အခန်း (၂၂) ပထမကမ္ဘာ

"ဘန်း"

လက်ဖက်ရည်ခွက်သည် တီဗီဖန်သားပြင်ကို အားပြင်းစွာ ထိမှန်သွားသည်။ ထိုမျှနှင့် အားမရသေးဘဲ သစ်သီးများ၊ သစ်သီးပန်းကန်များ၊ ပန်းအိုးများအပြင် လက်လှမ်းမီသမျှ အရာအားလုံးကို တီဗီဆီသို့ ပစ်ပေါက်နေတော့သည်။

"မဖြစ်နိုင်တာ၊ အဲဒါမျိုး စိတ်တောင်မကူးနဲ့!" ယွမ်မန်ကျီသည် အရူးတစ်ယောက်ကဲ့သို့ အော်ဟစ်နေသည်။

"ငါ့သားက သေသွားပြီ၊ ဒါကို နင်က ပြစ်ဒဏ်လျှော့ပေါ့ပေးဖို့ ကြံစည်နေသေးတယ်ပေါ့လေ။ နင် အိပ်မက်မက်နေတာပဲ။ ငါ ပြောလိုက်မယ် နင် အိပ်မက်မက်နေတာလို့"

ယွမ်မန်ကျီသည် အလွန်အမင်း ထိတ်လန့်တုန်လှုပ်ဖွယ်ကောင်းအောင် ပြုမူနေသဖြင့် အိမ်အကူများက သူမအနားသို့ မချဉ်းကပ်ရဲကြပေ။ ၎င်းတို့သည် အသံပင် မထွက်ရဲဘဲ တစ်ယောက်မျက်နှာ တစ်ယောက်ကြည့်ကာ ထောင့်တစ်နေရာတွင် ပုန်းနေကြပြီး အသံပင် မထွက်ရဲကြချေ။ ထိုစဉ် အိမ်တော်ထိန်းက အထဲဝင်လာ၍ မြင်ကွင်းကို ကြည့်ကာ မျက်မှောင်ကြုတ်ပြီးနောက် အိမ်အကူများကို ပြောလိုက်သည်။

"ဘာရပ်လုပ်နေကြတာလဲ။ မြန်မြန်ရှင်းကြလေ။ သခင်လေး ပြန်လာပြီ"

ထိုအခါမှသာ အိမ်အကူများ သန့်ရှင်းရေးလုပ်ရန် အလန့်တကြား ပြေးလာကြပြီး ယွမ်မန်ကျီ၏ ရိုက်နှက်မှုကို အကြိမ်အနည်းငယ် ခံလိုက်ရသေးသည်။

"သခင်မ၊ ကျေးဇူးပြုပြီး စိတ်အေးအေးထားပါ။ သခင်လေး ပြန်ရောက်နေပါပြီ" အိမ်တော်ထိန်းက ပြောလိုက်သည်။

ဟော့စန်း ပြန်လာပြီဟု ကြားလိုက်ရမှ ယွမ်မန်ကျီသည် ပစ္စည်းများ ပစ်ပေါက်ခြင်းကို ရပ်လိုက်သော်လည်း ဆိုဖာပေါ်တွင် ထိုင်ကာ ဆုန်ကျူယောင်ကို ငိုယို၍ ကျိန်ဆဲနေဆဲပင်။ ဟော့စန်း ပြန်ရောက်လာသောအခါ ယွမ်မန်ကျီကို တစ်ချက်ပင် လှည့်မကြည့်ဘဲ အပေါ်ထပ်သို့ တက်သွားခဲ့သည်။ ထိုသို့ မြင်သောအခါ ယွမ်မန်ကျီသည် ပို၍ ဝမ်းနည်းအားငယ်လာသဖြင့် ကျယ်လောင်စွာ ငိုကြွေးတော့သည်။

"ဒါက တရားမျှတမှု မရှိဘူး။ ငါ အရှင်မင်းကြီးကို သွားတွေ့ရမယ်။ အရှင်မင်းကြီးတောင် ငါ့ကို သနားလိမ့်မယ်..."

ဧကရာဇ်နှင့်ပတ်သက်သည့်အကြောင်း ပြောလိုက်မှ ဟော့စန်းက အနည်းငယ် တုံ့ပြန်လာပြီး လှောင်ပြောင်လိုက်သည်။

"ခုနစ်ရက်လည်တာတောင် ဘယ်လောက်ကြာသွားပြီလဲ။ သူ အခုထိ ငိုနေတုန်းလား?"

