးစေ့အောက်သို့စီးကျနေလျက်။ ထို့နောက်တွင် လူ့ခန္ဓာကိုယ်များ တဗိုင်းဗိုင်းလဲကျသောအသံများက နောက်ကနေလိုက်ပါလာ၏။

ရှောင်းချီရယ်က မြင်းကျောပေါ် ပြန်တက်လိုက်သော်လည်း မထိုင်ခဲ့ပေ။ ထိုအစား တစ်ဝက်ထုတ်ထားသောဓါးသွားနှင့်အတူ ဆောင့်ကြောင့်ထိုင်သောအနေအထားကို ထိန်းသိမ်းထားခဲ့သည်။

အသက်ရှူသံနှင့် မိုးရေစက်သံ။

မျက်စိကို ပိတ်စဖြင့်ဖုံးကွယ်ထားသကဲ့သို့သော ပိန်းပိတ်နေသည့်အမှောင်ည၌ ရှောင်းချီရယ်က သူ၏နားရွက်များဖြင့် အကြားစွမ်းရည်ကို အဆုံးစွန်ထိ အသုံးချခဲ့သည်။ စောစောက သူ့ဓါးကြောင့်ဒဏ်ရာရသွားသော တော်ဝင်အစောင့်တပ်သားများမှာ တစ်ယောက်မှ အသံမထွက်ခဲ့ပေ။ သူ့ကိုဝိုင်းထားသော ခြေသံများက မလှမ်းမကမ်းကနေ ထွက်ပေါ်နေပြီး သူ့ကိုဗဟိုပြုကာ ချိုးဖျက်လို့မရသောဝန်းရံမှုတစ်ခုကို ပုံစံဖော်ခဲ့သည်။

ယခုအချိန်၌ စိတ်မရှည်သူကသာ သူ၏အားနည်းချက်ကို ထုတ်ဖော်မိလိမ့်မည်ပင်။

ရှောင်းချီရယ်က အသံတိတ်စောင့်ဆိုင်းနေပြီး ထိုအခိုက်အတန့်၌ အမှောင်ထဲမှာပုန်းအောင်းနေသော ချောင်ထျန်းယာတစ်ယောက် တစ်ကောင်တည်းသောဝံပုလွေ၏အဓိပ္ပါယ်ကို သဘောပေါက်သွားခဲ့သည်၊

ရှောင်းချီရယ်တစ်ယောက် အလွန်စိတ်ရှည်ကာ တည်ငြိမ်နေပုံမှာ အန္တရာယ်များလေ၊ ပို၍ခေါင်းအေးလာပြီး ခန့်မှန်းရခက်လာလေပင်။ ထို့နောက် သူ၏အနှီဓါးက ယနေ့ည သူပြသခဲ့သော အစွယ်များဖြစ်ပေသည်။

ချောင်ထျန်းယာတစ်ယောက် ကြုံတောင့်ကြုံခဲ စိုးရိမ်ပူပန်မှုကို ခံစားလိုက်ရသည်။ ထိုစိုးရိမ်မှု၏အရင်းအမြစ်က ရှောင်းချီရယ်ကိုမသတ်ရဆိုသည့် အမိန့်ကနေ ဆင်းသက်လာခြင်းဖြစ်၏။ အန္တရာယ်များသော ဤသားရဲမျိုးကို သတ်ဖို့ထက် ချောင်ပိတ်ဖမ်းဖို့က အဆမတန်ခက်ခဲပေသည်။ အဘယ့်ကြောင့်ဆိုသော် ၎င်းတို့မှာ သူ့နားချဥ်းကပ်ဖို့ အခွင့်အရေးတစ်ခုတည်းသာရှိသောကြောင့်ပင်။ ၎င်းတို့ သူ့ကို မဖမ်းဆီးနိုင်ခဲ့လျှင် ထိုလူ့ဆီကနေ အသတ်ခံရလိမ့်မည်။ ချောင်ထျန်းယာက မျက်လုံးများမှိတ်လိုက်၏။ သူ မျက်လုံးပြန်ဖွင့်လိုက်သောအခါ ထိုမျက်ဝန်းများထဲ၌ ကြမ်းကြုတ်မှုတို့ ကိန်းဝပ်နေခဲ့သည်။

သူက သူ၏ရှို့ချွင်းဓါးကိုဆွဲထုတ်ကာ ခြေတစ်လှမ်းတိုးလိုက်၏။ နောက်အခိုက်အတန့်၌ သူ့လက်၏ လျှပ်စီးကဲ့သို့လှုပ်ရှားမှုနှင့်အတူ ရှောင်းချီရယ်၏နောက်ကျောဆီသို့ လွှားခနဲခုန်လိုက်သည်။