အနောက်မှ လိုက်လာသော အိမ်တော်ထိန်းက ရှင်းပြလိုက်သည်။

"သခင်မက တရားစီရင်ရာနေ့ရက်များ အစီအစဉ်ကို ကြည့်နေတာပါ။ ဒုတိယ သခင်လေးကို သတ်ခဲ့တဲ့ လူသတ်သမားက အခု ပြစ်ဒဏ်လျှော့ပေါ့ဖို့အတွက် ထောက်ခံမဲတွေ အများကြီး ရနေလို့ပါ"

"အော်..." ဤအစီအစဉ်တွင် တစ်စုံတစ်ယောက်က မတရားမှုကို ပြန်လည်ဖြေရှင်းရန် မဲများရရှိနေသည်ဟု ကြာသောအခါ ဟော့စန်း အံ့ဩသွားသည်။ မကြာသေးမီက ဒုတိယအဆင့် ဝန်ကြီးများအဖွဲ့ စာမေးပွဲ သွားဖြေစဉ် လော့ချောင် ပြောပြခဲ့သည့် အငြင်းပွားဖွယ်ရာ တရားခံအကြောင်း သူ ရုတ်တရက် သတိရသွားသည်။

"ဒီနေ့ သခင်ကြီး နိုးလာတုန်းက သခင်လေးရဲ့ ဝန်ကြီးအဖွဲ့ စာမေးပွဲ အခြေအနေနဲ့ အရှင်မင်းကြီးရဲ့ စိတ်အခြေအနေကို မေးသွားပါတယ်" အိမ်တော်ထိန်းက ဆိုသည်။

ဟော့စန်းက သူ​၏အတွေးများကို ရပ်တန့်ပြီး ပြောလိုက်သည်။

"ကျွန်တော် ဒုတိယအဆင့် အောင်မြင်ပြီးပြီ"

အမြဲအေးဆေးတည်ငြိမ်နေသော အိမ်တော်ထိန်း၏ မျက်နှာသည် ဝမ်းသာပီတိများဖြင့် လွှမ်းမိုးသွားသည်။

"ဒါက တကယ် ဝမ်းသာစရာပဲ။ တတိယအဆင့်ကိုသာ အောင်မြင်သွားရင် သခင်လေးက နန်းတွင်းအရာရှိ ဖြစ်လာပြီး အရှင်မင်းကြီးကို ခစားခွင့်ရတော့မှာ။ တကယ်လို့ နတ်တမန်တော်အဖြစ်သာ ရွေးချယ်ခံရရင်တော့ ဟော့မိသားစုက မင်းစိုးရာဇာအဆင့်ကို တက်လှမ်းနိုင်တော့မှာ!"

ဟော့မိသားစုသည် ချမ်းသာကြွယ်ဝမှုတွင် ထိပ်တန်းအဆင့်၌ တည်ရှိနေသော်လည်း မင်းစိုးရာဇာဖြစ်လာရန် ကောင်းကင်နှင့် မြေကြီးကဲ့သို့ ကွာခြားလှဆဲပင်။

"အဖေ နိုးလာရင် ပြောလိုက်ပါ။ အရှင်မင်းကြီးရဲ့ စိတ်အခြေအနေက အရင်အတိုင်း ခက်ထန်နေတုန်းပဲလို့" ဟော့စန်းသည် နန်းတော်ထဲတွင် ဧကရာဇ်ကို မြင်တွေ့ခဲ့စဉ်က မျက်နှာတစ်ခုလုံး ဖြူဖျော့သွားခဲ့သည်။ ရွှမ်ယွီလင်းဆိုလျှင် ကြောက်ရွံ့လွန်းသဖြင့် ကျင်ငယ်ပင် စွန့်ချလုနီးပါးဖြစ်ခဲ့ရသည်။

"ဟုတ်ကဲ့ပါ"

ဟော့စန်းသည် စာကြည့်တိုက်ခန်းထဲသို့ ဝင်သွားပြီး တံခါးပိတ်လိုက်သော်လည်း ယွမ်မန်ကျီ၏ စူးရှသော အော်ဟစ်သံကို ကြားနေရဆဲပင်။ သူသည် စူးစမ်းလိုစိတ်ကို မအောင့်နိုင်ဘဲ ဖုန်းကိုထုတ်ကာ လူမှုကွန်ရက်ပေါ်ရှိ ခေတ်စားနေသော အကြောင်းအရာများကို ရှာဖွေကြည့်လိုက်သည်။ ထိုအခါ တိုက်ရိုက်ထုတ်လွှင့်မှုမှ ဖြတ်ထုတ်ထားသော ဆုန်ကျူယောင်၏ ဓာတ်ပုံတစ်ပုံ ပေါ်ပေါက်လာပြီး သူ၏ အာရုံကို ဖမ်းစားသွားသည်။ ပုံထဲရှိ မိန်းကလေးသည် နူးညံ့ပြီး တောက်ပသော အပြုံးနှင့် အလွန်လှပနေကာ သူမ၏ မျက်ဝန်းများသည်လည်း ကြယ်စင်များကဲ့သို့ လင်းလက်နေသည်။ ဟော့စန်း ငေးမောသွားရပြီး သူ၏ နှလုံးခုန်သံများသည်လည်း အနည်းငယ် မြန်ဆန်လာခဲ့သည်။

---

အစီအစဉ်ရိုက်ကူးရေးအဖွဲ့။

"ဒါရိုက်တာထျန်း၊ အသနားခံစာ တင်တဲ့သူပေါင်း ခြောက်သိန်းငါးသောင်း ရှိသွားပါပြီ" ဝန်ထမ်းတစ်ဦးက လာရောက်သတင်းပို့လိုက်သည်။

ထျန်းရှန်သည် အရာအားလုံးကို ငြီးငွေ့နေသည့် ပုံစံမျိုးဖြင့် ထိုင်ခုံပေါ်တွင် ထိုင်နေသည်။ ပြစ်ဒဏ်လျှော့ပေါ့ရန် သတ်မှတ်ထားသော မဲအရေအတွက် သန်း ၅၀ နှင့် ယှဉ်လျှင် ခြောက်သိန်းငါးသောင်းသည် နည်းပါးသေးသော်လည်း၊ ယခင်က မည်သည့်တရားခံမျှ ပထမဆုံးအပိုင်းတွင် ဤသို့ မဲပေးမခံရဖူးပေ။ ယခင်စံချိန်တင်ခဲ့သော မဲအရေအတွက် ငါးသိန်းခြောက်သောင်းသည် အစီအစဉ်​၏ အပိုင်းပေါင်းများစွာကြာမှ ရရှိခဲ့ခြင်း ဖြစ်သည်။ ကြည့်ရှုသူ အများအပြားသည် စိတ်လှုပ်ရှားလာသဖြင့် မဲပေးချင်နေကြသော်လည်း ၎င်းတို့၏ ဆုံးဖြတ်ချက်သည် မိသားစုနှစ်စု၏ အနာဂတ်နှင့် သက်ဆိုင်နေသဖြင့် အလွန်တရာ သတိထားနေကြသည်။ ထို့ပြင် ဆုန်ကျူယောင်သည် ကျန်းပိုင်ချီကို အဘယ်ကြောင့် ချောင်းမြောင်းကြည့်ရှုခဲ့သနည်းဟူသော အချက်သည်လည်း ပဟေဠိ ဖြစ်နေဆဲပင်။

ဤမတရားမှု ပြင်ဆင်ချေဖျက်ခွင့် မဲလက်မှတ်များသည် ကြည့်ရှုသူများအနေဖြင့် မိမိတို့၏ ကိုယ်ပိုင်အိုင်ဒီ အချက်အလက်၊ လူမှုဂုဏ်သိက္ခာအမှတ်နှင့် ငွေကြေးများကို အသုံးပြု၍ ကိုယ်တိုင်ဝယ်ယူရခြင်း ဖြစ်သည်။ ဤမဲလက်မှတ်များသည် အလွန်တရာ အရေးပါပြီး ရရှိရန်လည်း မလွယ်ကူလှသဖြင့် လူအများက အလွန်အမင်း သတိထားပြီးမှသာ အသုံးပြုကြခြင်း ဖြစ်သည်။ သို့သော်လည်း ပထမဆုံး အပိုင်းတွင်ပင် ဆုန်ကျူယောင်က ဤမျှများပြားလှသော မဲအရေအတွက်ကို စုဆောင်းရရှိနိုင်ခဲ့ခြင်းမှာ... အမှန်တကယ် အံ့မခန်းဖြစ်လှသည်။