ရှောင်းချီရယ်က တိုက်ကွက်ကိုပိတ်ဆို့ရန် သူ၏ဓါးကိုမြှောက်လိုက်ပြီး တစ်ဖက်လှည့်ကာ ချောင်ထျန်းယာ၏ဝမ်းဗိုက်ကို ကန်လိုက်၏။ ကျန်သောသုံးဖက်မှအမျိုးသားများက ၎င်းတို့၏ဓါးများအား သူ့ထံ တညီတညွတ်တည်း ခုတ်လွှဲလာခဲ့ကြသည်။ သူက ဓါးများကို လက်တစ်ဖက်တည်းဖြင့် တားဆီးလိုက်သော်လည်း တစ်စုံတစ်ယောက်က သူ့ဘယ်ဘက်ခြမ်းမှ နေရာလွတ်ကို မြင်လိုက်ရသောအခါ ထိုဘက်ကနေ ၎င်း၏ဓါးသွားဖြင့် သူ့မျက်နှာဆီတိုးဝင်လာခဲ့သည်။ ရှောင်းချီရယ်က ဓါးစောင်းကို သူ၏တံတောင်ဆစ်ဖြင့် တွန်းတိုက်လိုက်ရာ ဓါးက ထိုလှုပ်ရှားမှုနှင့်အတူ လွှဲယမ်းသွားပြီး တစ်ဖက်လူ၏မျက်နှာကို ၎င်းနှင့်ဖြတ်ရိုက်ကာ မြေပြင်ပေါ် လှဲသိပ်လိုက်သည်။

ချောင်ထျန်းယာက နောက်တစ်ကြိမ်ထပ်ပြီး သူ့နား အနီးကပ်လိုက်လာပြန်၏။

မိုးက သည်းထန်စွာရွာသွန်းနေသည်။ အော်သံများမရှိဘဲ ဓါးချင်းရိုက်ခတ်သည့်အသံများသာရှိနေ၏။ မိုးရေစက်များက ရှောင်းချီရယ်၏မျက်နှာအစိတ်အပိုင်းများကို စိုစွတ်သွားစေပြီး ပို၍ကြမ်းကြုတ်သည့်အသွင်ကို ဖြစ်ပေါ်လာစေခဲ့သည်။ မဆုံးနိုင်သော ဤဝန်းရံပိတ်ဆို့မှုများထဲမှာ သူ၏ထိုးထွင်းဉာဏ်ကို ဆက်လက်ထိန်းထားခဲ့၏။ သူက ချောင်ထျန်းယာဦးဆောင်တိုက်ခိုက်လာသော တိုက်ကွက်များကို ရှောင်ရှားခဲ့ပြီး အမှောင်ထုထဲ၌ ပါးလွှာသောရေခဲပြင်ပေါ် လမ်းလျှောက်နေရသလိုမျိုး သတိဖြင့်လှုပ်ရှားနေခဲ့သည်။

ချောင််ထျန်းယာက ထိုးစစ်ကို ဖိအားပေးကာ ဆက်လက်ဆင်နွှဲနေခဲ့၏။ ၎င်းတို့က ဝန်းရံပိတ်ဆို့မှုမှာ ကျွမ်းကျင်သူများဖြစ်သည်။ တစ်ကောင်တည်းသောဝံပုလွေက ကြောက်စရာကောင်းသည်လော။ ၎င်းတို့တွေ သူ့ကိုဝန်းရံထားပြီး သူ၏စိတ်ရှည်မှုနှင့် တည်ငြိမ်မှုတို့ ကုန်ခန်းသွားသည်အထိ ဖြည်းဖြည်းချင်း ချိုးနှိမ်ရုံသာလိုအပ်သည်။ မဆုံးနိုင်သော တိုက်ခိုက်မှုများနှင့်ဆို သူက သေချာပေါက် အားနည်းချက်တစ်ခုခုကို ထုတ်ဖော်ပြသလာလိမ့်မည်ပင်!