"ဆုန်ကျူယောင် ပြစ်ဒဏ်လျှော့ပေါ့ခွင့် ရသွားလောက်တယ်လို့ ငါ ခံစားနေရတယ်” ဝန်ထမ်းတစ်ဦးက တိုးတိုးလေး ပြောလိုက်သည်။

"တကယ်တော့... ငါလည်း သူ့ကို တိတ်တဆိတ် မဲပေးလိုက်တယ်" နောက်တစ်ဦးက ဝန်ခံလာသည်။

"တကယ်လို့ သူသာ ပြစ်ဒဏ်လျှော့ပေါ့ခွင့် ရမယ်ဆိုရင် ဘယ်နှနှစ်လောက်အထိ လျှော့သွားနိုင်မလဲ"

"ဒါကတော့ တရားရုံးရဲ့ ဆုံးဖြတ်ပိုင်ခွင့်အပေါ်မှာပဲ မူတည်လိမ့်မယ်။ တကယ်လို့ အင်တာနက် အသုံးပြုသူတွေဆီက တုံ့ပြန်မှု အားကောင်းနေမယ်ဆိုရင်တော့ လျှော့ပေါ့ခွင့် ပိုရနိုင်ခြေရှိတယ်"

---

ပြစ်ဒဏ်လျှော့ပေါ့ခွင့်တဲ့လား...

ဒယ်အိုးထဲတွင် ကြက်ဥကြော်သံများ ဆူညံနေပြီး မွှေးကြိုင်သော ရနံ့များ ပျံ့လွင့်နေသည်။ နံနက်ခင်း နေရောင်ခြည်သည် ဆုန်ကျူယောင်၏ မျက်နှာပေါ်သို့ ဖြာကျနေပြီး သူမကို အလွန်အေးချမ်းသော ပုံစံဖြစ်စေသည်။

[မင်္ဂလာနံနက်ခင်းပါ ကျူယောင်ရေ!]

[မနက်စာကို တစ်ယောက်တည်း စားနေရတာတောင်မှ အရမ်းကို အေးချမ်းနေတာပဲ]

[ကျွန်မလည်း ဆန်းဒဝိချ် တစ်ခုလောက် စားချင်လိုက်တာ!]

[ကျူယောင်က ဒီနေ့လည်း လှနေတုန်းပဲ။ သူ ဒီလောက်ကြိုးစားအားထုတ်နေတာကို မြင်ရတော့ ငါလည်း စာပိုကြိုးစားချင်စိတ် ပေါက်လာပြီ!]

[ဒါက တရားရုံး စီရင်ချက် အစီအစဉ်လေ၊ စွမ်းရည်ပြိုင်ပွဲ မဟုတ်ဘူး။ မှားမနေကြနဲ့]

[ဒါ ပထမဆုံး အပိုင်းပဲ ရှိသေးတာ၊ ဆုန်ကျူယောင်က တကယ်တမ်း ဘယ်လိုလူစားမျိုးလဲ၊ သူ့ရဲ့ တကယ့်ရည်ရွယ်ချက်က ဘာလဲဆိုတာ ငါတို့ အခုထိ မသိရသေးဘူးလေ။ စောင့်ကြည့်ကြသေးတာပေါ့]

[သူ ဘာလို့ ကျန်းပိုင်ချီကို တိတ်တဆိတ် စောင့်ကြည့်နေတာလဲဆိုတာ ငါတို့ အခုထိ မသိရသေးဘူးနော်!]