ပြင်းထန်သော ဓါးသွားများအောက်မှ ဖိအားက ရှောင်းချီရယ်ကို တဖြည်းဖြည်း မောဟိုက်လာစေခဲ့သည်။ မိုးသည်းထန်စွာရွာသွန်းမှုက ပတ်ဝန်းကျင်မှ တချို့သောအသေးစိတ်များကို ဖုံးကွယ်ပေးထား၏။ ဥပမာ အမှောင်ထုအောက်မှာ ဒူးလေးကိုဆွဲလိုက်သကဲ့သို့သော လှုပ်ရှားမှုများဖြစ်၏။

ရှောင်းချီရယ် တိုက်ခိုက်လေလေ၊ ပို၍ကြမ်းကြုတ်လာလေပင်။ သူ့ဓါးသွားအောက်မှ သွေးများက အဆုံးမဲ့စွာစီးဆင်းနေခဲ့သည်။ သို့သော် ရုတ်တရက်ဆိုသလို ချောင်ထျန်းယာက လက်ပြကာ အနက်ရောင်အရိပ်အဖွဲ့ကို ပြန်လည်ဆုပ်ခွာစေလိုက်ပြီး ရှောင်းချီရယ်ကို လူသံကင်းမဲ့သော တိတ်ဆိတ်မှုထဲ တစ်ဖန်ကျရောက်စေကာ အထွတ်အထိပ်ရောက်နေသော သူ၏တိုက်ခိုက်လိုစိတ်ကို နှောင့်ယှက်လိုက်သည်။

မိုးရေစက်များက သူ့လက်ဖမိုးပေါ် စီးကျနေခဲ့သည်။ ရှောင်းချီရယ်တစ်ယောက် ခြေသံများကို မကြားရတော့ပေ။ သည်းထန်သောမိုးက သူ့ကို တစ်ကိုယ်လုံးစိုရွှဲသွားစေခဲ့သည်။ သူ့အောက်မှ ငွေနှင်းဖြူက စိုးရိမ်ပူပန်စွာဖြင့် ၎င်း၏ခွာများကို မြေကြီးနှင့်ပေါက်နေခဲ့သည်။

"ချပ်။"

ဒူးလေး၏မောင်းခလုတ်နှိပ်သံက အလွန်ပျော့ပျောင်းသော်လည်း ရှောင်းချီရယ်အတွက် နားထိုင်းလုနီးပါး ကျယ်လောင်ပေ၏။ သူက ရုတ်တရက်ဆိုသလို မြင်းကို ရိုက်ချလိုက်သည်။ ထိုအခု ငွေနှင်းဖြူက ခုန်လိုက်သော်လည်း သူကတော့ မြင်းပေါ်ကနေ လှိမ့်ဆင်းလိုက်၏။ ချက်ချင်းဆိုသလို သူ့အနောက်မှ ရွှံ့ရေများထဲ မြားတိုများစိုက်ဝင်သွားသည့်အသံများ ထွက်ပေါ်လာခဲ့သည်။

ရှောင်းချီရယ်တစ်ယောက် သူ့မျက်နှာပေါ်မှ မိုးရေစက်များကိုသုတ်လိုက်ပြီး အဘက်ဘက်ကနေ 'ချပ်ခနဲ' အသံများကိုသာ ကြားနေရသည်။ သူက နောက်တစ်ကြိမ်ချက်ချင်းခုန်လိုက်ပြီး ရှောင်ရှားလိုက်လေ၏။

စိတ်အနှောင့်အယှက်ဖြစ််စရာ ခြေသံများက သူ့အနောက်ကနေ အရိပ်တစ်ခုလို လိုက်ပါလာခဲ့သည်!

မြားတစ်စင်းက ရှောင်းချီရယ််၏လက်မောင်းကို ရှပ်မှန်သွား၏။ သွေးများဖြာထွက်လာသည့် တစ်ချိန်တည်းမှာပင် သူ ထုံကြဥ်မှုကို ခံစားလိုက်ရသည်။

မေ့ဆေး!

၎င်းတို့က သူ့ကို အရိုင်းဆန်သောသားရဲကြီးအားဖမ်းသကဲ့သို့ အမှန်တကယ် သဘောထားခဲ့ကြသည်ပင်!