ပေါင်မုန့်ဖုတ်စက်မှ အချက်ပေးသံနှင့်အတူ ပေါင်မုန့်တက်လာသောအခါ ဆုန်ကျူယောင်သည် ရေဆေးထားသော ခရမ်းချဉ်သီးများကို စိတ်အေးလက်အေး လှီးဖြတ်လိုက်သည်။ ငွေဖြူရောင် ဓားမျက်နှာပြင်ပေါ်တွင်မူ သူမ၏ နှုတ်ခမ်းထောင့်၌ စွဲထင်နေသော အဓိပ္ပာယ်ပါပါ ပြုံးရိပ်လေး ထင်ဟပ်နေသည်။ သာမန် ရာဇဝတ်သားအချို့အတွက်မူ တရားရုံး၏ လျှော့ပေါ့မှု စီရင်ချက်သို့ ရောက်ရှိရန် မဲအရေအတွက် သန်း ၅၀ ရရှိလျှင်ပင် လုံလောက်ပြီဟု ထင်ကောင်းထင်နိုင်သော်လည်း... သူမကမူ မည်သို့မျှ ကျေနပ်နိုင်မည်နည်း။ သူမသည် တစ်သက်တစ်ကျွန်း ပြစ်ဒဏ် ချမှတ်ခံထားရသူဖြစ်ရာ သူမ၏ ပြစ်ဒဏ်ကို အနှစ် ၅၀ လျှော့ပေါ့ခွင့်ရလျှင်ပင် ဆယ်စုနှစ်တစ်ခုကျော် အကျဉ်းကျခံရဦးမည် ဖြစ်သည်။ အကယ်၍ သူမသာ အသက်ပိုရှည်နေဦးမည်ဆိုလျှင် ထောင်ထဲတွင် ပို၍ပင် နေရပေလိမ့်မည်။ ထို့အပြင် သူမ၏ ရန်သူများသည်လည်း သူမ​၏ ကျန်ရှိသော နှစ်များကို ထောင်ထဲတွင် အေးအေးဆေးဆေး ကုန်လွန်ခွင့် ပေးကြမည်မဟုတ်ချေ။

မဲအရေအတွက် သန်း ၅၀ သည် ပြစ်ဒဏ်လျှော့ပေါ့မှုကိုသာ ဆောင်ကြဉ်းပေးနိုင်သော်လည်း၊ မဲအရေအတွက် သန်း ၁၀၀ ပြည့်သွားပါက စုံစမ်းစစ်ဆေးခွင့်သည် ဧကရာဇ် လက်အောက်ရှိ အမျိုးသားစုံစမ်းစစ်ဆေးရေးအဖွဲ့ထံ ရောက်ရှိသွားမည် ဖြစ်သည်။ ထိုအဖွဲ့မှ ပါရမီရှင် စုံစမ်းစစ်ဆေးရေးမှူးများသည် အချိန်မည်မျှ ကုန်လွန်သွားပါစေ၊ သဲလွန်စ အသေးအမွှားလေးကိုပင် ရှာဖွေဖော်ထုတ်နိုင်စွမ်း ရှိကြသည်။ ထိုအဖွဲ့သည် ဧကရာဇ် တစ်ဦးတည်းနှင့်သာ သက်ဆိုင်သဖြင့် မင်းစိုးရာဇာ အသိုင်းအဝိုင်းများပင် ဝင်ရောက်စွက်ဖက်နိုင်စွမ်း မရှိကြပေ။ ဟော့မိသားစုဆိုလျှင်မူ ပြောနေစရာပင် မလိုတော့ပေ။

မုဒိမ်းကောင် ဟော့ဟိုင်နှင့် မဆုံတွေ့မီ ဖြစ်ပွားခဲ့သော အဖြစ်အပျက်များကို ဆုန်ကျူယောင် အထင်အရှား မှတ်မိနေသေးသည်။ ဧည့်ခန်းထဲတွင် ပါတီပွဲကျင်းပထားသည့် အရိပ်အမြွက်များ၊ လေထုထဲမှ ထူးဆန်းသော အနံ့အသက်များနှင့် ဆိုဖာပေါ်ရှိ အမှုန့်ဖြူအချို့ကို သူမ ပြန်သတိရသွားသည်။ ထို့ပြင် ဟော့ဟိုင်သည် သူမကို မထိပါးမီ စိတ်မတည်မငြိမ် ဖြစ်နေခဲ့ခြင်းကိုလည်း သူမ မှတ်မိနေသည်။ အချုပ်ခန်းတွင် ရှိနေစဉ်တစ်လျှောက်လုံး စဉ်းစားခဲ့သော်လည်း အရပ်ရှည်ပြီး သန်မာထွားကြိုင်းသော ဟော့ဟိုင်သည် သူမ တစ်ချက်မျှ တွန်းလိုက်ရုံဖြင့် မည်သို့ လဲကျကာ သေဆုံးသွားခဲ့ရသည်ကို သူမ နားမလည်နိုင်ခဲ့ပေ။