အရှေ့ဘက်၌ မြေအနေအထားက နိမ့်ဆင်းသွားခဲ့သည်။ ရှောင်းချီရယ်က အားကုန်သုံး၍ပြေးလွှားကာ မြောင်းကို ကျော်လိုက်သည်။ သူ ခြေတစ်ဖက်သာချရသေးစဥ် ရုတ်တရက်ဆိုသလို နံဘေးကနေ အေးစက်စက်လေပြည်က ဝှေ့တိုက်လာခဲ့၏။ ရှောင်းချီရယ်တစ်ယောက် ခုန်လိုက်သည့်အရှိန်ကိုအသုံးပြုကာ ရှေ့ကိုလှိမ့်ချလိုက်လေသည်။ စောစောက သူရှိနေခဲ့သောနေရာ၌ ဓါးတစ်လက်ကျရောက်လာခဲ့၏။ လူသတ်သမားက သူ၏ဓါးကို ပြန်မရုပ်နိုင်ခင် ရှောင်းချီရယ်က သူ့ကိုလည်ပင်းညစ်ကာ ရွှံ့ရေထဲနှစ်၍ ဇတ်ချိုးလိုက်လေသည်။

ထိုစဥ် သူ့နံဘေးမှ သစ်ပင်ပင်စည်ထဲ မြားများထိုးစိုက်လာ၏။ ရှောင်းချီရယ်မထနိုင်ခင် ရုတ်တရက်ဆိုသလို သူ့နောက်ကျောကို အကန်ခံလိုက်ရသည်။ သူ့အနောက်ကလူဆီကနေ သတိလက်လွတ်အကန်ခံလိုက်ရပြီးနောက် သူ ခြုံပုတ်များထဲ ယိုင်ထိုးသွားခဲ့လေသည်။ သို့သော်လည်း တစ်စက္ကန့်အတွင်း သတိပြန်ကပ်လာပြီးနောက်် မြေပြင်ကိုလက်ဖြင့်ထောက်ကာ ကိုယ့်ကိုယ်ကိုယ်ထိန်းချုပ်၍ လုပ်ကြံသူအသစ်နှင့် မျက်နှာချင်းဆိုင်လိုက်သည်။

ရှောင်းချီရယ်တစ်ယောက် သူ့အရှေ့မှအမျိုးသားကို ရှင်းရှင်းလင်းလင်း တွေ့လိုက်ရသောအခါ သူ့သွားများကြားမှ သွေးများကိုလျက်လိုက်ပြီး ချစ်သူများကဲ့သို့သောလေသံဖြင့် ခေါ်လိုက်သည်။ "အိုး၊ လန်ကျိုး။"

ရှန်ဇယ်ချွမ်းကလည်း မြေပြင်ကို လက်တစ်ဖက်ထောက်ပြီး သူ၏အခြားလက်တစ်ဖက်မှ လက်ချောင်းများကြား၌ ပါးလျသောဓါးသွားလေးများကို ညှပ်ကိုင်ထားလေ၏။ သူက မိုးရေထဲမှာ ရှောင်းချီရယ်ကိုစိုက်ကြည့်နေပြီး အရှေ့ကိုခုန်လိုက်သည်။

ရှောင်းချီရယ်၏လက်ဖဝါးက ဓါးနှောင့်ကိုဆီရောက်နေပြီဖြစ်သော်လည်း ရှန်ဇယ်ချွမ်းက လက်ဦးသွားပြီး လန်လိကို လက်တစ်ဖက်ဖြင့်တွန်းလိုက်ပြီး ရှောင်းချီရယ်၏ကော်လံကိုဆုပ်ကိုင်ကာ သူ့ကို မြေပြင်ပေါ် တွန်းလှဲလိုက်သည်။

ရွှံ့များက နေရာအနှံ့စင်ကုန်၏။ ရှောင်းချီရယ်က ရှန်ဇယ်ချွမ်း၏လည်ကုပ်ကို သူ၏လက်မောင်းဖြင့်ချိတ်တွယ်ကာ လွတ်သွားသောလန်လိဓါးကို တစ်ဖက်ပြန်လှည့်၍ ရှန်ဇယ်ချွမ်းအား လှမ်းခုတ်လိုက်သည်။

ရှန်ဇယ်ချွမ်းက ချက်ချင်းဆိုသလို သူ၏ခန္ဓာကိုယ်ကို ဖိချလိုက်ပြီး ရှောင်းချီရယ်နှင့် မျက်နှာချင်းဆိုင်ဖြစ်သွားခဲ့သည်။ ၎င်းတို့ မျက်ဝန်းချင်းဆုံသွားခိုက်မှာ လျင်မြန်သောလက်လှုပ်ရှားမှုဖြင့် လန်လိဓါးစောင်းကို ရိုက်ချလိုက်လေ၏။ ဓါးသွားပေါ်မှ သွေးစက်များက သူ့မျက်နှာပေါ်လာစင်ပြီး မိုးရေစက်များနှင့်အတူ သူ၏မေးစေ့ဆီလျှောဆင်းကာ ရှောင်းချီရယ်၏မျက်ခုံးအလယ်တည့်တည့်သို့ ကျဆင်းသွားခဲ့သည်။

၎င်းတို့အနောက်မှ တော်ဝင်အစောင့်တပ်သားများက နီးကပ်လာ၏။ ရှန်ဇယ်ချွမ်းက သူ့ခန္ဓာကိုယ်ကို ပြန်မတ်ချင်ခဲ့သော်လည်း ရှောင်းချီရယ်က သူ၏လက်ဖဝါးဖြင့် သူ၏လည်ကုပ်ကနေဖိချလိုက်ရာ အချင်းချင်း၏ဝင်သက်ထွက်သက်များကိုတောင် ကြားရလုနီးပါး နီးကပ်သွားခဲ့သည်။

အနည်းငယ်မောဟိုက်စွာဖြင့် ရှောင်းချီရယ်က ပြောလိုက်သည်။

"မင်းက အဲ့လောက်တောင် ငါနဲ့အတူသေချင်နေတာလား။"

သို့သော် ရှန်ဇယ်ချွမ်းက ခေါင်းငုံ့ကာ ပြောလာခဲ့၏။

"ဝံပုလွေတစ်ကောင်ဆိုရင်တာင် မြားမှန်သွားတာနဲ့တစ်ပြိုင်နက် ထပ်ပြေးနိုင်တော့မှာမဟုတ်ဘူး။ ခင်ဗျားရဲ့လှုပ်ရှားမှုတွေက အများကြီးအရှိန်လျော့သွားပြီ။ ခင်ဗျား ဆက်မသွားနိုင်တော့ဘူး၊ ဟုတ်တယ်မလား။"

ရှောင်းချီရယ်၏လက်ချောင်းများက ရှန်ဇယ်ချွမ်း၏လည်ကုပ်ကို ကျီစယ်နေခဲ့သည်။ သူ၏လက်မက ရှန်ဇယ်ချွမ်း၏လည်စလုတ်ပေါ် လစ်ခနဲရောက်သွားပြီး အားဖြင့်ဖိလိုက်၏။

"ဒီလိုလည်ပင်းမျိုးကိုတော့ ချိုးနိုင်တုန်းပဲ။"

ထိုစဥ် ချုံပုတ်ထဲကနေ လူအရိပ်အယောင်တစ်ခု ထွက်လာခဲ့လေ၏။ ရှန်ဇယ်ချွမ်းက အနောက်က်ို လှည့်တောင်မကြည့်ဘဲ သူ့လက်ချောင်းများကြားမှဓါးသွားကို ပစ်လိုက်သည်။ တစ်ဖက်လူက ချက်ချင်းဆိုသလို မြေပြင်ပေါ်လဲကျသွားခဲ့၏။ ရှန်ဇယ်ချွမ်း၏မျက်လုံးများထဲမှ သတ်ဖြတ်လိုစိတ်က ပျောက်ကွယ်မသွားသော်လည်း လျှောက်ထိနေသော ရှောင်းချီရယ်၏လက်ကိုတွန်းဖယ်ကာ ဆင်ခြေလျှောထဲဆင်းသွားပြီး သူ့ကိုပါ ဆွဲခေါ်သွားခဲ့သည်။

ချောင်ထျန်းယာက အနည်းငယ်နောက်ကျသွား၏။ သူရောက်လာချိန်မှာ ထိုနေရာ၌ အလောင်းနှစ်လောင်းကိုသာ တွေ့လိုက်ရသည်။ သူက ၎င်းတို့ကိုတစ်ချက်ကြည့်ကာ သေဆုံးသွားသောသူ၏လည်ပင်းမှ ဓါးသွားကိုဆွဲထုတ်လိုက်သည်။ ထို့နောက် မျက်မှောင်ကြုတ်ကာ ရေရွတ်လိုက်၏။

"ဒါ ရှောင်းအာ့ရဲ့ပစ္စည်းနဲ့မတူဘူး... ပြီးတော့ ဒီလူသတ်သမားတွေက ဘယ်လိုဝင်လာတာလဲ။ ရှောင်းအာ့က လီပေကို သံကြိုးခတ်ဖို့အရေးမှာ ခွေးသံကြိုးပဲ။ သူ သေလို့မဖြစ်ဘူး။ သောက်ကျိုးနည်း၊ အဲ့လိုလုပ်ဖို့ သဘောတူထားကြတာမဟုတ်ဘူးလား။"

***

Aurora Novel Translation Team