ဟော့ဟိုင် သေဆုံးရခြင်းမှာ အမှန်တကယ် သူမ တွန်းလိုက်ခြင်းကြောင့်လား၊ သို့မဟုတ် အခြားအကြောင်းရင်းတစ်ခုခုကြောင့်လား။ အကယ်၍ သူမ​၏ သံသယများသာ မှန်ကန်ခဲ့မည်ဆိုလျှင် ဟော့မိသားစုတစ်ခုလုံး ပြာကျပျက်စီးသွားပေလိမ့်မည်။

‘ဆက်ကြည့်နေကြစမ်းပါ’

သူမသည် ဆန်းဒဝစ်ကို တစ်ချက်ကိုက်လိုက်ပြီး ကျေနပ်စွာ ပြုံးလိုက်သည်။ ထို့နောက် ကြောင်လေး ဆုန်ဝမ်ဝမ်​သည် ပုံတစ်ခုကို ကိုက်ချီလာသည်။ သူမသည် ဆုန်ဝမ်ဝမ်လေး ပါးစပ်ထဲမှ ဓာတ်ပုံကို ယူကြည့်လိုက်ရာ ပုံထဲတွင် သုန်မှုန်နေသော ကောင်လေး၏ ပုံရိပ်ကို မြင်လိုက်ရသဖြင့် သူမ၏ အပြုံးများ ပို၍ နက်ရှိုင်းသွားလေသည်။

---

ကမ္ဘာအစစ်၊ ရိုက်ကူးရေးအဖွဲ့။

ခေါင်းဆောင်ဒါရိုက်တာ တန်းဝေသည် ယွမ်မန်ကျီ၏ ဆူပူမှုကို ခံခဲ့ရပြီးနောက် ဆုန်ကျူယောင်၏ ထောက်ခံမဲများကို ကြည့်ကာ စိုးရိမ်လာသည်။ သူသည် လက်ထောက်ဒါရိုက်တာများကို အစည်းအဝေး ခေါ်လိုက်သည်။

"ဒီအပိုင်းမှာ ငါတို့ သူ့အတွက် အခက်အခဲအဆင့်ကို အရမ်းလွယ်ကူအောင် လုပ်ပေးလိုက်မိသလိုပဲ" တန်းဝေက ပြောလိုက်သည်။

"သူ့လူကြိုက်များမှုက အခုတင် တော်တော်မြင့်တက်နေပြီ၊ ပြီးတော့ သူ့ရဲ့ ဖွံ့ဖြိုးတိုးတက်မှုကလည်း ချောမွေ့လွန်းနေတယ်။ ကြည့်ရှုသူတွေ စိတ်တိုင်းမကျ ဖြစ်လာလိမ့်မယ်။ ဒါက သာမန် အစီအစဉ်တစ်ခု မဟုတ်ဘူး၊ သူ့ဝိညာဉ်ကို စီရင်ချက်ချပြီး မေးခွန်းထုတ်ရမယ့် အစီအစဉ်ပဲ။ သူက ကြယ်ပွင့်တစ်ပွင် မဟုတ်ဘူး၊ လူသတ်သမားတစ်ယောက်!"

"ဒါဆို ဘာဆက်လုပ်ကြမလဲ" ဆုန်ကျူယောင်သည် ၎င်းတို့ ထိန်းချုပ်မှု​၏ အပြင်ဘက်သို့ လုံးဝ ရောက်ရှိနေကြောင်း အမှန်တကယ်ပင် သက်သေပြနေသည်။

"အခုကစပြီး လူသား NPC တွေကို လှုပ်ရှားဖို့ အမိန့်ပေးရမယ်။ တစ်ချိန်တည်းမှာပဲ အထဲကို လူသား NPC တွေ ထပ်လွှတ်ကြမယ်။ တကယ်လို့ အခက်အခဲတွေ မရှိဘူးဆိုရင်လည်း ငါတို့က သူ့အတွက် အခက်အခဲများများ ဖန်တီးပေးရမှာပေါ့!"

အုပ်စုတစ်စုလုံး ပူးပေါင်းပြီး တွက်ချက် ကြံစည်ကြလျှင် ဆုန်ကျူယောင်က ဤမျှ အေးဆေးတည်ငြိမ်စွာ ပြုမူနိုင်ဦးမည်ဟု တန်းဝေတော့ လုံးဝ မယုံကြည်ပေ။